Fivoriana Alohan’ny Fanompoana Tena Andraisan-tsoa
1. Inona no tanjona amin’ny fivoriana alohan’ny fanompoana?
1 Novorin’i Jesosy ny mpianany 70, talohan’ny nandehanan’izy ireo nitory. (Lioka 10:1-11) Nampahery azy ireo izy, ka nampahatsiahy hoe tsy irery izy ireo ary mitari-dalana azy ireo foana i Jehovah, ilay “Tompon’ny vokatra.” Nomeny toromarika hanampy azy ireo hanao an’ilay asa koa izy ireo, sady nalaminy “tsiroaroa.” Izany koa no tanjona amin’ny fivoriana alohan’ny fanompoana ankehitriny. Natao mba hampaherezana sy hanampiana ary handaminana tsara antsika izy io.
2. Tokony ho firy minitra ny fivoriana alohan’ny fanompoana?
2 Folo ka hatramin’ny 15 minitra ny fivoriana alohan’ny fanompoana, hatramin’izay, ka tafiditra amin’izany ny fizarana ny namana sy ny fanendrena ny faritany ary ny vavaka. Hiova anefa izany manomboka amin’ny Aprily. Ho lasa dimy ka hatramin’ny fito minitra ny faharetany. Tokony ho fohy kokoa aza ilay izy, raha atao aorian’ny fivorian’ny fiangonana. Efa avy nandinika hevitra mampahery tao amin’ny Baiboly mantsy ny mpanatrika. Hanam-potoana bebe kokoa hanompoana ny rehetra, raha fohy ny fivoriana alohan’ny fanompoana. Raha efa nitory koa ny mpisava lalana na ny mpitory talohan’ilay izy, dia mba vetivety ihany no tapaka ny orany.
3. Ahoana no handaminana ny fivoriana alohan’ny fanompoana mba hahatonga ny mpitory tena handray soa?
3 Tokony ho voalamina tsara ny fivoriana alohan’ny fanompoana, amin’izay ny mpitory tena handray soa. Any amin’ny fiangonana maro, dia tsara kokoa raha samy manao fivoriana alohan’ny fanompoana ny andia-mpitory. Ho mora amin’ny mpitory amin’izay ny hamonjy an’ilay izy sy hankany amin’ny faritany. Ho voazara haingana koa ny mpitory, ary tsy ho sarotra amin’ny mpiandraikitra ny andia-mpitory ny hanampy azy ireo. Afaka miara-midinika ny anti-panahy rehetra hoe inona no tena mety amin’ny fiangonana. Tokony hahalala ny faritany sy hahazo namana daholo ny mpitory, alohan’ny hamaranana an’ilay fivoriana amin’ny vavaka.
4. Nahoana ny fivoriana alohan’ny fanompoana no tokony hoheverina ho zava-dehibe toy ny fivoriana hafa?
4 Zava-dehibe toy ny fivoriana hafa: Natao ho an’izay handeha hanompo ny fivoriana alohan’ny fanompoana. Tsy ny rehetra eo anivon’ny fiangonana àry no mety hanatrika azy io. Tsy tokony hohamaivanina anefa izy io, na hoheverina ho tsy zava-dehibe noho ny fivoriana hafa. Fandaharana nataon’i Jehovah izy io mba hahatonga antsika hifandrisika ho amin’ny fitiavana sy ny asa tsara, toy ny fivoriana rehetra ihany. (Heb. 10:24, 25) Tokony hanomana tsara àry ny mpitarika, mba hanome voninahitra an’i Jehovah ilay dinidinika, ary handray soa ny mpanatrika. Raha mbola azo atao, dia tokony hiezaka hanatrika azy io ny mpitory rehefa hanompo.
Tsy tokony hohamaivanina ny fivoriana alohan’ny fanompoana, na hoheverina ho tsy zava-dehibe noho ny fivoriana hafa
5. a) Inona no andraikitry ny mpiandraikitra ny fanompoana rehefa mandamina fivoriana alohan’ny fanompoana? b) Ahoana no ataon’ny anabavy rehefa mitarika fivoriana alohan’ny fanompoana?
