Fandraisan-tsoa avy Amin’ny Lahateny Ampahibemaso Nohavaozina
1 Ny tantara maoderin’ny Vavolombelon’i Jehovah dia voalazalaza amin’ny fomba marina amin’ireto teny ao amin’ny Ohabolana 4:18 ireto: “Ny làlan’ny marina dia toy ny fipoak’andro maraina, izay mihamazava mandra-pitataovovonan’ny andro.”
2 Mifanaraka amin’izany, ny kongregasiona kristiana dia manohy mahazo fanazavana fanampiny tonga amin’ny fotoana ilana azy sy fampahafantaran-javatra nohavaozina, momba ny fampianarana araka ny Baiboly. (Matio 24:45-47). Azo inoana fa ianao dia afaka manonona ohatra ny amin’izany izay nomarihinao hatramin’ny nanombohanao nifanerasera tamin’ny Vavolombelon’i Jehovah. Ireo fivorian’ny kongregasiona, anisan’izany ny lahateny ampahibemaso, dia manampy antsika haharaka ny fitomboan’ny fahazavan’ny fahamarinana.
3 Drafitra nohavaozina: Tsy ela izay, ny Fikambanana dia nampifanaraka drafitra lahateny ampahibemaso sasantsasany tamin’izay fanazavana azo farany. Misy fanazavana vaovao nampidirina tao amin’izy ireo, ary nasiana fanazavana fanampiny ny hevi-dehibe. Raha tiana handray soa feno avy amin’izany fanazavana vaovao izany ny kongregasiona, ireo rahalahy manao lahateny ampahibemaso dia tsy tokony hampiasa afa-tsy ny drafitra azo farany indrindra.
4 Amin’ny fitsinjovana izay handraisan-tsoa faran’izay betsaka avy amin’ny lahateny ampahibemaso, dia eritrereto ny amin’ny lohatenin’ireo lahateny hatao. Alohan’ny hanatrehanao ny Fivoriana Ampahibemaso, dia manandrama mitadidy izay fanazavana farany indrindra avy amin’ireo zavatra vita an-tsoratra teokratika momba ilay foto-kevitra. Avy eo, eo am-pihainoana, dia saino mialoha ny ho famelabelarana an’izany fanazavana izany. Mariho izay fomba vaovao rehetra hampisehoana ireny fahamarinana ireny mba hampiasana azy ireny amin’ny hoavy. Izany dia manome antoka fa handray soa be indrindra avy amin’ireo lahateny nohavaozina ianao.
5 Ny lahateny ampahibemaso dia tokony hampahafanta-javatra ary koa hanosika ny mpihaino hanao zavatra: Rehefa niteny i Jesosy, dia nanohina ny fon’ny mpihaino azy. Tamin’ny fifaranan’ilay Toritenin’i Jesosy teo An-tendrombohitra, ilay lahateny ampahibemaso nalaza indrindra hatramin’izay, araka ny itateran’ny Matio 7:28 azy, dia “talanjona ny vahoaka noho ny fampianarany”.
6 Amin’ny fitadidiana ao an-tsaina ny ohatr’i Jesosy, ireo fitambaran-doholona dia tokony hampiseho fahamalinana raha ny amin’ny fanekena mpandahateny vaovao, ka tsy hanendry afa-tsy ireo rahalahy izay mpampianatra tena mahay, izay hifikitra akaiky amin’ny drafitry ny Fikambanana, ary izay afaka ny hihazona ny sain’ny mpihaino. Ireo rahalahy izay voatendry hanana tombontsoa hanao lahateny ampahibemaso dia tokony hiezaka mafy hatrany hanatsara ny fahaizany mandaha-teny, amin’ny fanekena izay torohevitra sy fanoloran-kevitra rehetra, avy amin’ireo loholona.
7 Araka ny nambara mialoha ao amin’ny Isaia 65:13, 14, ny fanambinana ara-panahin’ny vahoakan’Andriamanitra dia manjary miharihary kokoa hatrany. Ny fandaharana isian’ny lahateny ampahibemaso dia iray amin’ireo fomba maro izay ‘ampianaran’i Jehovah’ antsika. — Isaia 54:13.