Gazety Izay Manome Fampiononana Mahasoa

“HO TIAKO ny hisaotra anareo be dia be noho ireo lahatsoratra mahasoa sy miavaka nomenareo mba hampiasainay, indrindra indrindra tao anatin’ny roa taona farany. Teo am-pandraisana ny sasantsasany taminy aho dia nitomany mihitsy sady nisaotra an’i Jehovah, satria maro tamin’ireo namanay ao amin’ny fahamarinana no nila tamim-pamoizam-po ny fanazavana toy ireny. Ny tiako horesahina dia ireo nomerao miresaka momba ny fametavetana ankizy, ny olona notezaina tao anatin’ny fianakaviana alkaolika, ny fisavihana, sy ny herisetra ao an-tokantrano.” — Linda W. S., Indiana, Etazonia.

Ireo no teny fampidirana tao amin’ny iray amin’ireo taratasy maro mampahery voarainay tao anatin’izao taona faramparany izao, momba ireo lahatsoratra tao anatin’ny gazety Ny Tilikambo Fiambenana sy ny Mifohaza! navoakan’ny Fikambanana Watchtower ary zarain’ny Vavolombelon’i Jehovah maneran-tany.

Rehefa heverina fa maherin’ny 16 000 000 ny isan’ny mivoaka amin’ny nomerao tsirairay amin’ilay voalohany amin’ny fiteny 120, ary efa ho 13 000 000 ny an’ilay farany amin’ny fiteny 75, dia azontsika atao ny mahatakatra ny fiantraikan’ireo gazety ireo maneran-tany. Manolotra azy ireo amin’ny besinimaro ny Vavolombelon’i Jehovah, eo am-panaovany ny fanompoany isan-trano ary eo am-panaovany fanambarana tsy ara-potoana, izay manondro ny fitoriana amin’ny fotoana tsy voalamina mialoha, toy ny rehefa miantsena, maka lasantsy, mandeha aotobisy, fiarandalamby, sy fiaramanidina, na amin’ny fotoana mety hafa amin’ny fiainana isan’andro. Ny Vavolombelona sasany anefa dia nahita fomba hafa niavaka sy nahomby mba hametrahana ireo gazety, fomba izay angamba irinao koa ny hanandrana azy.

Fitsidihana ireo fikambanana misahana asa manokana

Ny mpitory mpitety faritany iray dia nanoratra taminay toy izao manaraka izao momba ny asa mamokatra notontosain’ny Vavolombelona hafa iray: “Nanao ezaka manokana izy mba hanangona ireo nomerao tranainy kokoa tamin’ny gazety Mifohaza! sasany, izay niangona tany an-tokantranon’ireo Vavolombelona hafa. Avy eo izy dia mitsidika ireo fikambanana izay heveriny fa mety hampiseho fahalianana manokana amin’ny sasany amin’ireo foto-kevitra ao anatiny.” Karazana fikambanana inona avy no notsidihiny?

“Nampifantoka ny ezaka nataony tamin’ireo fikambanana misahana asa sosialy, foibe manohitra ny fanalana zaza, fikambanana manolotra fandrindram-piterahana, dokotera mpitsabo aretin-tsaina, psikology, sampan-draharahan’ny polisy, birao manome fahafahana misy fepetra ho an’ny mpigadra, foibe mikarakara ireo mpidoroka zava-pisotro misy alkaola sy zava-mahadomelina, foibe miaro sy mikarakara ireo ankizy novetavetaina, sampan-draharaha sosialy (ireo mpiasa mikarakara ny asa sosialy no anontaniany) sy mikarakara ny fahasalamana, akanin-jaza, sekoly, hopitaly mikarakara momba ny fihenjanana, ary tamin’ny toe-javatra iray dia nangataka mba hiresaka tamin’ny ben’ny tanàna izy.” Fahombiazana manao ahoana no hitany?

“Koa satria enim-bolana lasa izay izy no nanomboka nifantoka tamin’io sahan’asa niavaka io, dia efa nahapetraka nomerao tranainy 1 784 miresaka momba ny foto-kevitra voafaritra tsara izy!”

Amin’ny fomba ahoana no anaovan’io Vavolombelona io ireny fitsidihana amin’ireo olona manana anton-draharaha manokana ireny? Hoy izy: “Heveriko fa ny antony iray nahatonga ireny fitsidihana ireny hahomby, ankoatra ny hoe nandinika ireo raharaha atrehin’ireny olona ireny isan’andro ireo gazety, dia satria nitafy sy nitondra tena toy ny olona mahay ny asanay izahay.” Azo antoka fa hanaja antsika ireo olona manana anton-draharaha manokana raha manao tari-dresaka amim-patokiana isika ary mitafy sy mihaingo amin’ny fomba mety.

