INONA NO HANAMPY NY OLONA TSY HIFANKAHALA INTSONY?

4 | Ekeo Ny Fanampian’andriamanitra

Fampianaran’ny Baiboly:

‘Ny vokatry ny fanahy dia fitiavana, fifaliana, fihavanana, faharetana, hatsaram-panahy, hatsaran-toetra, finoana, fahalemem-panahy, ary fifehezan-tena.’—GALATIANINA 5:22, 23, f.a.p.

Inona no dikan’izany?

Hahavita tsy hankahala olona intsony isika rehefa ampian’Andriamanitra. Tsy ho vitantsika samirery mihitsy ny hanana toetra sasany, raha tsy ampian’ny fanahiny masina isika. Aza miady irery àry mba handresena ny fankahalana, fa miantehera amin’Andriamanitra. Raha manao an’izany ianao, dia hahatsapa hoatran’ny apostoly Paoly hoe: “Manana ny hery hiatrehana an’izay rehetra mitranga aho, noho ilay manome hery ahy.” (Filipianina 4:13) Ho afaka hiteny koa ianao hoe: “Avy amin’i Jehovah no ahazoako fanampiana.”—Salamo 121:2.

Inona no azonao atao?

“Nahery setra aho nefa novan’i Jehovah ho tsara fanahy.”—WALDO

Mivavaha amin’ny fo, dia mangataha fanahy masina amin’i Jehovah. (Lioka 11:13) Iangavio izy mba hanampy anao hanana toetra tsara. Ianaro izay toetra lazain’ny Baiboly hoe manampy anao tsy hankahala olona, anisan’izany ny fitiavana, fihavanana, faharetana, ary fifehezan-tena. Mitadiava fomba hampisehoana an’ireo toetra ireo, ary miaraha amin’ny olona miezaka hanana toetra hoatr’izany. Afaka mandrisika anao “hampiseho fitiavana sy hanao asa tsara” mantsy ry zareo.—Hebreo 10:24.

Tantara Tena Nisy—WALDO

Lasa Tsy Nankahala Olona sy Tsy Nahery Setra Intsony Izy

Nijaly be i Waldo tamin’izy mbola kely, dia lasa nankahala olona. Izao no nolazainy: “Niady tamin’ny mpivarotra zava-mahadomelina foana aho ... Nisy andian-jiolahy nanakarama mpamono olona kalazalahy mba hamono ahy. Soa fa afa-nandositra aho, ka tsy matiny fa naratra kely fotsiny.”

Tsy faly i Waldo rehefa nianatra Baiboly niaraka tamin’ny Vavolombelon’i Jehovah ny vadiny. Izao no teniny: “Tsy tiako maizina ny Vavolombelona, ka imbetsaka aho no nilelalela sy nanompa azy ireo. Tsara fanahy foana anefa izy ireo.”

Nianatra Baiboly koa i Waldo tatỳ aoriana. Hoy izy: “Tsy mora tamiko anefa ny nampihatra izay nianarako. Tsapako hoe tsy ho vitako mihitsy ny hifehy ny fahatezerako.” Nisy vokany be taminy anefa ny zavatra iray nianarany tao amin’ny Baiboly.

Nanazava i Waldo hoe: “Nasain’i Alejandro, ilay nampianatra Baiboly ahy, novakiko ny Galatianina 5:22, 23 indray andro. ... Nanazava izy fa tsy ho vitako ny hanana an’ireo toetra ireo raha tsy eo ny fanampian’ny fanahy masina. Tena nanova ny fomba fijeriko izany!”

Niantehitra tamin’Andriamanitra i Waldo, dia nahavita tsy nankahala olona intsony. Izao no nolazainy: “Gaga be ny havako sy ny namako taloha nahita ny fiovako.” Hoy koa izy: “Nahery setra aho nefa novan’i Jehovah ho tsara fanahy.”