Loharanon-kevitra ao Amin’ny Tari-dalana ho An’ny Fiainantsika sy ny Fanompoana
4-10 FEBROARY
HARENA AVY AO AMIN’NY TENIN’ANDRIAMANITRA | ROMANINA 1-3
“Ampiofano Foana ny Feon’ny Fieritreretanao”
Ahoana no Hanananao Feon’ny Fieritreretana Madio Foana?
6 Ny mpanompon’i Jehovah ihany ve no nomena feon’ny fieritreretana? Hoy ny apostoly Paoly: “Manao izay takin’ny lalàna ny olona hafa firenena tsy manana lalàna, satria voajanahary aminy izany. Koa isaky ny manao izany ireny olona ireny, dia efa lalàna ho an’ny tenany izy, na tsy manana lalàna aza. Ny tenany mihitsy no mampiseho fa voasoratra ao am-pony ny votoatin’ny lalàna, ary ny feon’ny fieritreretany koa no vavolombelona miaraka aminy, ka ny eritreriny ihany no miampanga azy na manala tsiny azy mihitsy aza.” (Romanina 2:14, 15) Toy ny vavolombelona ao anaty ny feon’ny fieritreretana. Mahatonga ny olona hanao zavatra mifanaraka amin’ny toro lalan’i Jehovah izy io indraindray, na dia tsy mahalala ny lalàny aza ilay olona.
Ahoana no Hanananao Feon’ny Fieritreretana Madio Foana?
8 Baikoin’ny eritreriny sy ny fihetseham-pony fotsiny ny olona sasany, rehefa manapa-kevitra. Mety hiteny izy avy eo hoe: “Tsy manenjika ahy ny eritreritro.” Mety hitarika ny olona ho amin’ny lalan-diso anefa ny feon’ny fieritreretany, rehefa tena mafy ny fanirian’ny fony. Hoy ny Baiboly: “Mamitaka mihoatra noho ny zava-drehetra ny fo, sady sarotra fehezina. Iza no mahalala ny aminy?” (Jeremia 17:9) Izay hampifaly an’i Jehovah Andriamanitra àry no zava-dehibe indrindra tokony hoheverintsika, fa tsy ny fanirian’ny fontsika.
9 Hahay hanapa-kevitra isika, raha voavolavola tsara ny feon’ny fieritreretantsika ary mankatò azy io isika. Ho hita amin’izay hoe matahotra an’i Jehovah isika, fa tsy manao izay tiantsika fotsiny. Nanan-jo hitaky hetra tamin’ny mponin’i Jerosalema, ohatra, i Nehemia Governora. Tsy nanao izany anefa izy. Tsy tiany mantsy na dia ny nieritreritra fotsiny aza hoe tsy hankasitrahan’i Jehovah izy raha nampijaly ny vahoakany. Hoy izy: ‘Tsy mba nanao toy izany aho satria natahotra an’Andriamanitra.’ (Nehemia 5:15) Tena mila matahotra an’Andriamanitra koa isika, izany hoe matahotra mafy sao tsy hankasitrahany. Handrisika antsika hitady tari-dalana ao amin’ny Teniny izany, isaky ny hanapa-kevitra isika.
Andao Hikaroka Harena Miafina
Hevitra Misongadina ao Amin’ny Taratasy ho An’ny Romanina
3:4. Rehefa mifanohitra ny tenin’ny olona sy ny Tenin’Andriamanitra, dia ekentsika fa ‘Andriamanitra no marina.’ Matoky izay voalazan’ny Baiboly àry isika, ka manao ny sitrapon’Andriamanitra. Rehefa mazoto mitory sy mampianatra isika, dia manampy ny hafa hahita fa Andriamanitra no marina.
Hevitra Misongadina ao Amin’ny Taratasy ho An’ny Romanina
3:24, 25—Nahoana no voavela ny ‘fahotan’ny [olona] fahiny’, noho ny “vidim-panavotana”, nefa tatỳ aoriana izy io vao “naloan’i Kristy Jesosy”? Tanteraka tamin’ny taona 33 ny faminaniana voalohany momba ny Mesia ao amin’ny Genesisy 3:15, rehefa maty teo amin’ny hazo fijaliana i Jesosy. (Gal. 3:13, 16) Toy ny efa voaloa anefa ny vidim-panavotana, raha vao nilaza an’io faminaniana io i Jehovah. Tsy maintsy tanteraka mantsy ny fikasany. Afaka mamela ny fahotan’ireo taranak’i Adama izay mino ny fampanantenany àry izy, noho ny sorona hataon’i Jesosy Kristy. Azony hatsangana amin’ny maty koa ireo mpanompony fahiny, noho io sorona io.—Asa. 24:15.