5 Fanomanana ataon’ny mpitarika: Raha misy olona manana anjara any am-pivoriana, dia tokony ho fantany mialoha izany mba hahafahany manomana tsara. Toy izany koa ny fivoriana alohan’ny fanompoana. Mazava ho azy fa raha samy manao ny azy ny andia-mpitory, dia ny mpiandraikitra ny andia-mpitory na ny mpanampy azy no mitarika an’ilay izy. Raha miara-manao fivoriana alohan’ny fanompoana anefa ny fiangonana, dia hanendry olona hitarika an’ilay izy ny mpiandraikitra ny fanompoana. Misy amin’izy ireo, ohatra, manamboatra fandaharana, ary omeny iray avy ny mpitarika rehetra. Asiany iray koa eo amin’ny tabilao misy ny filazana. Mila mieritreritra tsara izy ireo rehefa hanendry olona hitarika, satria raha tiana ho tsara ilay fivoriana dia tokony hahay hampianatra sy handamin-javatra ny mpitarika. Mety tsy ho afaka indraindray ny anti-panahy, na ny mpanampy amin’ny fanompoana, na ny rahalahy vita batisa hafa mahafeno fepetra. Tokony hanendry anabavy mahay efa vita batisa àry ny mpiandraikitra ny fanompoana mba hitarika an’ilay fivoriana.—Jereo ilay hoe “Raha Anabavy no Tsy Maintsy Mitarika.”
6. Nahoana no mila manomana tsara ny mpitarika?
6 Rehefa mahazo anjara amin’ny Sekolin’ny Fanompoana na Fivoriana Momba ny Fanompoana isika, dia raisintsika ho zava-dehibe izany ary manomana tsara isika. Vitsy amintsika no hiandry hoe efa eny an-dalana hivory vao hieritreritra an’izay holazaina. Tokony ho toy izany koa isika raha voatendry hitarika fivoriana alohan’ny fanompoana. Tena ilaina ny manomana tsara satria efa ho fohy ilay izy. Ho vita amin’ny fomba tsara sy ara-potoana ilay izy amin’izay. Tafiditra amin’ny fanomanana koa ny hoe efa fantatra mialoha ny faritany.
7. Inona avy no azon’ilay mpitarika resahina?
7 Inona no horesahina? Miovaova arakaraka ny faritany ny zava-misy, ka tsy nanome drafitra ho an’ny fivoriana alohan’ny fanompoana tsirairay ny mpanompo mendri-pitokisana. Misy soso-kevitra azo ampiharina ao amin’ilay efajoro hoe “Zavatra Azo Dinihina Amin’ny Fivoriana Alohan’ny Fanompoana.” Matetika no atao fiaraha-midinika ilay fivoriana. Azo asiana fampisehoana voaomana tsara ilay izy indraindray, na fampisehoana video avy ao amin’ny jw.org. Rehefa manomana ilay mpitarika, dia tokony hoeritreretiny hoe inona no hampahery sy hanampy an’ireo handeha hanompo amin’io andro io.
Rehefa manomana ilay mpitarika, dia tokony hoeritreretiny hoe inona no hampahery sy hanampy an’ireo handeha hanompo amin’io andro io
8. Inona avy no tsara resahina amin’ny fivoriana alohan’ny fanompoana, rehefa asabotsy sy alahady?
8 Manolotra gazety ny ankamaroan’ny mpitory rehefa asabotsy. Maro amin’izy ireo no tsy manompo rehefa andavanandro, ka mety tsy ho tadidiny ny fomba fitory efa nanaovany fanazaran-tena tamin’ny Fotoam-pivavahan’ny Fianakaviana. Mety ho tsara àry raha mamerina an’ireo fomba fitory modely ao amin’ny faran’ny Fanompoantsika Ilay Fanjakana ilay mpitarika. Azony resahina koa hoe ahoana no ampifanarahana ny fanolorana gazety amin’ny vaovao teo an-toerana, na zava-nitranga hafa, na fety. Azo dinihina koa ny fomba hiverenana any amin’ilay olona raha mandray gazety izy. Raha efa nisy mpitory nametraka an’ireo gazety atolotra mandritra ny volana, dia afaka manontany soso-kevitra amin’izy ireo ilay mpitarika na manasa azy ireo hitantara zavatra mampahery. Mety hanao toy izany koa izy raha hiresaka ny zavatra atolotra amin’ny volana, rehefa alahady. Azo atolotra amin’ny fotoana rehetra ny fitaovana fianarana Baiboly, toy ny bokikely Vaovao Tsara sy Mihainoa An’Andriamanitra ary ny boky Ampianarina. Azo dinihina vetivety àry ny fomba fanolorana an’ireo.
