“Araho ny Dian’i Kristy!” Fivoriamben’ny Vondrom-paritra 2007
1, 2. a) Inona no nasain’i Mosesy nataon’ny Israelita, ary inona no soa noraisin’izy ireo tamin’izany? b) Inona avy no fiomanana ilaintsika atao dieny izao?
1 Nasain’i Mosesy nivory isaky ny fito taona ny Israelita rehetra sy ny vahiny tao an-tanànany, mba hamakiana ny Lalàna tamin’izy ireo. Inona no tanjona tamin’izany? Mba “hihainoany sy hianarany.” (Deot. 31:10-12) Hitan’i Jehovah fa ilain’ny vahoakany ny fivoriambe. Tsy ho ela àry dia hihaona indray ny vahoakany amin’ilay Fivoriamben’ny Vondrom-paritra maharitra telo andro hoe “Araho ny Dian’i Kristy!”
2 Efa miomana hanatrika azy io ve ianao? Sao dia mila mangataka andro tsy iasana amin’ny mpampiasa ianao? Inona no azonao atao mba hanasana ny olona ampianarinao Baiboly, na ny havanao tsy Vavolombelona? Misy olona tokony hampiana ve eo anivon’ny fiangonana mba hahafahany hanatrika? Hanampy anao hanao izany ny fanazavana manaraka.
3. a) Inona no mampiseho fa tanteraka ankehitriny ny Isaia 25:6? b) Inona no voamarika amin’ny andro voalohan’ny fivoriambe, ary inona no tokony hataontsika tsirairay?
3 Tongava mandritra ny telo andro: Manome sakafo ara-panahy tondraka ho an’ny vahoakany i Jehovah. (Isaia 25:6) Anisan’izany ireo fampianarana be dia be raisintsika any amin’ny fivoriamben’ny vondrom-paritra isan-taona. Voamarika anefa fa tena vitsy ny mpanatrika rehefa zoma, raha oharina amin’ny andro hafa. Ataovy tanjona àry ny hanatrika mandritra ny telo andro. Mampahery daholo mantsy ny zava-drehetra nomanin’ny fandaminan’i Jehovah ho antsika mandritra ireo andro ireo! Raha mila mangataka andro tsy iasana ianao, dia resaho amin’i Jehovah izany. ‘Misikìna herim-po’ avy eo, ary miresaha amin’ny mpampiasa anao, raha vao fantatrao ny datin’ny fivoriambe. (1 Tes. 2:2; Neh. 2:4, 5) Tsara ny hanazavanao aminy fa anisan’ny fanompoanao an’Andriamanitra ny fanatrehanao fivoriambe isan-taona. Raha manao izany aloha be ianao, dia ho mora kokoa amin’ny mpampiasa anao ny handamina ny asa, ka hanaiky ny fangatahanao izy.
4. Ahoana no azontsika anasana ny olona ampianarintsika Baiboly sy ny havantsika tsy Vavolombelona mba hanatrika fivoriambe?
4 Fomba anasana ny olona ampianarina Baiboly sy ny havana: Azo inoana fa ho faly tokoa ianao raha miara-manatrika fivoriambe aminao ny olona ampianarinao Baiboly! Izy ireo mihitsy amin’izay no hahatsapa fa mifankatia tokoa isika eo anivon’ilay “fiangonan-dehibe.” (Sal. 22:25) Ilazao mialoha be izy ireo mba hahafahany handamina ny fotoanany. Resaho aminy izay tena mahafinaritra anao rehefa manatrika fivoriambe. Ampahafantaro azy ny zavatra ho hitany any. Azonao ampiasaina ny bokikely Takina, Lesona faha-14, fehintsoratra fahadimy. Lazao amin’ny havanao tsy Vavolombelona koa ilay fivoriambe. Mety ho afaka hijery an’ilay tantara an-tsehatra izy, na ho tonga amin’ny andro iray amin’ilay fivoriambe, fara faharatsiny.