Famakiana Baiboly
11-17 FEBROARY
HARENA AVY AO AMIN’NY TENIN’ANDRIAMANITRA | ROMANINA 4-6
“Andriamanitra Naneho ny Fitiavany Antsika”
Naneho Fitiavana Tamintsika Andriamanitra
5 Hoy i Paoly: ‘Avy tamin’ny olona iray no nidiran’ny ota ho amin’izao tontolo izao, ary avy tamin’ny ota no nidiran’ny fahafatesana, ka niely tamin’ny olona rehetra ny fahafatesana, satria samy efa nanota izy rehetra.’ (Rom. 5:12) Afaka mahatakatra ny dikan’ireo teny ireo isika, satria nasain’Andriamanitra nosoratana ny fiandohan’ny tantaran’ny olombelona. Namorona olona roa i Jehovah, dia i Adama sy Eva. Lavorary ny Mpamorona, ary lavorary koa ireo razambentsika ireo. Zavatra iray monja no nandraran’Andriamanitra azy mivady, ary nilaza izy fa ho faty izy ireo raha tsy mankatò. (Gen. 2:17) Nifidy ny tsy hankatò anefa izy ireo, na dia tsy nitaky be loatra taminy aza Andriamanitra. Hita tamin’izany fa tsy neken’izy ireo hoe i Jehovah no Mpanome Lalàna sy Mpanjaka.—Deot. 32:4, 5.
Naneho Fitiavana Tamintsika Andriamanitra
6 Efa nanota i Adama vao nanan-janaka. Noho izany, dia namindra ny ota sy ny vokatr’izy io tamin’ny taranany rehetra izy. Marina fa tsy ninia nandika ny lalàn’Andriamanitra toa an’i Adama ny taranany. Tsy nanao fahotana toy ny an’i Adama izy ireo. Mbola tsy nisy fehezan-dalàna koa tamin’izany. (Gen. 2:17) Na izany aza, dia nandova ota ny taranak’i Adama. Nanjaka àry ny ota sy ny fahafatesana nanomboka tamin’izay. Nitohy foana izany na dia taorian’ny nanomezan’Andriamanitra fehezan-dalàna ho an’ny Israelita aza, fehezan-dalàna izay nampiseho tsara fa mpanota izy ireo. (Vakio ny Romanina 5:13, 14.) Azo oharina amin’ny aretina manaranaka ny fahotana. Mahafaty ny sasany amin’izy ireny. Ny hany tsy mampitovy azy fotsiny dia hoe tsy voatery ho voan’ilay aretina avokoa ny zanak’ilay ray aman-dreny marary. Ny taranak’i Adama kosa mandova ota avokoa, ka miafara amin’ny fahafatesana daholo. Inona àry no vahaolana?
Naneho Fitiavana Tamintsika Andriamanitra
9 Inona no dikan’ilay teny grika nadika hoe ‘ambara ho marina’, ao amin’ny Romanina 5:16, 18? Manazava ny mpandika Baiboly iray hoe zava-mitranga eny amin’ny fitsarana no tonga ao an-tsaina rehefa mamaky an’ilay teny hoe ‘ambara ho marina.’ Toy ny voampanga miakatra fitsarana ny olombelona mpanota, ary Andriamanitra no mpitsara. Na dia mbola mpanota aza ny olona, dia ambaran’Andriamanitra ho marina, izany hoe nafahany madiodio. Tsy hoe ny olona akory no niova fa ny fiheveran’Andriamanitra azy.
10 Nahoana moa ilay “Mpitsara ny tany manontolo”, izay manao ny marina, no afaka manafaka madiodio ny olona tsy marina? (Gen. 18:25) Satria noho ny fitiavany, dia naniraka ny Zanany lahitokana ho etỳ an-tany izy. Nohambaniana be io Zanany io, niharan’ny fakam-panahy, ary nampijalina. Nanao ny sitrapon’ny Rainy foana anefa izy, ary nataony tamin’ny fomba tonga lafatra izany. Tsy nivadika mihitsy izy na dia novonoina teo amin’ny hazo fijaliana aza. (Heb. 2:10) Rehefa nanao sorona ny ainy lavorary àry i Jesosy, dia nanome ny vidim-panavotana, izay afaka manafaka ny taranak’i Adama amin’ny ota sy ny fahafatesana.—Mat. 20:28; Rom. 5:6-8.
