Kristy, Modely Iray ho An’ny Tanora
1 Taorian’ny fifampiresahana ara-baiboly iray naharitra, ny tanora iray dia nanambara hoe: “Nanaitra ahy ilay toetra feno hery nananan’i Jesosy Kristy. Izany ka mpitarika iray ho azoko itokiana.” Ny zavatra toy izany dia tsy azo ilazana an’izay mpanao politika rehetra na ireo sangany amin’ny fanatanjahan-tena sy ny fialam-boly. Tsy heverin’ny Kristiana marina ho modely ireo izay manaraka an-karihary fari-pitsipika araka an’itỳ tontolo itỳ sy fomba fiaina tsy kristiana. — Sal. 146:3, 4.
2 Afaka matoky ny tanora fa rehefa tonga amin’ny fanehoana finoana an’i Jesosy Kristy izy ireo, dia mampiseho ny tenany ho ondrin’Andriamanitra ary fantatr’i Jesosy. Hikarakara azy ireo ilay Mpiandry Tsara. (Jaona 10:14, 15, 27). Ny tanora izay manaraka an’i Kristy ho Modelin’izy ireo dia mahazo fitahiana.
3 Ny rahalahy iray izay manompo any amin’ny Betelan’i Brooklyn amin’izao fotoana izao dia nanana ho tanjona an’io tombontsoam-panompoana io hatry ny fony izy valo taona. Nampirisihina izy mba hihevitra ny fanompoana ao amin’ny Betela ho toy ny fomba azo ampiharina ho fanarahana ny ohatr’i Kristy rehefa nihalehibe izy. Ny ray aman-dreniny, mbamin’ireo mpiandraikitra mpitety faritany, dia nandrantiranty azy io foana teo anoloan’io rahalahy io. Mba hanampiana azy hiomana, dia nampirisika azy izy ireo mba hilofo amim-paharisihana tsy misy hafa amin’ny mpianakavin’ny Betela iray, amin’ny fanaovan-draharaha ao an-trano, amin’ny fanampiana amin’ny fikojakojana ny Efitrano Fanjakana, sy amin’ny fampitomboana hakingana eo amin’ny fanompoana. Rehefa nifaly tamin’ny fanompoana tao amin’ny Betela hatramin’ny taona maro izy izao, dia velom-pankasitrahana fa, fony izy tanora dia niezaka ny hanahaka ny ohatr’i Kristy.
4 Tsy nikatsaka fototr’asa iray araka an’izao tontolo izao i Jesosy; nifidy ny fanompoana izy. Naniry ny hanao ny asan’ny mpisava lalana ny anabavy tanora iray rehefa nahazo diplaoma tany an-tsekoly, niahotra anefa izy noho ny tsy fananany asa tapa-potoana mety amin’izany. Nieritreritra hatrany izy hoe: ‘Hitady asa aho aloha, avy eo aho dia hampiditra ny fangatahako hanao ny asan’ny mpisava lalana.’ Nampiseho mazava tsara ny loholona iray fa arakaraka ny niandrasany ela kokoa, no mahatonga ny asa manontolo andro iray hanintona kokoa, satria tsy hisy na inona na inona hampiahotra azy tsy hanaiky azy io. Nitantara izy hoe: “Nangataka tamin’i Jehovah ny fanahiny aho mba hitari-dalana ahy.” Avy hatrany dia nirotsaka ho mpisava lalana mpanampy izy ary tatỳ aoriana dia lasa mpisava lalana maharitra. Taoriana kelin’izany, dia nahita asa tena tamin’ny nilany azy izay nety tamin’ny fandaharany amin’ny maha-mpisava lalana izy.
5 Nanambara tamim-pahasahiana ny hafatra momba ilay Fanjakana tamin’ny rehetra i Jesosy. (Matio 4:23). Afaka mianatra ny ho sahy eo amin’ny fitoriana koa ireo tanora kristiana, ka tsy hatahotra ny hafa. Ny Vavolombelona iray 14 taona dia nitatitra hoe: “Mahafantatra ny toerana tanako amin’ny maha-kristiana daholo ny ao am-pianarana. (...) Fantatr’izy ireo tsara mihitsy izany, hany ka rehefa tojo mpiray kilasy aho eny am-panaovana fanompoana dia tsy mahatsapa ho sanganehana. Mazàna no mihaino ireo mpiara-mianatra, ary imbetsaka izy ireny no mandray zavatra vita an-tsoratra.”
6 Ny fieritreretana ny ohatr’i Kristy dia afaka manampy ny tanora hanao fanapahan-kevitra feno fahendrena momba ny hoavin’izy ireo. Toy izay ho variana amin’ny zavatra fikatsak’izao tontolo izao, dia ‘mahatsiaro ny Mpanao azy’ izy ireo amin’ny fanehoana zotom-po eo amin’ny fanompoana an’i Jehovah. (Mpit. 12:1). Tahaka an’i Kristy Jesosy, izy ireo dia mamboly “fitiavana ny Ray”, izay mitondra fitahiana irina lavitra noho izay zavatra rehetra atolotr’itỳ tontolo itỳ. Toy izay ‘handalo’ miaraka amin’itỳ tontolo tranainy itỳ, dia afaka miandrandra ny ‘haharitra mandrakizay’ izy ireo. — 1 Jaona 2:15-17.