Aoka Isika “Hilaza avy Hatrany Izay Tena Anton-diantsika”
1 Moa ve ianao efa sendra tompon-trano nanapaka ny resaka voaomanao tamim-pitandremana, tamin’ny hoe: “Inona no tadiavinao? Lazao izay tena anton-dianao!” Inona no azontsika ianarana avy amin’ny fisehoan-javatra toy izany?
2 Tsy manam-paharetana ny olona maro amin’izao andro izao. Tiany ho fantatra hoe iza isika sy ny hoe nahoana isika no tonga eo aminy. Rehefa hitany fa mba hiresaka ny amin’ny Baiboly no nahatongavantsika, dia mety tsy hihaino izy ireo. Tsy zava-dehibe eo amin’ny fiainan’ny olona maro ny famakiana Baiboly sy ny resadresaka ara-panahy. Ahoana no ahafahantsika mampiaiky ny tompon-trano toy izany fa tokony hanokana minitra vitsivitsy izy ireo mba hiresahana foto-kevitra ara-baiboly miaraka amintsika?
3 Izay mandaitra indrindra: Ny fanalahidiny dia ny fampisehoana amin’ilay tompon-trano fa ny Baiboly dia manome vahaolana azo ampiharina ho an’ireo zava-manahirana mahazo azy, sy ny fanaovana izany amin’ny teny vitsy araka izay azo atao. Ny resaka mandaitra indrindra dia manasongadina fanontaniana iray voafaritra tsara natao hampieritreritra ilay tompon-trano, ary arahin’andinin-teny iray izay mamaly ilay fanontaniana. Mety ho tianao ny hanandrana ny sasany amin’ireto fanoloran-kevitra manaraka ireto. Natao mba hanampiana antsika ‘hilaza haingana izay tena anton-diantsika’ izy ireo, no sady hanaitra ny fahalianan’ny tompon-trano isika.
4 Rehefa eny amin’ny faritany izay hilazan’ny olona matetika hoe tsy liana izy, dia mametraha fanontaniana izay mahakasika azy manokana:
◼ “Velom-panantenana ve ianao sa velom-panahiana eo am-panatonantsika ny taonarivo manaraka? [Avelao izy hamaly.] Nilaza mialoha ireo fisehoan-javatra mampikorontan-tsaina hitantsika amin’izao andro izao sy ny ho fiafarany ny Baiboly.” Vakio ny 2 Timoty 3:1, 2, 5 sy ny Ohabolana 2:21, 22.
◼ “Misy fanahiana be momba ny fahasalamana eto amintsika. Fantatrao ve fa mampanantena ny handamina amin’ny fomba maharitra ny zava-manahirana ara-pahasalamana rehetra Andriamanitra?” Vakio ny Apokalypsy 21:3, 4.
◼ “Araka ny hevitrao, inona no soa horaisin’ny fiaraha-monina misy antsika, raha mampihatra ny foto-pitsipika ara-baiboly ny mponina tsirairay eto?” Vakio ny Matio 22:37-39.
5 Koa satria ny hitory ny vaovao tsara momba ilay Fanjakana no nanirahana antsika, dia tokony hisarika ny saina ho amin’izay hotanterahin’ilay Fanjakana isika, isaky ny azo atao izany. Azonao atao ny milaza toy izao:
◼ “Fantatrao ve fa ny Baiboly, ilay boky tranainy indrindra, dia nilaza mialoha fa hisy fanjakana iray hanapaka ny tany manontolo?” Vakio ny Daniela 2:44.
◼ “Araka ny hevitrao, hanao ahoana ny toe-piainana raha i Jesosy Kristy no manapaka ny tany?” Vakio ny Salamo 72:7, 8.
6 Any amin’ny faritany misy olona tia fivavahana, dia afaka manandrana ny iray amin’ireto fampidiran-dresaka ireto ianao:
◼ “Olona maro no iharan’ny fanavakavahana noho izy lahy na vavy, noho ny fivavahany, na noho ny volon-kodiny. Araka ny hevitrao, inona no tsapan’Andriamanitra ny amin’ny fitsarana an-tendrony toy izany?” Vakio ny Asan’ny Apostoly 10:34, 35.
◼ “Fantatsika fa nanao fahagagana maro i Jesosy Kristy tamin’ny androny. Raha toa ianao ka afaka mangataka aminy hanao fahagagana iray fanampiny, inona no hangatahinao?” Vakio ny Salamo 72:12-14, 16.
7 Raha tsy ta hamoha varavarana ilay tompon-trano, dia mety hanombo-dresaka toy izao ianao:
◼ “Leon’ny mandre zava-manahirana ny ankamaroan’ny olona amin’izao andro izao. Maniry handre vahaolana izy ireo. Tsy isalasalana fa toy izany koa no tsapanao. Aiza anefa isika no afaka mahita ny tena vahaolana ho an’ireo zava-manahirana antsika?” Avelao izy hamaly. Vakio ny 2 Timoty 3:16, 17.
8 Nahoana raha manandrana azy io? Matetika dia fanontaniana tsotra sy mivantana iray no hany ilaina mba hanairana ny fahalianan’ny tompon-trano. Ny vehivavy iray izay nanohitra taloha dia nampandroso anabavy roa ho ao an-tranony, rehefa avy nanontany azy toy izao ny iray tamin’ireo anabavy: “Fantatrao ve ilay Fanjakana izay angatahinao ho tonga ao amin’ilay Vavaka Nampianarin’ny Tompo?” Nanitikitika ny sain’ilay vehivavy ilay fanontaniana, ka nanaiky hianatra Baiboly izy. Mpanompon’i Jehovah vita fanoloran-tena izy izao!
9 Rehefa miresaka amin’ny tompon-trano iray ianao, dia mitenena amim-pahatsoram-po. Mitenena avy amin’ny fo. Azo inoana fa handray tsara kokoa ny olona, rehefa miaiky fa tena miahy azy ireny marina isika. — Asa. 2:46, 47.
10 Zava-tsarotra ny asa fitoriana ny vaovao tsara amin’izao andro izao. Fatra-piahiahy ny olon-tsy fantatra ny tompon-trano sasany. Ny hafa kosa manana fiainana mikorontana ka tsy manam-potoana firy. Kanefa, afaka matoky isika fa mbola hahita olona mendrika maro. (Matio 10:11). Azo inoana fa hahomby kokoa ny fikarohantsika azy ireny, raha mihazona ny resaka ataontsika ho fohy sy “hilaza avy hatrany izay tena anton-diantsika” isika.