Ezaka Manokana Hizarana Ilay Bokikely Vaovao
1 Maro ny olona sahiran-tsaina noho ny toe-piainana maneran-tany. Vitsy anefa no mahafantatra ny antony mahatonga izany, sy ny zavatra mbola hitranga, ary izay tokony hatao mba tsy hiharan’ny didim-pitsarana amin’ny hoavy. (Ezek. 9:4) Hatao manomboka ny alatsinainy 18 Oktobra ka hatramin’ny alahady 14 Novambra, ny ezaka manokana hizarana ilay bokikely hoe Miambena Hatrany!
2 Azo apetraka ilay bokikely, rehefa mitory isan-trano, manao fiverenana mitsidika, mitory tsy ara-potoana, eny an-dalana, na eny amin’ny faritany be toeram-piasana. Tsy natao hozarazaraina fotsiny anefa izy io. Miresaka momba ny dikan’ny fisehoan-javatra maneran-tany ny Baiboly, ka izay liana amin’izany ihany no homena io bokikely io. Taratasy mivalona kosa no hatolotra, raha tsy tena liana ilay olona.
3 Afaka milaza toy izao ianao, mba hisarihana ny sain’ny olona:
◼ “Maro no sahiran-tsaina noho ireo olana lehibe sy fisehoan-javatra mahatsiravina fahita ankehitriny. [Milazà zava-niseho iray fantatry ny olona.] Fantatrao ve fa efa voalazan’ny Baiboly mialoha izy ireny? [Avelao izy hamaly. Mamakia andinin-teny mifanaraka amin’ilay zava-niseho, toy ny Matio 24:3, 7, 8; Lioka 21:7, 10, 11; na 2 Timoty 3:1-5.] Mampahafantatra ny dikan’izao vanim-potoana iainantsika izao ny Baiboly, sady miresaka momba ny hoavin’ny olombelona. Te hahafantatra bebe kokoa momba izany ve ianao? [Avelao izy hamaly, ary omeo bokikely raha hitanao fa tena liana.] Tsy itakiana sarany ity bokikely ity. Afaka manome izay foinao anefa ianao, raha tianao ny hanohana ny asa fitoriana ataonay maneran-tany.”
4 Azonao atao koa ny milaza hoe:
◼ “Maro ankehitriny no kivy noho ny zavatra nanjo azy, na noho ireo fisehoan-javatra mahatsiravina mitranga eran-tany. Ao ny manontany tena hoe: Nahoana Andriamanitra no mamela azy ireny hitranga? Manome toky antsika anefa ny Baiboly, fa tsy ho ela Andriamanitra dia hanala ny fijaliana. Resahina ato amin’ity andininy ity ny fitahiana homeny ny olombelona. [Vakio ny Salamo 37:10, 11.] Te hahafantatra bebe kokoa momba izany ve ianao? [Avelao izy hamaly, ary omeo bokikely raha hitanao fa tena liana.] Tsy itakiana sarany ity bokikely ity. Afaka manome izay foinao anefa ianao, raha tianao ny hanohana ny asa fitoriana ataonay maneran-tany.”
5 Raiso ny anarana sy adiresin’izay rehetra nandray bokikely. Manaova fandaharana hitsidihana sy hanampiana azy ireny. Azonao atao ny manomboka fampianarana Baiboly avy hatrany mandritra ny fitoriana, raha tena liana ilay olona. Azonao ampiasaina amin’izany ny bokikely Miambena Hatrany!, na boky hafa, toy ny bokikely Takina.
6 Hozaraina ireo bokikely, aorian’ny Fivoriana Momba ny Fanompoana andinihana ity lahatsoratra ity. Ampirisihina ny mpitory sy mpisava lalana, mba tsy haka afa-tsy izay bokikely hapetrany mandritra ny andro vitsivitsy aloha. Enga anie i Jehovah hitahy an’io ezaka manokana io, mba ho fiderana azy sy ho tombontsoan’ny olona tso-po rehetra.—Sal. 90:17.