Manohy ny fitantarany toy izao izy: “Teo am-panolorana ilay Mifohaza! niresaka momba ny fanalana zaza izahay (N° 4 1993), koa nanapa-kevitra aho ny hitsidika foibe iray manohitra ny fanalana zaza. Natomboko tamin’ny zava-nitranga tetsy sy teroa tao amin’ny gazety momba ny fanalana zaza sarotra iray ny resaka ary avy eo dia notarihiko ho amin’ilay gazety, nampiarahina tamin’ny Ny Tilikambo Fiambenana. Nahafinaritra aoka izany ny resaka nifanaovanay, hany ka natolotro koa ilay bokikely hoe Tena Miahy Antsika ve Andriamanitra? izay noraisin’izy ireo tamim-paharisihana.” Ny fitsidihany nanaraka dia tany amin’ny foibe manolotra fandrindram-piterahana, ka nahazo fahombiazana tahaka izany koa izy tany.a

Izany fahaizana mahita hevitra izany dia mety hiafara amin’ny fitomboan’ny isan’ireo olona ta hamaky ireo gazetintsika. Fantatray avy amin’ireo taratasy voarainay fa matetika no manaitra ny sain’ireo olona manana anton-draharaha manokana ny fikarohana sy ny fomba fanoratra tsara dia tsara ao amin’ireo gazety. Marina loatra izany, hany ka any amin’ny tany sasantsasany, toa an’i Suriname, any Amerika Atsimo, dia ampiasain’ireo mpianatra sy ireo mpampianatra ho toy ny fitaovam-pampianarana lehibe ny gazety Mifohaza! Ambony be ny isan’ny gazety voapetraka any, ary tsy andrin’ireo olona liana ny hivoahan’ny nomerao tsirairay.

Ny tatitra iray voaray avy any Nizeria dia nilaza fa ny foibe fandefasam-peo iray dia namaky tsy nisy nanovana ny tao anatin’ny gazety Réveillez-vous! (Mifohaza! amin’ny fiteny frantsay) iray momba ny hoe “Les femmes méritent le respect” (8 Jolay 1992). Mahatonga hihevitra ny amin’inona moa izany? Ny amin’ny fahafahantsika hanolotra amim-pahombiazana ireo gazety amin’ireo talen’ny radio na ny televiziona. Ilaina fotsiny ny fandinihana akaiky ny nomerao tsirairay sy ny famaritana hoe iza no manam-pahaizana momba ireo foto-kevitra dinihina eo an-toerana, na mpahay lalana izany, na mpampianatra, mpanolo-tsaina, polisy, mpitsabo mpanampy, dokotera, na olona manana anton-draharaha hafa.

Tari-dresaka iray hafa no nampiasain’ny Vavolombelona iray izay nanomboka ny fomba fampisehoany tamin’ny fanaovana izao fanontaniana izao: “Tia ankamantatra ve ianao? Ny ankamaroan’ny olona dia tia izany. Misy iray ato amin’itỳ gazety Réveillez-vous! itỳ (8 Janoary 1994 na 8 Septambra 1994) nampitondraina ny lohateny hoe ‘Vous êtes-vous jamais demandé?’ Nahoana raha soratanao ny valiny hitanao, ka amin’ny andro manaraka aho dia hiverina mba hahafahantsika hampitaha izany amin’ny valiny omen’ny Baiboly?” Nanao resaka mahaliana maro niorina tamin’io fomba fanao io izy, ary nanomboka fampianarana Baiboly maromaro.

Fanipazan-kevitra hafa azo ampiharina koa ny fampisehoana ireo nomerao farany misy foto-kevitra mety hanintona ilay olona manana anton-draharaha manokana iresahanao. I Linda, izay voaresaka teo aloha, dia nahita izao fanandraman-javatra manaraka izao tamin’ny mpitantana sady mpanolo-tsaina iray tao amin’ny sekoly manaraka ireo fandaharana ampiasana fomba fampianatra vaovao. “Teo am-pamadibadihana ireo gazety niaraka taminy aho no hitany ilay lahatsoratra hoe ‘Des enfants victimes du stress’, koa nilaza izy hoe: ‘Andriamanitra no nandefa anao androany!’ Nanana fotoam-pivoriana ny amin’ny fomba ahafahan’ny ankizy manalavitra ny fihenjanana izy tamin’io andro io. Rehefa nahita ilay fitantarana tao amin’ny pejy faran’ilay gazety manambara ny boky hoe Ny Fahatanoranao — Ny Fomba Handraisan-tsoa Be Indrindra avy Amin’izany izy, dia nangataka boky iray. Sendra nampiseho taminy ireo teny nalaina avy tao amin’ilay boky aho, niresaka momba ny famonoan-tena, no nihiaka izy hoe: ‘Fantatro izao fa Andriamanitra mihitsy no nandefa anao tatỳ!’ Vao avy nanoro hevitra ankizilahy iray izay naniry ho faty izy. Izao izy dia ho afaka hanoro hevitra azy bebe kokoa.”

Asehon’ireo fanandraman-javatra ireo fa amin’ny fitadiavana hevitra sy amin’ny fiomanana miaraka amin’ny fananana toe-tsaina manorina dia afaka mahatratra olona mihamaro kokoa isika amin’ny alalan’ny Teny fampiononan’Andriamanitra. Toy izao no nanoratan’ny apostoly Paoly azy: “Isaorana anie Andriamanitra, Rain’i Jesosy Kristy Tompontsika, Rain’ny famindrampo sady Andriamanitry ny fampiononana rehetra, Izay mampionona anay amin’ny fahorianay rehetra mba hahaizanay mampionona izay rehetra mitondra fahoriana kosa, amin’ny fampiononana izay ampiononan’Andriamanitra anay.” — 2 Korintiana 1:3, 4.

[Fanamarihana ambany pejy]

[Sary, pejy 30]

Ireo gazety dia manome fanazavana mahasoa ho an’ireo fikambanana misahana asa sosialy

[Sary, pejy 31]

Azo atao ny manolotra Ny Tilikambo Fiambenana sy ny Mifohaza! amin’ny tarehin-javatra maro