Fandaharana Vaovao ho Famerenana ny Fivoriambe
Vao maika miharatsy hatrany ny tontolon’i Satana. Mankahery antsika anefa i Jehovah mba ‘handa izay mifanohitra amin’ny sitrapony sy ny fanirian’izao tontolo izao, ary koa mba hisaina sy hanao izay mahitsy ary hahafoy tena ho azy eo amin’ny fiainantsika, eto amin’ity tontolo ankehitriny ity.’ (Tit. 2:12) Anisan’ny fandaharana omeny amin’ny alalan’ny “mpanompo mahatoky sy malina” ny fivoriamben’ny faritra sy ny fivoriambe manokana iray andro fanao isan-taona. (Matio 24:45) Tena manatanjaka antsika ireny fiaraha-mivory kristianina ireny!
Mba hanampiana antsika hitadidy sy hampihatra ny fampianarana homena mandritra ireo fivoriambe, dia misy fandaharana vaovao ho famerenana azy ireo, hampiasaina mandritra ny taom-panompoana 2005. Hita eo amin’ny pejy faha-5 sy faha-6 ny santionan’ny fandaharan’ny fivoriambe sy ireo fanontaniana ho famerenana ny tsirairay amin’izy ireo. Hodinihin’ny fiangonana mandritra ny Fivoriana Momba ny Fanompoana izy ireo, aloha sy aoriana kelin’ny hanatrehany ny fivoriambeny. Ahoana no hanaovana izany?
Herinandro na tapa-bolana alohan’ny hanatrehan’ny fiangonana ny fivoriamben’ny faritra, dia hisy lahateny folo minitra miorina amin’ilay lahatsoratra hoe “Fandaharana Vaovaon’ny Fivoriamben’ny Faritra”, mandritra ny Fivoriana Momba ny Fanompoana. Natao izany mba hahatonga ny mpanatrika ho liana amin’ny fandaharan’ny fivoriambe. Hisarika ny sain’ny mpanatrika ho amin’ireo Fanontaniana ho Famerenana koa ilay mpandahateny, mba hampirisihana azy ireo handray an-tsoratra. Amin’izay ny rehetra dia ho vonona tsara amin’ny famerenana, izay hatao herinandro vitsivitsy aorian’ny fivoriambe.
Herinandro vitsivitsy aorian’ny fivoriamben’ny faritra dia hanaovana famerenana mandritra ny 15 minitra ny fandaharana tamin’ny andro voalohany, mandritra ny Fivoriana Momba ny Fanompoana. Hatao ny herinandro manaraka kosa ny famerenana ny andro faharoa, ary haharitra 15 minitra koa izany. Ny fanontaniana ho famerenana ato amin’ity takelaka fanampiny ity no hiorenan’ny dinidinika. Ny soa noraisina tamin’ilay fandaharana no tokony hasongadina mandritra ilay famerenana. Azon’ny anti-panahy atao ny mamintina, manafoana, na mandamina indray ny fandaharana sasany amin’ny Fivoriana Momba ny Fanompoana, mba hanaovana ireo famerenana ireo.
Toy izany koa no hatao amin’ny fandaharan’ny fivoriambe manokana iray andro. Indray mandeha ihany anefa no hanaovana ny famerenana ny fandaharana rehetra, ary haharitra 15 minitra izany. Tokony hotehirizintsika tsara ity takelaka fanampiny ity, ary hampiasaintsika mba handraisana soa avy amin’ny fampianarana tsara omen’i Jehovah.—Isaia 48:17, 18.