Sarobidy ny Fanompoantsika
1. Ahoana no fiheveran’ny olona maro ny asa fitoriana ataontsika?
1 Olona maro eto amin’ity tontolo ity no mihevitra fa “hadalana” ny asa fitoriana ataontsika. (1 Kor. 1:18-21) Mety hahatonga antsika ho kivy sy halaindaina izany fomba fihevitry ny olona izany, raha tsy mitandrina isika. (Ohab. 24:10; Isaia 5:20) Voninahitra lehibe anefa ny hoe Vavolombelon’i Jehovah. Nahoana?—Isaia 43:10.
2. Nahoana no antsoina hoe “asa masina” ny fanompoantsika?
2 “Asa masina”: Nantsoin’ny apostoly Paoly hoe “asa masina” ny fanompoana. (Rom. 15:15, 16) Nahoana? Lasa “mpiara-miasa” amin’i Jehovah, ilay Andriamanitra “masina” isika, rehefa manao fanompoana, sady mandray anjara amin’ny fanamasinana ny anarany. (1 Kor. 3:9; 1 Pet. 1:15) Lafiny iray tena lehibe amin’ny fanompoantsika ny asa fitoriana, satria raisin’i Jehovah ho toy ny “sorona fiderana” izy io.—Heb. 13:15.
3. Nahoana no voninahitra lehibe ny mitory ny vaovao tsara?
3 Voninahitra lehibe ny mitory ny vaovao tsara, ary tombontsoa vitsy mpanana izany. Azo inoana fa faly be ny anjely raha ry zareo no nasaina nanao azy io, sady tena ho nataony tsara ilay asa. (1 Pet. 1:12) Isika olombelona tsy lavorary, izay oharina amin’ny “vilany tany”, anefa no nofidin’i Jehovah homena an’io tombontsoa lehibe io!—2 Kor. 4:7.
4. Inona no hataontsika raha sarobidy amintsika ny fanompoana?
4 Zava-dehibe: Anisan’ny tena “zava-dehibe” eo amin’ny fiainantsika ny fanompoana. (Fil. 1:10) Sarobidy amintsika izy io, ka efa atokantsika mihitsy ny fotoana hanaovana azy isan-kerinandro. Raha zava-dehibe amin’ny mpitendry zavamaneno ny hoe milalao amin’ny orkesitra malaza iray, dia hanomana foana izy isaky ny misy fampisehoana hatao. Hiezaka hanatsara ny fahaizany koa izy. Hanomana koa isika isaky ny handeha hanompo, mba ho afaka ‘hanazava ny tenin’ny fahamarinana amin’ny fomba marina tsara.’ Ary hiezaka isika hanatsara ny ‘fahaizantsika mampianatra.’—2 Tim. 2:15; 4:2.
5. Iza no mankasitraka ny fanompoantsika?
5 Aza kivy na tsy mandray aza ny ankamaroan’ny olona. Tadidio fa mbola maro no mankasitraka ny fitoriantsika. Tsy ny fankasitrahan’ny olona anefa no tena tadiavintsika. Mbola zava-dehibe lavitra ny fankasitrahan’i Jehovah, ary tena sarobidy aminy ny ezaka mafy ataontsika.—Isaia 52:7.