Miasa Amin’ny Fananana Zava-kendrena ve Ianao?
1 Andriamanitra manam-pikasana i Jehovah. (Isaia 55:10, 11). Ampirisihina mba hanahaka azy isika. (Efes. 5:1). Tena tokony ho marina izany raha ny amin’ny fomba hanatanterahantsika ny fanompoantsika. Koa mety indrindra àry izao fanontaniana izao: “Miasa amin’ny fananana zava-kendrena ve ianao?”
2 Ny fitoriana isam-baravarana sy ny fanambarana tsy ara-potoana ary ny fizarana zavatra vita an-tsoratra ataonao, dia anisan’ny fanompoana misy zava-kendrena avokoa. Tadidio anefa fa ny asa nanirahana antsika dia tsy ny fitoriana ihany, fa ny fanaovana mpianatra koa. (Matio 28:19, 20). Rehefa avy mamafy ny voan’ny fahamarinana momba ilay Fanjakana isika, dia mila miverina mba hanondraka sy hikarakara azy ireo tsy tapaka, no sady mitodika any amin’i Jehovah mba hampitombo izany. (1 Kor. 3:6). Ilaina ny tsy hanaovantsika tsirambina raha ny amin’ny fiverenana mitsidika sy ny fanombohana fampianarana Baiboly.
3 Itaro ny fanompoanao: Mahatsapa ho afa-po foana ianao, rehefa afaka mitodika any amin’izay efa nataonao teo amin’ny fanompoana, ka afaka milaza amin’ny tenanao hoe: “Vitako izay nokasaiko hatao.” Araka ny voarakitra ao amin’ny 2 Timoty 4:5, dia nampirisika i Paoly hoe: “Tanteraho [amin’ny fomba feno, NW] ny fanompoanao.” Voafaoka amin’izany ny fampitomboana ny ezaka ataonao mba hanolokoloana ny fahalianana rehetra hitanao. Ao amin’ny fandaharam-panompoanao isan-kerinandro, dia manaova fandaharana voafaritra tsara mba hanaovana fiverenana mitsidika. Miezaha hanatratra ilay zava-kendrena hanomboka fampianarana Baiboly amin’ireo izay tia ny fahamarinana. Izany no tokony ho zava-kendrenao, rehefa mandray anjara amin’ny fanompoana ianao.
4 Anontanio izay tsapan’ireo mpitory, rehefa nahita ireo olona nampianariny Baiboly, natao batisa tany amin’ny fivoriambe iray. Faly izy ireo, ary angamba nitovy tamin’ny an’ireo natao batisa mihitsy aza ny fifalian’izy ireo. Nahatratra zava-kendrena lehibe izy ireo! Nilaza izany toy izao ny mpanao mpianatra iray: “Ny fanaovana mpianatra dia midika fa hisy mpidera an’i Jehovah maro kokoa. Midika ho fiainana ho an’ireo izay manaiky ny fahamarinana izy io. Tena tiako ny mampianatra ny fahamarinana amin’ny hafa — tena mahafinaritra be ny mampianatra ny fahamarinana! (...) Maro tamin’ireo izay nanjary tia an’i Jehovah no tonga sakaizako tsy foiko.”
5 Alao sary an-tsaina ange ny hoe afaka manampy olona iray ho tonga mpanompon’i Jehovah nanolo-tena e! Antom-pifaliana re izany! Ny vokatra toy izany dia avy amin’ny fiasana amin’ny fananana zava-kendrena eo amin’ny fanompoana. — Kol. 4:17.