Andao Hikaroka Harena Miafina
Hevitra Misongadina ao Amin’ny Taratasy ho An’ny Romanina
6:3-5—Inona no dikan’ny hoe batisa ho amin’i Kristy Jesosy sy batisa ho amin’ny fahafatesany? Tafaray amin’i Jesosy ny mpanara-dia azy, rehefa nohosoran’i Jehovah tamin’ny fanahy masina. Lasa anisan’ny fiangonana, izay vatan’i Kristy izy ireo, ka izy no Lohany. (1 Kor. 12:12, 13, 27; Kol. 1:18) Natao batisa ho amin’ny Kristy Jesosy izy ireo tamin’izany. ‘Atao batisa ho amin’ny fahafatesan’i Kristy’ koa ny voahosotra. Mahafoy tena mantsy izy ireo eo amin’ny fiainany manontolo, ary afoiny tanteraka ny fanantenana hiaina mandrakizay eto an-tany. Toy ny hoe manao sorona ny ainy koa izy ireo, toa an’i Jesosy, saingy tsy afaka manavotra ny hafa. Vita tanteraka ilay batisa ho amin’ny fahafatesan’i Kristy, rehefa maty izy ireo ka hatsangana ho any an-danitra.
Nankaiza Ireny Razambentsika Ireny?
Ny zavatra nataony taloha ve no hitsarana ny olona tsy marina rehefa hatsangana izy ireo? Tsia, satria milaza ny Romanina 6:7 fa “izay maty dia afaka madiodio amin’ny fahotany.” Efa nahonitra ny ratsy nataony ny olona tsy marina rehefa maty. Tsy izay nataony tamin’izy mbola velona àry no hitsarana azy, satria mbola tsy nahalala izy tamin’izany. Hotsaraina arak’izay hataony aorian’ny hananganana azy kosa izy ireo. Inona no soa ho azony avy amin’izany?
Famakiana Baiboly
18-24 FEBROARY
HARENA AVY AO AMIN’NY TENIN’ANDRIAMANITRA | ROMANINA 7-8
“‘Miandry Fatratra’ ve Ianao?”
Omen’i Jehovah Tena Fahafahana Isika
17 Homen’i Jehovah fahafahana hafa koa ny mpanompony eto an-tany amin’ny hoavy. Hoy i Paoly momba izany: “Ny zavaboary dia miandry fatratra ny fampiharihariana an’ireo zanak’Andriamanitra. ... Ny zavaboary koa dia hafahana amin’ny fanandevozan’ny fahalovana, ka hanana ny fahafahana be voninahitr’ireo zanak’Andriamanitra.” (Rom. 8:19-21) Ireo olona hiaina eto an-tany no antsoina hoe “zavaboary” eo, izany hoe ireo olona handray soa avy amin’ny “fampiharihariana” an’ireo zanak’Andriamanitra voahosotry ny fanahy. Hanomboka izany fampiharihariana izany, rehefa lasa any an-danitra ireo voahosotra, ka hiara-miasa amin’i Kristy handringana ny ratsy fanahy, ary hamonjy an’ireo “vahoaka be” hiaina eto an-tany.—Apok. 7:9, 14.
Mahafaly ny Fanantenantsika!
11 Nanome fanantenana ho an’ny olombelona i Jehovah, rehefa nampanantena fa hanafaka ny olona amin’ilay “menarana tany am-boalohany”, dia i Satana Devoly. Hanao an’izany amin’ny alalan’ilay ‘taranaka’ nampanantenaina izy. (Apok. 12:9; Gen. 3:15) I Jesosy Kristy no lehibe indrindra amin’io ‘taranaka’ io. (Gal. 3:16) Rehefa maty sy natsangana izy, dia afaka nanantena ho afaka amin’ny ota sy ny fahafatesana ny olombelona. Hanomboka ho tanteraka tsikelikely io fanantenan’ny olombelona io, rehefa ‘haharihary ireo zanak’Andriamanitra’, izany hoe ireo voahosotra, izay anisan’ilay ‘taranaka’ koa. Haharihary ireo zanak’Andriamanitra ireo, rehefa hiaraka amin’i Kristy izy ireo handrava ny tontolon’i Satana. (Apok. 2:26, 27) Ho voavonjy kosa ireo vahoaka be anisan’ny ondry hafa, vokatr’izany.—Apok. 7:9, 10, 14.
Mahafaly ny Fanantenantsika!
