Milazà Ny Fahamarinana amin’ny Mpiara- belona Aminao
1 Ny iray amin’ny didy roa lehibe indrindra dia izao: “Tiava ny mpiara-belona aminao tahaka ny tenanao”. (Matio 22:39, NW ). Ny fitiavana toy izany dia hanosika antsika hizara amin’ny mpiara-belona amintsika ny zavatra tsara indrindra ananantsika — ny fahamarinana izay hitantsika tao amin’ny Tenin’Andriamanitra. Koa satria ny gazety Ny Tilikambo Fiambenana sy Mifohaza! mampanakoako ny hafatra momba ny fahamarinana ao amin’ny Baiboly, ny fizarana ireny gazety ireny mandritra ny volana May dia fomba iray ‘hilazantsika ny fahamarinana amin’ny mpiara-belona amintsika’. (Efes. 4:25, NW ).
2 Rehefa manolotra “Ny Tilikambo Fiambenana” 15 May ianao, dia miezaha hiresaka momba ny fisehoan-javatra vao haingana iray izay nahatonga ny olona hahatsapa tsy filaminan-tsaina, ary avy eo dia manontania hoe:
◼ “Inona no heverinao fa tokony hatao mba tena hahatsapantsika filaminan-tsaina amin’izao fiainana izao? [Avelao ilay olona hamaly.] Raha ny marina no lazaina, fijerena ny zavatra tena misy ve ny fitokiana amin’ny olombelona mba handaminana ny zava-manahirana atrehin’ny taranak’olombelona? [Avelao izy hamaly; avy eo dia vakio ny Salamo 146:3.] Avy eo, ilay mpanao salamo dia manome antony tokony hijerena lafy tsaran-javatra momba ny hoavy. [Vakio ny Salamo 146:5, 6.] Itỳ lahatsoratra hoe ‘Ny Tena Filaminana — Ankehitriny sy Mandrakizay’ itỳ dia manazava ny antony ahafahantsika mitoky amin’i Jehovah Andriamanitra mba hitondrana toe-piainana tsara kokoa eto an-tany.” Atolory ireo gazety ary manolora ny hiverina mba handinika ny fomba ahafahana mankafy fiainana milamina dieny izao.
3 Raha fomba fampiseho fohy no tianao kokoa, dia ho azonao atao ny hanandrana an’izao:
◼ “Maro no mihevitra fa ny ankamaroan’ireo gazetiboky be mpitia amin’izao andro izao dia manasongadina be loatra ny dokam-barotra, ny maha-lahy sy ny maha-vavy na ny herisetra. [Asehoy Ny Tilikambo Fiambenana sy ny Mifohaza!] Mizara ireto gazety tsara izay miorina amin’ny Baiboly ireto izahay. Tena manome fanabeazana izy ireto ary mampianatra antsika hanompo an’Andriamanitra sy ho tia ny mpiara-belona amintsika ary hihazona fitondran-tena mahitsy. Raha tianao kokoa itỳ karazana vakiteny itỳ, dia fantatro fa hankafizinao izay ho hitanao ato amin’ireto nomerao ireto.”
4 Raha be zotom-po isika rehefa milaza ny fahamarinana amin’ny mpiara-belona amintsika, dia mety ho afaka hitondra fifaliana lehibe ho an’ny olona maro. — Asa. 8:4, 8.