Aoka Ianao Hihaino Tsara ny Fanambarana Masina
1 Tsy ny zavatra rehetra lazain’ny olona akory no mendrika ny hasiana fiheverana manokana. Rehefa miteny anefa Andriamanitra, dia tena zava-dehibe ny hihainoana. (Deot. 28:1, 2). Soa ihany fa nisy mpanoratra nahazo tsindrimandry nandrakitra an-tsoratra “ny fanambarana masin’Andriamanitra”, mba ho tombontsoantsika. (Rom. 3:2, NW ). Ny fivoriamben’ny distrika hatao tsy ho ela, dia hanome fahafahana sarobidy handre ireny fanambarana ireny, rehefa hovakina sy hodinihina izy ireny. Ahoana no tena hahafahanao hihaino tsara?
2 Tongava aloha isa-maraina: Alao sary an-tsaina ny fientanam-pon’ireo Isiraelita, rehefa nasaina hihaona tamin’i Jehovah tany amin’ny Tendrombohitra Sinay, mba hihaino ny lalàny, izy ireo! (Eks. 19:10, 11, 16-19). Raha toy izany koa no fihetsikao eo anoloan’ny fandraisana ny fampianaran’i Jehovah any amin’ny fivoriamben’ny distrika, dia hanao fandaharana ianao mba ho tonga aloha isan’andro. Tsy afaka mihaino ny fandaharana iray manontolo isika, raha tara sy manelingelina ny hafa amin’ny fitadiavana toerana. Ho azo idirana ny toeram-pivoriambe amin’ny valo ora, ary hanomboka amin’ny sivy ora sy sasany ny fandaharana isa-maraina.
3 Na dia ny sasany izay tonga aloha aza dia mbola tsy eny amin’ny toerany, mba hiandry ny fanombohan’ny fotoam-pivoriana. Inona no anton’izany? Miandry ny mpitari-draharaha hampiditra ny hira fanombohana izy ireo, vao mijanona tsy miresaka amin’ny namany sy manomboka mankany amin’ny toerany. Tokony homarihintsika fa minitra maromaro alohan’ny hira fanokafana ny fotoam-pivoriana tsirairay, dia efa hipetraka eo amin’ny lampihazo ny mpitari-draharaha, no sady hisy mozikan’ilay Fanjakana halefa ho fampidirana. Izany no famantarana ho antsika fa tonga ny fotoana hipetrahana! Avy eo, rehefa asaina hatao ny hira fanokafana, dia ho vonona hiara-mihira fiderana ho an’i Jehovah isika.
4 Miaraha mihaino amin’ny fianakavianao: Rehefa nisy fanambarana masina novakina tamin’ny Isiraelita tafavory, dia tsy maintsy nihaino sy nianatra ny fianakaviana, anisan’izany ny “ankizy madinika”. (Deot. 31:12). Any amin’ny fivoriambentsika, dia tsy tokony ‘havela hanaram-po’ ny ankizy. (Ohab. 29:15, NW ). Ry ray aman-dreny, aoka hiara-mipetraka ny fianakavianao manontolo — anisan’izany ireo zatovo. Misy ray aman-dreny tsy mitondra ny zanany any amin’ny trano fivoahana, raha tsy rehefa manomboka ny hira fanokafana. Kanefa, izany dia tsy hampianatra velively ny ankizy ny maha zava-dehibe ny hira sy ny vavaka eo amin’ny fanompoam-pivavahantsika. Tsara lavitra tokoa ny handehanana any amin’ny trano fivoahana, alohan’ny hanombohan’ny fotoam-pivoriana tsirairay, raha mbola azo atao koa!
5 Raha miala sasatra tsara isan’alina sy tsy mihinana sakafo mavesatra mandritra ny andro isika, dia hanampy antsika hihaino izany. Mifantoha amin’izay lazain’ny mpandahateny. Aza avela hiriorio ny sainao. Manaraha ao amin’ny Baiboly rehefa misy andinin-teny vakina. Mandraisa naoty fohy. Rehefa mandeha ny lahateny tsirairay, dia saintsaino izay nolazain’ilay mpandahateny, ary diniho ny fomba hampiharanao ilay fanazavana. Amin’ny fiafaran’ny andro, dia miaraha midinika ny amin’ilay fandaharana amin’ny fianakaviana. Hevitra inona avy no nankafizin’ny tsirairay? Ahoana no ahafahan’ny fianakavianao mampiasa tsara an’ilay fanazavana?
6 Manehoa fanajana ny Tenin’Andriamanitra: Ny fivoriambe dia manome antsika fahafahana tsara dia tsara hiresahana amin’ny namana sy hankafizana fiarahana mampahery. Amin’ny fahatongavana aloha kokoa, dia hanana fotoana hifampiresahana isika, alohan’ny hanombohan’ny fandaharana. Misy anefa miresaka mandritra ny fandaharana, noho ny fiheveran-diso fa tsy hanelingelina firy izany ao amin’ny efitrano fivoriana lehibe. Na dia ao amin’ny toerana lehibe aza no anaovana fivoriana, dia fotoana tokony hihainoana amin’izay, tsy misy hafa amin’ny fanatrehana fivoriana any amin’ny Efitrano Fanjakana ihany. Tsy tokony havela hanelingelina mandritra ny fandaharana ny fampiasana telefaonina fitondra mandeha sy caméscopes ary fakan-tsary.
7 Fony i Mosesy nandray ilay Lalàna avy tamin’i Jehovah, dia “sady tsy nihinan-kanina na nisotro rano” izy. (Eks. 34:28). Toy izany koa, fa tsy hety ny hihinanan-javatra na hisotroana rano mandritra ny fotoam-pivoriana any amin’ny fivoriambe. Raha tsy misy anton-javatra ara-pahasalamana lehibe, dia miandrasa mandra-pahatongan’ny “fotoana voatondro” ho amin’izany. — Mpit. 3:1, NW.
8 Any amin’ny fivoriambe sasany, dia mbola zava-manahirana ihany ny fivezivezen’ny rahalahy sy ny anabavy maro, ary na dia ny ankizy aza, eny amin’ny lalantsara, mandritra ny fotoam-pivoriana. Hisy mpikarakara ny mpanatrika homena toromarika mba hangataka ny olona toy izany hiverina ao amin’ny efitrano fivoriana. Ireo mpiasa an-tsitrapo izay miasa any amin’ny sampan-draharaha maro samihafa, dia tokony ho eny amin’ny toerany rehefa vita ny asany. Raha tsy hasaina hanao asa tena ilaina mandritra ny fotoam-pivoriana ny mpiasa an-tsitrapo, dia tokony ho eny amin’ny toerany izy ireo, ka hihaino ny fandaharana. Tsy tokony hijanonjanona eny amin’ny sampan’asa misy azy izy ireo, ka hifampiresaka mandritra ny fizotran’ny fandaharana.
9 Tsy hirintsika velively ny ho lasa “lalodalovana”, rehefa eo am-pihainoana ny Tenin’Andriamanitra. (Heb. 5:11). Aoka àry isika ho tapa-kevitra ny hampiseho fanajana araka ny tokony ho izy, amin’ny fihainoana tsara, rehefa resahina any amin’ny fivoriamben’ny distrika hataontsika tsy ho ela ireo fanambarana masina avy amin’i Jehovah.