Mitarika Ho Amin’ny Fiainana Ny Fahalalana An’ilay Andriamanitra Marina
1 “Ary izao no fiainana mandrakizay”, hoy i Jesosy tao amin’ny vavaka nataony tamin’ny Rainy, “dia ny mahafantatra Anao, Izay Andriamanitra tokana sady marina”. (Jaona 17:3). Valisoa feno fahalalahan-tanana re izany! Amin’ny fampiasana ilay boky hoe Fahalalana Izay Mitarika ho Amin’ny Fiainana Mandrakizay, dia afaka manampy ny hafa hianatra izay ilainy hatao mba hiainana mandrakizay, isika.
2 Ho azonao atao ny hampiasa fomba fampiseho izay manasongadina ny Baiboly ho loharanon-tari-dalana azo ampiharina amin’ny filazana hoe:
◼ “Miara-miresaka amin’ny mpiara-belona aminay izahay, momba ny hoe aiza no ahitana loharanon-tari-dalana azo ampiharina mba hiezahana handresy ireo zava-manahirana eo amin’ny fiainana. Tamin’ny lasa, dia nijery tao amin’ny Baiboly aloha ny maro. Ankehitriny anefa, dia niova ny fihetsiky ny olona; maro no misalasala ny amin’ny Baiboly, ka mihevitra azy io ho boky nosoratan’olombelona fotsiny. Inona no hevitrao? [Avelao ilay olona hamaly.] Misy antony tena tsara hahafahana hilaza fa azo ampiharina amin’ny androntsika ny Baiboly. [Vakio ny 2 Timoty 3:16, 17.] Ireo fotopoto-pitsipiky ny Baiboly dia azo ampiharina ankehitriny tsy misy hafa amin’ny fony Andriamanitra nanome tsindrimandry tamin’ny fanoratana ny Baiboly.” Avadiho ho ao amin’ny pejy faha-16 ny boky Fahalalana, ary hazavao vetivety ilay tari-dalana azo ampiharina hita ao amin’ny Toritenin’i Jesosy teo An-tendrombohitra. Vakio ilay fakan-teny hita eo amin’ny fehintsoratra faha-11 na ilay eo amin’ny fehintsoratra faha-13. Atolory ilay boky, ary manaova fandaharana mba hiverina hamaliana ilay fanontaniana hoe: Ahoana no ahafahan’ny tenantsika manokana mandray soa avy amin’ny fahalalana voarakitra ao amin’ny Baiboly?
3 Koa satria foto-kevitra mahaliana olona maro ny vavaka, dia mety ho tianao ny hiresaka momba azy io amin’ny fanontaniana hoe:
◼ “Noho ireo zava-tsarotra rehetra tsy maintsy atrehintsika eo amin’ny fiainana amin’ny andro maoderina, heverinao ve fa afaka ny ho tena fanampiana ho antsika ny vavaka? [Miandrasa valiny.] Maro no mihevitra fa nanatona akaiky an’Andriamanitra izy ireo tamin’ny fivavahana taminy ary koa fa ny fanaovana izany dia nanome azy ireo hery anaty, ilay zavatra ampanantenain’ny Baiboly mihitsy. [Sokafy ao amin’ny pejy faha-156 ny boky Fahalalana, ary vakio ny Filipiana 4:6, 7.] Na dia izany aza, ny olona iray dia mety hahatsapa fa indraindray dia tsy mahazo valiny ny vavaka ataony. Itỳ toko itỳ dia miresaka momba ‘Ny Fomba Ahafahanao Manatona Akaiky An’Andriamanitra’. [Atolory ilay boky.] Itỳ toko itỳ koa dia manazava ny fomba ahafahantsika mihaino an’Andriamanitra, satria tsy mandeha ila ny fifandraisana aminy. Afaka miresaka momba izany isika rehefa tonga aho amin’ny manaraka.”
4 Ho tianao ve ny hanandrana tari-dresaka mivantana mba hanombohana fampianarana? Indro misy iray izay mety hahomby raha ampiasainao:
◼ “Manolotra fampianarana Baiboly maimaim-poana any an-tokantrano izahay. Efa mba nanaraka fianarana Baiboly ve ianao taloha? [Avelao ilay olona hamaly.] Aoka hasehoko anao ny boky fianarana ampiasainay.” Asehoy ny boky Fahalalana, ary avadiho ho ao amin’ny pejy faha-3 mba hahafahan’ilay tompon-trano hahita ny loha hevitra ao anatiny, ka manontania hoe: “Efa mba nanontany tena ve ianao hoe inona no lazain’ny Baiboly momba ireto loha hevitra ireto?” Avadiho ho eo amin’ilay toko nampisehoany fahalianana be indrindra ilay boky, ary vakio ireo lohatenikely. Hazavao fa ho tianao ny hampiseho vetivety ny fomba andinihantsika io fanazavana io ao amin’ny fampianarantsika. Na atomboka na tsia ny fianarana dia atolory ilay boky.
5 Amin’izao andro izao, dia olona sesehena no mandray tsara ilay fahalalana araka ny marina an’ilay Andriamanitra marina. (Isaia 2:2-4). Tombontsoantsika ny manampy olona betsaka araka izay azo atao mba hianatra momba an’i Jehovah sy hotarihina ho amin’ny fiainana. — 1 Tim. 2:4.