Vaovao Tsara ho An’ny Mpandefitra
1 Miaina amin’ny fotoan’ny fitsarana mananontanona isika. (Ezek. 9:5, 6). Ilaina maika ny hampahafantarana ny mpandefitra hatraiza hatraiza mba hahafahan’izy ireo hiomana ho amin’izay ho avy. Noho ny hatsaram-panahiny miharo fitiavana, i Jehovah dia naniraka ny vahoakany “hilaza vaovao tsara amin’ny mpandefitra”. (Isaia 61:1, 2, NW). Ireo gazetintsika dia manampy antsika hanambara eran’ny vazan-tany efatra io vaovao tsara io.
2 Ny Tilikambo Fiambenana sy ny Mifohaza! dia manome antsika ventin-kanina ara-panahy izay manatanjaka antsika sy manosika antsika hanao zavatra. Ny Tilikambo Fiambenana dia mampionona ny mpandefitra amin’ny alalan’ny vaovao tsara hoe tsy ho ela ny Fanjakan’Andriamanitra dia hanova ny tany ho paradisa. Ny Mifohaza! dia manorina fatokiana ny fampanantenan’ny Mpamorona tontolo vaovao hanjakan’ny fiadanana sy ny filaminana. Ny fizarana be dia be ireo gazety ireo no iray amin’ireo fomba haingana indrindra hitondrana ny vaovao tsara amin’ny mpandefitra. Hevitra inona no azontsika asongadina ao amin’ireo nomerao farany?
3 Ho afaka hampiseho “Ny Tilikambo Fiambenana” tamin’ny 1 May ianao amin’ny fanondroana an’ilay lahatsoratra hoe “Fandraisan-tsoa avy Amin’ny Famakiana Isan’andro ny Baiboly” sy amin’ny fanontaniana hoe:
◼ “Inona no soa heverinao fa azontsika raisina avy amin’ny famakiana ny Baiboly? [Avelao ilay olona hamaly.] Ny Baiboly mihitsy, ao amin’ny Romana 15:4, dia manampy antsika hanjohy hevitra momba an’io fanontaniana io. [Vakio ny Romana 15:4.] Manana ny Baiboly ny ankamaroan’ny olona eo amin’ny fiaraha-monina misy antsika, kanefa vitsy no mahita fotoana hamakiana azy io tsy tapaka. Mino izahay fa ny hany fanantenana azo antoka ho an’ny hoavy dia hita ao amin’ny Baiboly, ary handray soa isika raha mamaky azy io.” Manaova teny mifanentana fanampiny, ary avy eo dia atolory ireo gazety.
4 “Ny Tilikambo Fiambenana” tamin’ny 15 May dia manasongadina lahatsoratra mahavariana iray mitondra ny lohateny hoe: “Fiainam-baovao ho An’ireo Razambentsika”. Ho azonao atao ny hanaitra ny fahalianana amin’ny alalan’izao fampidiran-dresaka izao:
◼ “Manontany tena ny maro matetika hoe mba toy inona ny razamben’izy ireo. Koa satria maty sy tsy eo intsony izy ireny, dia manatsoaka hevitra ny ankamaroan’ny olona fa tsy hahalala izany mihitsy isika. Heverinao ve fa misy fahafahana hahalalantsika ny razambentsika indray andro any?” Avelao ilay olona hamaly. Vakio ny Jaona 5:28, 29, ary hazavao fa Andriamanitra dia nampanantena ny hanome azy ireny fiainana vaovao ao amin’ny tany zary paradisa.
5 Raha miasa amin’ny alalan’ireo gazety ianao alohan’ny 14 May, dia ataovy azo antoka ny hitondra maromaro amin’ny Vaovao Momba Ilay Fanjakana No. 34 sy ny hanolotra azy ireny amin’izay rehetra mbola tsy nahazo tamin’izy io. Tokony ho vonona mandrakariva isika hizara ireo zavatra vitantsika an-tsoratra, noho ny fahatakarana fa mety hovakin’ny hafa ao amin’ilay fianakaviana mbamin’ny namana izay mety hitsidika azy, izany. (1 Tim. 6:18). Ny vaovao tsara entintsika amin’ny mpandefitra dia mety hamonjy ny ain’izy ireo. — 1 Tim. 4:16.