Aoka Ianao Hiahy ny Olona, ka Manomàna Tsara
1 Miahy ny olona isika, raha manomana tsara ny fitoriana hataontsika. Nahoana? Tsy hifantoka loatra amin’ny fomba fitorintsika isika amin’izay, ka ho afaka haneho fiheverana bebe kokoa an’ilay olona. Manampy antsika tsy hatahotahotra koa izany, fa hiresaka avy amin’ny fo. Ahoana anefa no hanomanantsika fomba fitory mandaitra?
2 Mampiasà fomba fitory mifanentana: Mifidiana fomba fitory iray ao amin’ny Fanompoantsika Ilay Fanjakana Janoary 2006. Eritrereto hoe ahoana no hilazanao azy amin’ny fomba fiteninao. Ampifanaraho amin’ny faritaninareo ilay izy. Mety hahita olona avy amin’ny fivavahana na fiaviana iray, ohatra, ianao. Fantaro mialoha izay zavatra mety hahaliana azy. Ho hita fa tena miahy ny olona iresahanao ianao, raha ataonao mifanentana aminy ny fomba fitorinao.—1 Kor. 9:22.
3 Hatsarao foana ilay fomba fitory ampiasainao. Tena zava-dehibe ny fampidiran-dresaka ataonao, ka mariho ny fihetsiky ny olona eo am-pihainoana izany. Mahaliana azy ve ilay foto-kevitra? Mamaly ny fanontaniana apetrakao ve izy? Raha tsia, dia hatsarao ilay fampidiran-dresaka mandra-pahitanao vokatra tsara.
4 Fomba hanampiana anao hitadidy: Maro no mahita fa mila tsy ho tadidiny ny zavatra holazaina rehefa tonga eo am-baravarana izy. Raha izany no izy, nahoana raha andramana averimberina miaraka amin’ny olon-kafa ilay fomba fitory tianao hampiasaina? Hazava tsara ao an-tsainao ny hevitra rehetra amin’izay, ka ho tsotra ny fomba hilazanao azy sady hirindra tsara. Mety hanampy anao hahita mialoha ny fomba hiatrehana izay zavatra mety holazain’ny olona koa izany.
5 Misy fomba hafa koa hanampy anao hitadidy. Azonao fintinina ao anaty taratasy kely ny zavatra holazaina, ary topazana maso alohan’ny hanatonana trano iray. Hitan’ny sasany fa manampy azy ho tony sy ho afaka hiresaka tsara kokoa amin’ny olona izany. Miahy ny olona àry isika raha manomana tsara. Hanampy antsika hanatsara ny fomba itoriantsika ny vaovao tsara izany.