12 Hitondra fanafahana ho an’ny “zavaboary”, izany hoe ho an’ny olombelona, ny Fanjakana Arivo Taonan’i Kristy. Mbola ‘haharihary’ amin’ny fomba hafa ireo “zanak’Andriamanitra” amin’izay fotoana izay. Hanao ny asan’ny mpisorona miaraka amin’i Kristy mantsy izy ireo, ka hanampy ny olombelona handray soa amin’ny sorom-panavotana. Hafahana tsikelikely amin’ny “fanandevozan’ny fahalovana” ny olombelona mankatò, eo ambanin’ny fitondran’ilay Fanjakana. Hafahana amin’ny vokatry ny ota sy ny fahafatesana izy ireo. Ho voasoratra mandrakizay ao amin’ny “horonam-bokin’ny fiainana” ny anaran’izy ireo, raha tsy mivadika amin’i Jehovah izy ireo mandritra ilay Fanjakana Arivo Taona, sy mandritra ilay fitsapana amin’ny faran’ny Arivo Taona. (Apok. 20:7, 8, 11, 12) Hanana ny “fahafahana be voninahitr’ireo zanak’Andriamanitra” izy ireo aorian’izay. Fanantenana mahafinaritra tokoa izany!
Andao Hikaroka Harena Miafina
Tadidinao Ve?
Inona no tsy itovizan’ny hoe ‘mampifantoka ny saina amin’ny nofo’ sy ny hoe ‘mampifantoka ny saina amin’ny fanahy’? (Rom. 8:6)
Ilay voalohany midika hoe manaiky hobaikoin’ny fanirian-dratsy ary mieritreritra be an’izany foana, dia izay no ambentin-dresaka. Ho faty izay manao an’izany. Ilay faharoa indray midika hoe mifantoka amin’ny fanompoana an’i Jehovah, ka ny fanahin’i Jehovah no tena avela hanan-kery eo amin’ny fomba fisainana, ary miezaka mba hitovy hevitra aminy. Hiaina mandrakizay sy hiadana kosa izay manao an’izany.—w16.12, p. 15-17.
Inona no Hita avy Amin’ny Vavaka Ataonao?
20 Tsy mahita holazaina isika indraindray, rehefa mivavaka mitokana. Hoy i Paoly: “Izao mantsy no olana: Tokony hivavaka isika nefa tsy fantatsika akory izay tokony hangatahintsika. Miangavy ho antsika anefa ny fanahy [masina] rehefa mitoloko ao am-po tsy miloaka isika. Fa fantatr’ilay mpandinika ny fo izay lazain’ny fanahy.” (Rom. 8:26, 27) Misy vavaka maro nasain’i Jehovah nosoratana ao amin’ny Baiboly. Rehefa tsy mahita holazaina isika, dia raisiny ho toy ny hoe avy amintsika izy ireny, ary tanterahiny. Fantany mantsy izay ilaintsika, ary fantany koa izay nasainy nampitain’ny fanahy masina tao amin’ny Teniny. Mamaly antsika àry izy, satria efa “miangavy” ho antsika ny fanahy masina. Tsara anefa raha miezaka mamaky bebe kokoa ny Teniny isika, mba ho mora amintsika ny hahita zavatra holazaina.
Famakiana Baiboly
25 FEBROARY–3 MARTSA
HARENA AVY AO AMIN’NY TENIN’ANDRIAMANITRA | ROMANINA 9-11
“Ilay Fanoharana Momba ny Hazo Oliva”
‘Lalina Tokoa ny Fahendren’Andriamanitra!’
13 Noharin’i Paoly tamin’ny sampana hazo oliva ireo ho anisan’ny taranak’i Abrahama. (Rom. 11:21) Sary mampiseho ny fomba anatanterahan’i Jehovah ny fikasany ilay hazo oliva, dia ilay fikasany mifandray amin’ny fifanekena nataony tamin’i Abrahama. Masina ny fakan’ilay hazo. Manondro an’i Jehovah io faka io, satria izy no nampisy ny Israely ara-panahy. (Isaia 10:20; Rom. 11:16) Manondro an’i Jesosy ny vatan’ilay hazo satria izy no lehibe indrindra amin’ilay taranak’i Abrahama. Mifanitsy amin’ireo olon-kafa anisan’ilay taranaka kosa ny sampan’ilay hazo.
‘Lalina Tokoa ny Fahendren’Andriamanitra!’
