Aza Mitsahatra milaza Ny Fahamarinana
1 Nanambara toy izao ireo apostoly: “Izahay tsy maintsy milaza izay zavatra efa hitanay sy renay.” (Asa. 4:20). Amin’izao andro izao, isika koa dia tsy tokony hitsahatra hilaza ny fahamarinana. Na dia fomba iray hahitana ireo izay hihaino aza ny fizarana Ny Tilikambo Fiambenana sy ny Mifohaza!, dia tsy maintsy miverina isika raha tiantsika ny hampianatra bebe kokoa momba ny fahamarinana an’ireo olona liana.
2 Raha nampanantena ianao fa hiverina sy hanazava ny fomba ahafahana mankafy fiainana milamina ankehitriny, dia ho azonao atao ny hilaza zavatra toy izao:
◼ “Fony isika nihaona voalohany, dia nizara taminao andalan-teny iray avy tao amin’ny Baiboly aho. Manome antsika antony hijerena lafy tsaran-javatra momba ny hoavin’ny taranak’olombelona, izy iny. Anio dia ho tiako ny hisarika ny sainao ho amin’ny zavatra iray izay mampiseho hoe iza no afaka manome antsika fahatsapana filaminana dieny ankehitriny.” Vakio ny Salamo 4:8. Avadiho ho eo amin’ny pejy faha-168 ny boky Fahalalana ary vakio ny fehintsoratra faha-19. Avy eo dia manontania hoe: “Ho tianao ve ny hanana fampianarana Baiboly maimaim-poana atỳ an-tokantranonao, izay hampiseho mazava ny fomba hahafahanao koa hahita io karazana filaminana io eo amin’ny fiainanao?” Raha eny ny valiny, dia avadiho ho eo amin’ny toko voalohany ilay boky.
3 Mety hanao fanolorana fampianarana mivantana ianao amin’ilay fiverenana mitsidika, amin’ny filazana hoe:
◼ “Izahay dia mizara ireo gazetinay maneran-tany mba hampahafantarana ny olona hatraiza hatraiza momba izay ampianarin’ny Baiboly. Raha mankasitraka izay ianarany ny olona, dia manolotra fampianarana Baiboly maimaim-poana atỳ an-tokantranony izahay. [Asio firesahana ilay faritra voafefy hoe ‘Irinao ve ny Hahazo Fitsidihana?’ ao amin’ny pejy farany amin’ny Ny Tilikambo Fiambenana.] Mampiasa itỳ boky hoe Fahalalana Izay Mitarika ho Amin’ny Fiainana Mandrakizay itỳ izahay ho mpitari-dalana amin’izany. Mamelà ahy hampiseho aminao vetivety ny fomba fitarihana fampianarana iray.”
4 Raha tsy mitsahatra milaza ny fahamarinana isika, dia afaka mahazo antoka fa hisy sasany hihaino sy handray tsara. — Marka 4:20.