5. Ahoana no ampisehoantsika fa malala-tanana araka ny atoron’ny 1 Timoty 6:18 isika?
5 Ampio ny rahalahinao sy ny anabavinao: Nanoro hevitra ny Kristianina manankarena ny apostoly Paoly mba “hanao soa, sy hanankarena amin’ny asa tsara, ho tia manome, ho vonon-kizara.” (1 Tim. 6:17, 18) Asehontsika fa malala-tanana araka ny natoron’i Paoly isika, raha mitady fomba hanampiana ny hafa mba hahafahany hanatrika fivoriambe. Ampio ny zokiolona, kilemaina, mpanompo manontolo andro, fianakaviana tsy misy afa-tsy ray na reny, na ny olon-kafa. Marina fa ny havany ao amin’ny fahamarinana no manana andraikitra voalohany hanampy azy ireny. Afaka mandinika izay ilain’izy ireny anefa ny anti-panahy sy ny olon-kafa, ka hanampy azy raha mila izany izy.—Gal. 6:10; 1 Tim. 5:4.
6, 7. a) Inona avy no fanomanana natao ho fandraisana antsika? b) Ahoana no ampisehoantsika fa mankasitraka ny asa rehetra natao ho fikarakarana antsika isika? (Vakio ny Hebreo 13:17.)
6 Araho ny toromarika rehetra: Rehefa tonga eny amin’ny fivoriambe isika, dia voamaritsika fa be dia be ny asa natao, ho fanomanana ny fandraisana antsika. Misy rahalahy be fitiavana nasaina hikarakara ny mpanatrika. Miarahaba antsika tonga soa izy ireo, manome antsika fandaharana, ary manampy antsika hahita toerana. Efa nanadio an’ilay toerana anaovana ny fivoriambe koa ireo rahalahy sy anabavintsika, ary nanamboatra ny sehatra mba ho tsara tarehy. Ankoatra izany, dia nisy asa tena lehibe natao nefa tsy hitantsika, toy ny fanomanana ireo anjara sy ny filasiana ary ny zavatra maro hafa.
7 Efa am-bolana maromaro ny olona sasany no miasa mafy mba hikarakarana ny zavatra ilaina amin’ny fivoriambe iray. Azo lazaina hoe manampy azy ny fianakaviany, satria mamela azy hanao izany asa tena lehibe izany. Mandray soa ny tsirairay avy amintsika noho ny fahafoizan-tenan’izy ireo, ka tena mendrika ny hankasitrahantsika izany. Asehontsika fa mahay mankasitraka isika, raha manaraka ireo toromarika ato amin’ity lahatsoratra ity, sy ny toromarika hafa mety ho azontsika alohan’ny fivoriambe. (Heb. 13:17) Ho vita “amim-pahamendrehana sy amim-pilaminana” ny zava-drehetra, raha vonona hanaraka toromarika ny tsirairay.—1 Kor. 14:40.
8. a) Nahoana no tena mila miara-mivory ny vahoakan’i Jehovah ankehitriny? b) Inona no azontsika tsirairay atao dieny izao?
8 Vao mainka mila miara-mivory ny vahoakan’Andriamanitra ankehitriny, satria “manakaiky ny andro.” (Heb. 10:25) Manome fampianarana hanampy antsika “hanaraka ny teny rehetra” avy amin’i Jehovah ny mpanompo mahatoky sy malina, any amin’ny fivoriamben’ny vondrom-paritra. (Deot. 31:12) Miomàna dieny izao àry hanatrika mandritra ny telo andro, amin’ilay Fivoriamben’ny Vondrom-paritra “Araho ny Dian’i Kristy!” Handray soa avy amin’ny fampianarana rehetra omen’i Jehovah ianao amin’izay, sady hifampahery amin’ireo mpiray finoana aminao!
[Efajoro, pejy 3]
Fandaharam-potoana
Zoma sy asabotsy
9.20 maraina - 5.05 hariva
Alahady
9.20 maraina - 4.10 hariva