Fandaharana Vaovaon’ny Fivoriambe Manokana Iray Andro
Mety hiharan-doza isika, raha mahita na mandre fampitandremana, nefa tsy manao zavatra mifanaraka amin’izany. Mbola zava-dehibe kokoa anefa ny manaraka ny tari-dalana omen’i Jehovah. Izany no hasongadina mandritra ny fandaharan’ny fivoriambe manokana iray andro, amin’ny taom-panompoana ho avy. Ny foto-kevitr’izy io dia hoe “Tandremo ny Fomba Fihainoanareo.”—Lioka 8:18.
Hohazavain’ny mpandahateny mpitsidika amin’ny lahateniny voalohany, hoe nahoana no mihatra amintsika ankehitriny ny torohevitr’i Paoly, ao amin’ireo toko voalohandohany amin’ny taratasiny ho an’ny Hebreo. Izy koa no hanao ilay lahateny famaranana hoe “Ankatoavy Foana ny Toromarik’Andriamanitra.” Asainy mandinika isika rehetra amin’io lahateny io, raha tena mihaino an’i Jehovah sy ny Zanany ary ny “mpanompo mahatoky sy malina.”—Matio 24:45.
Maromaro amin’ireo anjara no handraisan’ny fianakaviana soa. Hanampy antsika tsy hamela ny zavatra eo amin’izao tontolo izao hampiadana ny fandrosoantsika ara-panahy, ilay lahateny hoe “Fianakaviana Mifantoka Tsara Rehefa Mihaino ny Tenin’Andriamanitra.” Hisy fanadinadinana an’ireo nanao fiovana mba hametrahana ny fanompoana an’i Jehovah eo amin’ny toerana voalohany, amin’io lahateny io. Hisy tanora hoadinadinina koa amin’ilay lahateny hoe “Manatanjaka ny Tanorantsika ny Fihainoana Tsara ny Tenin’Andriamanitra.” Niaro ny fahamarinana izy ireo tany am-pianarana, sy rehefa niaraka tamin’ireo nitovy taona aminy, ary rehefa teny amin’ny fanompoana. Hanampy antsika tsy hanamaivana ny fahaizan’ny ankizy madinika mianatra, ilay lahateny hoe “Mihaino An’Andriamanitra sy Mianatra ny Ankizy Madinika.” Hisy fanadinadinana ankizy miaraka amin’ny ray aman-dreniny amin’io lahateny io. Hanampy antsika izany mba hahafantarantsika ny soa raisina, rehefa ampiofanina dieny mbola kely amin’ny lalan’i Jehovah ny zanaka.
“Mamitaka ny tany rehetra misy mponina” i Satana. Asehon’i Jehovah amin’ny mpanompony mahatoky kosa anefa ny lalana tokony halehan’izy ireo. (Apok. 12:9; Isaia 30:21) Ho hendry sy ho sambatra ary hahazo ny fiainana mandrakizay isika, raha mihaino amim-pitandremana ny toroheviny sy mampihatra izany eo amin’ny fiainantsika.—Ohab. 8:32-35.