Ny Baiboly — Ny Boky Maoderina Tranainy Indrindra Ananan’ny Olombelona
1 Ny Baiboly no boky fatra-piely indrindra teo amin’ny tantara manontolo. Tsy misy boky hafa voadika amin’ny fiteny maro toa azy io. Ho fanampin’izany, dia tsy misy antokon’olona be zotom-po tahaka ny Vavolombelon’i Jehovah amin’ny fizarana ny Baiboly sy amin’ny fampisehoana azy io ampahibemaso ho toy ny Tenin’Andriamanitra.
2 Koa satria izy io Tenin’Andriamanitra, dia afaka matoky isika fa manome valiny mandaitra amin’ireo zava-manahirana amin’ny andro ankehitriny izy io. Ary manome fanampiana azo ampiasaina koa ny fandaminan’i Jehovah mba hahitantsika izany valim-panontaniana izany ao amin’ireo zavatra vita an-tsoratra ary koa ao amin’ireo cassettes vidéo. Noho izany, dia faly izahay mampahafantatra ny famoahana amin’ny teny anglisy Ny Baiboly — Ny Boky Maoderina Tranainy Indrindra Ananan’ny Olombelona, ny faharoa amin’ny cassettes vidéo telo mampiseho ny maha-ara-tsindrimandry ny Baiboly. Maharitra 40 minitra izy io.
3 Tahaka ilay voalohany amin’io fitohitohizana cassettes vidéo io, itỳ faharoa itỳ koa dia manorina fitokiana amin’ny Baiboly amin’ny maha-mpitari-dalana avy amin’Andriamanitra azy. Mampiasa indrindra horonan-tsary nalaina avy tany amin’ireo tany ao amin’ny Baiboly izy io ary avy tany amin’ireo tranom-bakoka manerana izao tontolo izao; izany dia mba hanampiana antsika hahatakatra ny fomba niarovan’i Jehovah Andriamanitra ny Baiboly nandritra ny taonjato maro ka hatramin’izao androntsika izao. Ho hitanao ny fomba nihazonana ny maha-araka ny marina ny Baiboly na dia teo aza ny fanaovana kopia niverimberina sy ny fandikana azy io. Ho hitanao ny fomba niarovana an’io boky avy tamin’Andriamanitra io teo anoloan’ny fanoherana mafy ny fielezany. Ho hitanao koa ireo porofo velona ny amin’ny fomba nanovan’ny Baiboly ho tsara kokoa ny fiainan’ny olona.
4 Io cassette vidéo io dia tsy hay tombanana ho an’ny fandinihan’ny fianakaviana ny Baiboly ary ho an’ny zava-kendrena mahasoa maro hafa — tahaka ilay cassette vidéo voalohany. Matoky izahay fa hitahy ny fampiasana azy io i Jehovah.
5 Ireo izay ta hahazo amin’ny teny anglisy ilay cassette vidéo hoe The Bible — Accurate History, Reliable Prophecy (Ny Baiboly — Bokin’ny Zava-misy sy ny Faminaniana) sy ny hoe The Bible — Mankind’s Oldest Modern book (Ny Baiboly — Ny Boky Maoderina Tranainy Indrindra Ananan’ny Olombelona) dia afaka manao izany, amin’ny fandefasana fanafarana mialoha any amin’ny Sampana. Mariho, aza fady, fa hisy volana maro vao ho tonga ireo cassettes vidéo ireo. Ilay cassette vidéo amin’ny teny frantsay hoe Les Témoins de Jéhovah: un nom, une organisation dia mbola misy ao amin’ny tahiry ao amin’ny Sampana, ka azo hafarana avy hatrany. Ny vidin’ny karazany iray amin’ireny cassettes vidéo rehetra ireny amin’izao fotoana izao dia 27 510 FMG ho an’ny mpitory ary 22 760 FMG ho an’ny mpisava lalana.