Valin’ireo Fanontanianareo

◼ Ahoana no fampiasa amin’ny fomba mety ny teny hoe “rahalahy” na “ranadahy” sy “ranabavy” na “rahavavy”?

Rehefa ampiasaina amin’ny heviny ara-bakiteny ny teny hoe “rahalahy” na “ranadahy” sy hoe “ranabavy” na “rahavavy” dia manondro olona izay manana ray aman-dreny iray ihany. Io fifandraisana voajanahary io mazàna dia miteraka fifikirana mafana, ary ny fahakekezana tsapan’ireo olona ireo dia ampitomboin’ny fatoran’ny fisakaizana sy ny fiaraha-miaina ary ny fihetseham-po.

Nampianatra an’ireo mpianany hiantso an’i Jehovah ao amin’ny vavaka hoe “Rainay”, i Jesosy. Ny fampiasana io teny io dia toa manondro fa amin’ny maha-Kristiana antsika, dia anisan’ny mpianakavy akaiky izay mankafy fifandraisana ara-panahy sarobidy isika rehetra. Izany dia nasongadin’i Jesosy bebe kokoa rehefa niteny tamin’ireo mpanara-dia azy izy hoe “hianareo rehetra dia mpirahalahy avokoa”. — Matio 6:9; 23:8.

Noho ny fatorana ara-panahy akaiky ananantsika ao amin’ny ankohonan’Andriamanitra, dia mifampiarahaba isika amin’ny fiantsoana hoe “Rahalahy” na “Ranadahy” sy “Ranabavy” na “Rahavavy”, indrindra fa any amin’ireo fivorian’ny kongregasiona. Mandritra ireny fisehoan-javatra ara-panahy ireny, ilay mitarika ny fivoriana dia miantso ireo olona vita batisa amin’ny fampiasana ilay teny hoe “Rahalahy” na “Ranabavy” arahin’ny anaram-pianakavian’ilay olona iresahana.

Ahoana raha maniry handray anjara amin’ny fivoriana ny olona tsy vita batisa iray? Rehefa nifanerasera tamin’ny vahoakan’Andriamanitra ny olona iray hatramin’ny fotoana elaela ary miroso ho amin’ny fanoloran-tena, ka mihevitra ny tenany ho Vavolombelon’i Jehovah, dia tsy hampaninona ny hialohavan’ny anaram-pianakaviany amin’ny hoe “Rahalahy” na “Ranabavy”. Ho vao mainka marina izany raha lasa mpitory tsy vita batisa ilay olona.

Etsy an-danin’izany, ireo olona liana izay nanomboka nanatrika ireo fivoriantsika vao haingana monja dia mbola tsy nanao ny dingana hahafahana hamantatra azy ho anisan’ny ankohonan’Andriamanitra. Ireny olona ireny dia tsy hantsoina hoe “Rahalahy” na “Ranabavy”, satria tsy eo ilay fifandraisana ara-panahin’ny fianakavian’Andriamanitra, raha ny aminy. Koa mandritra ireo fivoriana, dia hiresaka azy ireny amim-pahalalam-pomba isika, ka hampiasa teny mifanentana toy ny hoe “Atoa” ampiarahina amin’ny anaram-pianakaviany.

Ny fampiasana ny teny hoe “rahalahy” sy “ranabavy” any amin’ireo fivorian’ny kongregasionantsika dia manondro ny fatorana izay akaiky sy sarobidy lavitra noho izay tondroin’ny fampiasana ny fanampin’anarana. Izy io dia mampahatsiahy antsika ny fifandraisana tena voatahy ankafizintsika amin’ny maha-fianakaviana ara-panahy eo ambany fitarihan’ilay Ray iray ihany, dia i Jehovah Andriamanitra. Izany koa dia mampahatsiahy antsika an’ilay fitiavana sy firaiketam-po lalina ananantsika amintsika samy isika. — Efes. 2:19; 1 Pet. 3:8.