Miandany Amin’ny Andaniny na ny Ankilany ve Andriamanitra Amin’ny Fanatanjahan-tena?
MANDOHALIKA ny mpihazakazaka iray mahazo fandresena, manao vavaka fisaorana noho ny zava-bitany. Azontsika heverina anefa fa nivavaka tamin’Andriamanitra mba hahazoana fandresena koa, ny sasany tamin’ireo mpihazakazaka hafa tamin’ilay fifaninanana — kanefa resy.
Samy mandohalika eny an-joron’ny ringy ireo mpanao ady totohondry roa lahy, alohan’ny fizarana voalohany amin’ny fihaonany. Samy nanao ny mariky ny lakroa izy ireo, endrika iray amin’ny vavaka mangina amin’Andriamanitra mba hahazoana fandresena. Avy eo, dia namely totohondry ilay andaniny ny ankilany ka tsy tafarina io. Amin’ny fihaonana hafa, dia mety ho mpilalao iray ihany no hangataka amin’Andriamanitra mba hahazo fandresena, kanefa izy mety ho resy indraindray ary handresy indraindray.
Amin’ny fanatanjahan-tena iraisana, ny mpilalao roa tonta dia mety hivavaka mialoha, mandritra, na aorian’ny lalao iray mihitsy aza. Ohatra, nandritra ireo segondra farany tamin’ny lalao baolina kitra amerikana fiadiana ny Amboaran’ny Tompon-daka, dia niatrana mba handaka ny baolina ao anaty harato ny mpandaka iray, izay niankinan’ny fandresena na ny faharesen’ny ekipany. Nilaza toy izao ilay mpandaka baolina tatỳ aoriana: “Nivavaka momba io aho.” Nefa nivavaka momba io koa ny sasany tao amin’ny ekipa an-kilany — fa mba handreseny ny andaniny.
Na dia mety samy hivavaka aza ny andaniny roa, dia tsy maintsy misy iray ho resy. Amin’ny lalao manaraka, dia mety ho resy aza ny ekipa iray nandresy izay nivavaka mba hahazoan’ny mpilalao tao fandresena. Amin’ny farany tokoa, rehefa hifarana ny taom-pilalaovana dia tsy maintsy ho resy avokoa ny ekipa hafa rehetra satria tsy mety hisy afa-tsy tompon-daka ankapobeny iray ao amin’ny ligy. Nisy mpilalao nivavaka ho an’ny fandresena anefa tao amin’ny ankamaroan’ireo ekipa resy.
Tao amin’ny lahatsoratra iray nitondra ny lohateny hoe “Tsitsio ny Vavaka Ataonareo Aza Fady”, dia nanoratra toy izao ny mpanoratra tao amin’ny gazety ara-panatanjahan-tena iray: “Tsy hoe satria fotsiny mieboebo momba ny fifandraisanao akaiky amin’Andriamanitra ianao dia tsy maintsy ho marina izany. (...) Tamin’ny Ady Lehibe Faharoa dia hita teo amin’ny fampoehan’ny fehikibon’ireo miaramila alemanina izao teny izao: Gott mit uns. Ny heviny dia hoe: ‘Momba Antsika Andriamanitra.’ ” Nanao izao fanamarihana izao ny mpanoratra hafa tao amin’ny gazety ara-panatanjahan-tena iray: “Tsy miandany amin’ny andaniny na ny ankilany Andriamanitra amin’ny lalao baolina kitra. Ny raharaha momba ny fiainana an-tany tahaka ireny dia tapahin’ny lehilahy sy ny vehivavy fa tsy tapahin’ny Tsitoha.”
Nilaza toy izao ny apostoly Petera: “Tsy mizaha tavan’olona Andriamanitra; fa amin’ny firenena rehetra izay olona matahotra Azy ka manao ny marina no ankasitrahany.” Ny fanaovana fanatanjahan-tena mahery setra dia tsy ‘fanaovana ny marina’. (Asan’ny Apostoly 10:34, 35; Romana 14:19). Raha toa Andriamanitra mihaino marina tokoa ny vavaka ataon’ireo izay mangataka fandresena ka misy mpandray anjara maratra na maty mihitsy aza, tokony homen-tsiny ve Andriamanitra?
Milaza toy izao ny Tenin’Andriamanitra: “Raha mangataka zavatra araka ny sitrapony isika, dia mihaino antsika Izy”. (1 Jaona 5:14). Mba hahavoavaly ny vavaka ataon’ny olona iray dia tsy maintsy mahafantatra ny sitrapon’Andriamanitra sy ny fikasany izy ary tsy maintsy mifanaraka amin’izany ny zavatra ataony. — Ampitahao amin’ny Matio 6:9, 10.
Tsia, tsy misy ifandraisany amin’ireo fihaonana ara-panatanjahan-tena ny sitrapo sy ny fikasan’Andriamanitra. Araka izany, rehefa hatolotra amin’ireny fotoana ireny ireo vavaka ho an’ny fandresena, moa ve Andriamanitra mihaino? Tena azo antoka fa tsia.
[Sary nahazoan-dalana, pejy 31]
UPI/Bettmann