Ry Ray Aman-dreny — Omeo Ohatra Tsara ny Zanakareo
1 Milaza amintsika ny Tenin’Andriamanitra fa “hifaly dia hifaly ny rain’ny [sy ny renin’ny] marina”. (Ohab. 23:24, 25). Izany ka fitahiana ho an’ny ray aman-dreny izay manome ohatra tsara ho an’ny zanany! Nilaza toy izao momba ny ray aman-dreniny ny mpikambana iray ao amin’ny Komitin’ny Sampana iray: “Nifantoka tamin’ny fahamarinana ny fiainany manontolo, ary iriko koa ny hampifantoka ny fiainako manontolo amin’ny fahamarinana.” Inona no tokony ho hitan’ny ankizy eo amin’ny ray aman-dreniny?
2 Fahalalam-pomba sy fanajana lalina: Andraikitry ny ray aman-dreny ny mampianatra toetra tsara ny zanany. Ianarana ny fahalalam-pomba, tsy amin’ny fampianarana am-bava fotsiny, fa amin’ny alalan’ny fandinihana sy ny fanahafana koa. Noho izany, fahalalam-pomba inona no asehonareo? Mandre anareo miteny hoe “miala tsiny” sy “aza fady” ary “misaotra” ve ny zanakareo? Mifampitondra amim-panajana lalina ve ianareo ao amin’ny fianakaviana? Mihaino tsara ve ianareo rehefa miresaka ny hafa? Mihaino ve ianareo rehefa miresaka aminareo ny zanakareo? Hita any amin’ny Efitrano Fanjakana sy ao amin’ny ankohonana ve ireo toetra tsara ireo?
3 Fahasalamana ara-panahy tsara sy fanaovan-javatra amin-jotom-po: Nahatsiaro toy izao ny rahalahy iray izay manao ny fanompoana manontolo andro efa hatramin’ny 50 taona mahery izao: “Ohatra mahatalanjona teo amin’ny fankasitrahany ny fivoriana sy teo amin’ny zotom-pony ho amin’ny fanompoana ny ray aman-dreniko.” Ahoana no ampisehoanareo amin’ny zanakareo fa miahy ny amin’ny hihazonana ny fahasalamana ara-panahin’ireo izay ao amin’ny ankohonanareo ianareo? Miara-mandinika ny teny hodinihina ho an’ny andro ve ianareo? Manao fianaram-pianakaviana tsy tapaka ve ianareo? Mahita anareo mamaky ny Baiboly sy ny zavatra vita an-tsoratry ny Fikambanana ve ny zanakareo? Inona no reny, rehefa mivavaka ho an’ny fianakaviana ianareo? Manao resaka ara-panahy mampandroso amin’ny zanakareo ve ianareo, ka miresaka zavatra tsara momba ny fahamarinana sy ny kôngregasiôna? Dodona ny hiara-manatrika ny fivoriana rehetra sy hiara-mandray anjara amin’ny fanompoana eny amin’ny saha ve ny fianakavianareo?
4 Ry ray aman-dreny, saintsaino ny ohatra omenareo ny zanakareo. Ataovy izay hahatsara dia tsara azy io, dia hotahiriziny ho toy ny rakitra sarobidy amin’ny fiainany manontolo. Nilaza toy izao ny vadin’ny mpiandraikitra mpitety faritany iray, izay efa 70 taona mahery izao: “Mbola mandray soa avy amin’ilay ohatra tsara navelan’ny ray aman-dreniko kristianina be fitiavana ihany aho. Ary mivavaka amin-kafanam-po aho mba hanehoako fankasitrahana feno an’io lova io, amin’ny fampiasana azy araka ny tokony ho izy, mandritra ireo taona rehetra ho avy.”