Voasa Tsara ve ny Faritaninao?
1 Ahoana no fiheveranao ny faritany itorianao? Hita amin’ny ataonao ve fa mazoto sy miahy lalina ireo olona ao ianao, sa kosa tsy rototra sy tsy miraharaha azy ireo? Nilaza ny fahatapahan-keviny toy izao ny mpiandraikitra ny fanompoana be zotom-po avy any Texas, Etazonia: “Mahatsiaro ho manana adidy amin’ny olona iray hafa aho, isaky ny mandondom-baravarana.” Tokony hiahy lalina an’ireo “noana sy mangetaheta ny fahamarinana” isika, rehefa miasa tsy tapaka ny faritanintsika manokana sy ny an’ny fiangonana.—Matio 5:6.
FARITANY NOMENA MPITORY IRAY SY FARITAN’NY FIANGONANA
2 Fanarahana ny tari-dalan’Andriamanitra ny fitsinjarana tsara ny faritany. (2 Kor. 10:13; Gal. 2:9) Azo antoka fa ho voasa tsara kokoa ny faritany rehetra amin’izay. Tsy hifanitsaka koa izy ireny, ka tsy ho sosotra ny olona itoriana. Indraindray mantsy misy mpitory maromaro miverina mitsidika olona iray ihany, satria tsy fantany fa efa misy mitsidika izy io. Ho voasoroka io olana io, raha voalamina tsara ny faritany.
3 Marina fa tokony hiovaova ny mpitory miasa ao amin’ny faritany iray. Aleon’ny fiangonana sasany anefa olona mitovy foana no miasa ilay faritany na ny ampahany amin’izy io. Mahasoa indraindray ny mahafantatra ny anaran’ny olona itoriana. Mazàna no vonona kokoa hampandroso an-trano ny olona, rehefa fantany hoe iza no mitsidika azy.
4 Kely kokoa ny ezaka atao sy ny fotoana ary ny vola lany, rehefa mitovy foana ny mpitory miasa amin’ny faritany iray. Nahoana? Satria mifanakaiky ny misy an’ireo tsy tratra an-trano sy ny fiverenana mitsidika ary ny fampianarana Baiboly. Tsy miparitaka any amin’ny faritany samy hafa izy ireo, ka tsy ho voatery handeha lavitra isika. Harisika kokoa àry isika hitsidika an’izay rehetra liana amin’ny hafatra entintsika. Manana faritany anao manokana ve ianao? Nahoana raha miezaka mafy hifankahalala amin’ny olona rehetra ao amin’io ‘tanimbarinao’ io? (Matio 13:38) Be famindram-po toa an’i Jehovah isika rehefa manao izany, ary manaiky fa mbola hampamoahina isam-batan’olona ny amin’ny ain’ny mponina ao amin’ny faritanintsika.—Jona 4:11.
FARITANY VOASA MATETIKA
5 Mpitory maro no mahita fa mihabetsaka ny olona tsy tratra an-trano amin’ny fotoana mahazatra itsidihany azy ireo. Toy izay hanao lisitra lava be an’ireo tsy tratra an-trano, izay mahalana vao hiverenana, dia aleon’ny mpitory sasany miverina any amin’izy ireo avy hatrany. Tratra ao an-tranony izy ireo matetika rehefa afaka adiny iray na roa, satria mety ho nandeha nivoaka vetivety fotsiny. Toy ny hoe lehibe kokoa ny faritany itoriantsika, rehefa tsy mitsahatra ny miverina haingana any amin’izay rehetra tsy tratra an-trano isika. Tsy ilaina hampitomboina amin’izay ny faritany, ary tena hanampy an’ireo fiangonana tsy manana afa-tsy faritany kely izany.
6 Tokony hataontsika izay hitsidihana ny olona rehetra ao amin’ny faritanintsika, raha heverintsika ho zava-dehibe ny andraikitsika. Ilana fikirizana sy fahavononana ny mitory, indrindra fa any amin’ny faritany ambanivohitra, ny faritany tsy mandray firy na voasa matetika, ary any amin’ireo toerana sarotra idirana. Midika izany fa tsy maintsy mandray an-tsoratra tsara isika isan-trano. Aza mianina amin’ny fitsidihana indray mandeha monja raha liana ilay olona, fa tsidiho imbetsaka izy. Naneho fikirizana toy izany ny mpitory iray, ka olona 80 izao no anaterany gazety. Maromaro koa no ampianariny Baiboly.
7 Tsy maintsy be zotom-po sy fikirizana isika, raha tiantsika ho vita tsara ny fanompoantsika. (Ezek. 9:11; Jaona 17:4) Tsy tokony hatao alasafay na kitoatoa ny fanompoantsika an’Andriamanitra. Tokony hieritreritra tsara ny fomba anatanterahantsika ny asa fitoriana nanendrena antsika kosa isika, raha tena tia an’i Jehovah sy ny mpiara-belona.