15 Inona àry no nataon’i Jehovah mba hanatanterahana ny fikasany? Nohazavain’i Paoly fa nalaina ny sampan-kazo avy tamin’ny hazo olivadia iray ary natao grefy teo amin’ilay hazo oliva nambolena, mba hanoloana an’ireo sampany notapahina. (Vakio ny Romanina 11:17, 18.) Toy ny hoe natao grefy teo amin’ilay hazo oliva nambolena àry ireo Kristianina voahosotra hafa firenena, anisan’izany ireo teo anivon’ny fiangonana tany Roma. Lasa anisan’ny taranak’i Abrahama izy ireo, vokatr’izany. Toy ny sampan-kazo tamin’ny olivadia izy ireo tamin’ny voalohany, satria tsy tafiditra tamin’ilay fifanekena natao tamin’i Abrahama. Nosokafan’i Jehovah anefa ny lalana ahafahan’izy ireo ho tonga Jiosy ara-panahy.—Rom. 2:28, 29.
‘Lalina Tokoa ny Fahendren’Andriamanitra!’
19 Mahatalanjona tokoa ny fomba anatanterahan’i Jehovah ny fikasany mahakasika ny “Israelin’Andriamanitra.” (Gal. 6:16) Nilaza i Paoly hoe: ‘Hovonjena ny Israely rehetra.’ (Rom. 11:26) Amin’ny fotoana voatondron’i Jehovah, dia ho lasa mpanjaka sy mpisorona any an-danitra ny “Israely rehetra”, izany hoe ny Israelita ara-panahy rehetra. Tsy hisy hahasakana izany fikasan’i Jehovah izany!
Andao Hikaroka Harena Miafina
Avelao Hamolavola Anao i Jehovah, ka Ekeo ny Fananarany
5 Ahoana anefa no ataon’ilay Mpanefy Tanimanga Lehibe, rehefa miziriziry tsy mety hovolavolainy ny olona? Ahoana no ampiasany ny fahefany? Eritrereto indray ny ataon’ny mpanefy tanimanga rehefa tsy mety tafavoakany araka ny itiavany azy ilay tanimanga. Ovany zavatra hafa indray ilay izy, na ariany fotsiny. Rehefa tsy azo atao na inona na inona ilay tanimanga, dia matetika no fahadisoan’ilay nanefy azy izany. Tsy mba mety diso kosa ilay Mpanefy Tanimanga Lehibe. (Deot. 32:4) Raha tsy mety hovolavolainy ny olona iray, dia ilay olona foana no diso, fa tsy izy. Ahoana àry no ataon’i Jehovah rehefa mamolavola olona iray izy, nefa tsy manaiky ilay olona? Ovany indray ny fomba amolavolany azy, arakaraka izay ataon’ilay olona. Handray soa ilay olona amin’izay raha mankatò. Toy izany ny Kristianina voahosotra izay antsoina hoe “fanaky ny famindram-po.” Lasa ‘zavatra hohajaina’ izy ireo satria manaiky hovolavolaina. Mifanohitra amin’izany kosa anefa ny olona miziriziry tsy mankatò. Ho lasa “fanaky ny fahatezerana” izy ireo ary “mendrika haringana.”—Rom. 9:19-23.
it “Saro-piaro, Fahasarotam-piaro”: “Hafanam-po diso toerana”
Saro-piaro, Fahasarotam-piaro
Hafanam-po diso toerana. Mety hisy olona hafana fo na ho saro-piaro amin-javatra iray, ary amim-pahatsorana tanteraka no hanaovany izany, nefa tsy ankasitrahan’Andriamanitra izy ary diso eo anatrehany. Nitandrina ny Lalàn’i Mosesy, ohatra, ny Jiosy maro tamin’ny taonjato voalohany mba ho azo ambara hoe marina. Nilaza anefa i Paoly fa hafanam-po diso toerana ny azy ireo satria tsy araka ny fahalalana marina tsara. Tsy nanambara azy ireo ho marina àry Andriamanitra. Tsy maintsy niaiky izy ireo fa diso, ary tsy maintsy niverina tamin’Andriamanitra tamin’ny alalan’i Kristy mba hanambarana azy ho marina sy hanafahana azy tamin’ny fanamelohan’ny Lalàna. (Ro 10:1-10) Tena nafana fo tamin’ny Fivavahana Jiosy, ohatra, i Saoly avy any Tarsosy, ka tafahoatra loatra ‘ny nanenjehany sy ny nandravany ny fiangonan’Andriamanitra.’ ‘Hita fa tsy nanan-tsiny’ izy, raha ny fankatoavana an-tsakany sy an-davany ny Lalàna no resahina. (Ga 1:13, 14; Fi 3:6) Saro-piaro tamin’ny Fivavahana Jiosy izy, saingy diso toerana izany. Tso-po anefa izy ka naneho hatsaram-panahy tsy manam-paharoa taminy i Jehovah, tamin’ny alalan’i Kristy, ary nitaona azy ho amin’ny fivavahana marina.—1Ti 1:12, 13.
Famakiana Baiboly