Valin’ny Fanontanianareo

◼ Ahoana no fomba tsara indrindra hanaovana fanomezana ho an’ireo rahalahy tra-pahasahiranana any an-tany hafa?

Mandre isika indraindray, fa misy rahalahy tra-pahasahiranana any an-tany hafa, noho ny fanenjehana, loza, na zava-tsarotra hafa. Nisy rahalahy nandefa vola nivantana tany amin’ny biraon’ny sampan’ilay tany, ary namaritra ny olona, na fiangonana, na tetikasa fanorenana homena ilay vola.—2 Kor. 8:1-4.

Deraina ny fiahiana feno fitiavana aseho amin’ny mpiray finoana toy izany. Matetika anefa no misy zavatra maika kokoa noho izay noeritreretin’ilay olona nanao fanomezana. Mety ho efa nahazo fanampiana koa ilay olona na fiangonana notononiny. Tsara àry raha alefa any amin’ny biraon’ny sampana eo an-toerana ilay vola. Afaka mahazo antoka isika fa hampiasaina araka izay nirin’ilay mpanao fanomezana izy io, na natao ho an’ny asa maneran-tany izany, na ho an’ny Tahirim-bola ho An’ny Efitrano Fanjakana, na ho fanampiana ny tra-boina.

Efa tsara ofana ireo rahalahy any amin’ny sampana rehetra, ka afaka manao zavatra haingana ho an’ireo tra-pahasahiranana. Ampahafantarin’ny sampana ny Filan-kevi-pitantanana foana ny zava-mitranga. Raha mila fanampiana bebe kokoa izy ireo, dia ny sampana eo akaikiny no angatahin’ny Filan-kevi-pitantanana hanampy, na ny foibe mihitsy no handefa vola.—2 Kor. 8:14, 15.

Tokony halefanao any amin’ny biraon’ny sampana misy anao àry ny vola tianao harotsaka ho an’ny asa maneran-tany, na tetikasa fanorenana any an-tany hafa, na fanampiana ny tra-boina. Azonao alefa manokana izany, na alefa amin’ny alalan’ny fiangonana. Hikarakara izay ilain’ireo rahalahy maneran-tany amin’ny fomba voalamina tsara amin’izay ny “mpanompo mahatoky sy malina”, araka ny fandaharana ataon’ny Filan-kevi-pitantanana.—Matio 24:45-47; 1 Kor. 14:33, 40.