Hatsarao ny Fanompoanao: Mitoria eny Amin’ny Faritany Be Toeram-piasana

Nahoana izany no tena ilaina? Betsaka ny olona miasa foana. Matetika àry no tsara kokoa raha any am-piasana izy ireny no itoriantsika ny hafatra momba ilay Fanjakana. Mahafinaritra sady ahitam-bokatra ny mitory amin’ny faritany be toeram-piasana. Misy olona foana mantsy eny, ary matetika ry zareo no manaja an’izay olona tonga, satria heveriny hoe mpanjifa. Tokony hahay handanjalanja ny mpitory, ary hanao fitafiana sy taovolo mendrika. (2 Kor. 6:3) Tokony hojeren’ny mpiandraikitra ny fanompoana tsara àry hoe impiry no itoriana ny faritany be toeram-piasana, ary iza no mitory eny.

Ahoana no hanaovana azy?

Manomàna fomba fitory fohy. Mety tsy ho afaka hiresaka amin’ny mpiasa ao isika amin’ny manaraka, raha mitory ela be aminy.
Aleo rehefa tsy dia be olona iny no mankeny, ohatra hoe raha vao misokatra ilay toeram-piasana.
Miezaha aloha hiresaka amin’ny mpampiasa ao. Mitsikia ary miezaha ho tsara fanahy. Afaka miteny ianao hoe: “Mitsidika vetivety ny olona atỳ am-piasany izahay, satria sarotra ny mahita azy ireo any an-tranony.” Miresaha hevitra fohifohy, ary omeo taratasy mivalona, na gazety, na boky izy avy eo. Aza mangataka fanomezana, raha tsy hoe izy no manontany, sao heveriny fa mpivarotra boky ianao.
Raha tsara fanahy ilay mpampiasa, dia anontanio izy raha afaka miresaka kely amin’ny mpiasa hafa ianao. Any amin’ny toeram-piasana sasany, dia afaka manontany ianao raha mahazo mametraka boky na gazety vitsivitsy mba hovakin’ny mpiasa ao.
Mahaiza manavaka sy mandanjalanja. Miandrasa kely, ohatra, raha mbola mandray olona na sahirana ilay mpiasa.

Andramo izao amin’ity volana ity:

Rehefa manao Fotoam-pivavahan’ny Fianakaviana manaraka ianareo, dia anaovy fanazaran-tena ny fomba fitory iray azonao ampiasaina any amin’ny faritany be toeram-piasana.