9. Inona no azo dinihina amin’ny faran’ny herinandro, raha manao ezaka manokana ny fiangonana?
9 Raha manao ezaka manokana ny fiangonana amin’ny faran’ny herinandro, dia azon’ny mpitarika resahina hoe ahoana no azo anolorana gazety miaraka amin’ilay fanasana na taratasy mivalona. Azony resahina koa hoe ahoana no hatao raha liana ilay olona. Afaka milaza fitantarana koa izy, izay mampiseho fa tena zava-dehibe ireny ezaka manokana ireny.
10, 11. Nahoana no mila manomana ny mpitory mba hahomby ny fivoriana alohan’ny fanompoana?
10 Fanomanana ataon’ny mpitory: Mila mandray anjara koa ny mpitory mba hahomby ilay fivoriana alohan’ny fanompoana. Tokony hanomana tsara izy ireo, ohatra hoe amin’ny Fotoam-pivavahan’ny Fianakaviana. Amin’izay izy ireo hanan-javatra horesahina amin’ny mpitory hafa. Tokony ho efa manana boky sy gazety koa izy ireo alohan’ny hanatrehana fivoriana alohan’ny fanompoana. Ho afaka hamonjy faritany avy hatrany ny rehetra amin’izay.
11 Zava-dehibe koa ny hoe tonga minitra vitsivitsy mialoha, rehefa hanatrika fivoriana alohan’ny fanompoana. Azo antoka fa miezaka ny tsy ho tara isika rehefa hanatrika fivoriana. Tena mety hanelingelina ny hafa anefa isika raha tara amin’ny fivoriana alohan’ny fanompoana. Nahoana? Betsaka ny zavatra dinihin’ilay mpitarika rehefa hizara ny mpitory izy. Raha vitsy, ohatra, ny mpitory, dia mety halefany any amin’ny faritany misy ampahany efa voasa. Raha be heloka bevava ilay faritany, dia mety hanendry rahalahy izy mba hiaraka amin’ny anabavy maromaro na tsy hiala lavitra azy ireo. Mety hasainy hitory eny amin’ny lalana tsy misy fiakarana na eny amin’ny trano tsy dia be tohatra ireo kilemaina na osa. Ny vaovao kosa mety hampiarahiny amin’ny za-draharaha. Matetika anefa no tsy maintsy amboarina na ovana tanteraka ilay fizarana raha misy mpitory tara. Mety ho antony lehibe no mahatara antsika indraindray. Raha zatra tara anefa isika, dia tokony handini-tena sao dia efa tsy zava-dehibe amintsika intsony ny fivoriana alohan’ny fanompoana, na isika no tsy mandamina tsara ny fotoanantsika.
12. Inona no tokony hataonao raha ianao matetika no mifidy ny namanao?
12 Afaka mifidy ny namany ny mpitory alohan’ny hanombohan’ilay fivoriana, na miaraka amin’izay namana homena azy. Raha ianao matetika no mifidy ny namanao, afaka mba “mihamalalaka” ve ianao ka hiaraka amin’ny mpitory isan-karazany fa tsy amin’ny mpitory iray foana? (2 Kor. 6:11-13) Afaka miaraka amin’ny mpitory vaovao ve ianao indraindray, mba hanampy azy hahay hampianatra kokoa? (1 Kor. 10:24; 1 Tim. 4:13, 15) Henoy tsara ny toromarika omena anao, anisan’izany ny hoe aiza ianao no hanomboka hitory. Aza ovana intsony ilay fizarana rehefa vita ny fivoriana, ary mandehana avy hatrany eny amin’ny faritany.
13. Inona no soa azontsika avy amin’ny fivoriana alohan’ny fanompoana, raha samy manao ny anjarany rehetra?
13 “Faly” ireo mpianatr’i Jesosy 70 rehefa avy nitory. (Lioka 10:17) Azo antoka fa nanampy azy ireo hahita vokatra ilay fivoriana nataon’i Jesosy niaraka tamin’izy ireo, talohan’ny nandehanan’izy ireo nitory. Mahasoa antsika koa ny fivoriana alohan’ny fanompoana ankehitriny. Raha samy manao ny anjarany ny rehetra, dia tena hampahery sy hanampy antsika izy io. Ho voalamina tsara koa isika ka ho vitantsika ny hitory any “amin’ny firenena rehetra.”—Mat. 24:14.