Vavaka ho An’ny Fandriampahalemana eo Anivon’ny Fahatsiarovana Ady
TAMIN’NY Novambra 1994, dia nampiantrano fivoriamben’ny fivavahana maro samy hafa tao Vatikana ny Papa Jean Paul II. Nanamarika ilay fotoan-dehibe ireo vavaka ho an’ny fandriampahalemana maneran-tany. “Na inona na inona ady tamin’ny lasa sy amin’izao fotoana izao mihitsy aza”, hoy ny papa tamin’ny lahateniny fanokafana, “dia andraikitra sy adidy iombonantsika ny manao izay hahafantarana tsara kokoa ny fifandraisana eo amin’ny fivavahana sy ny fandriampahalemana.”
Mifanohitra amin’izany fa manana laza ratsy amin’io lafiny io ireo fivavahana eo amin’itỳ tontolo itỳ. Niaiky i William Vendley, sekretera jeneralin’ilay konferansa, fa “ireo fivavahana dia tafiditra lalina amin’ireo ady any amin’ny faritra maro samihafa eo amin’izao tontolo izao”. Diniho ilay fandripahana olona tatsy Rwanda, tany be Katolika.
Tamin’ny May 1994, dia niaiky ny Papa Jean Paul II fa ilay loza nahatsiravina tatsy Rwanda dia “tena fandripahana foko iray manontolo tokoa, ka ny amin’izany, dia mampalahelo fa na dia ny Katolika aza dia tompon’andraikitra”. Nisy fiantraikany teo amin’ny fatokian’ny olona ny eglizy ve ny fandraisan’ny Katolika anjara? “Nampihozongozona ny finoan’ny olona maro ilay fandripahana olona”, hoy i André Bouillot, Zezoita belza. Ary noho ny antony marim-pototra izany.
Araka ny tatitra nataon’ny Reuters navoaka tao amin’ny Herald any Miami, dia “misy pretra sy pasitera ary masera eo anivon’ireo mpigadra hutu 40 000 miandry fitsarana noho ny nanaovana ilay fandripahana foko iray manontolo”. Nanao tatitra toy izao ny The New York Times: “Rwandais maro no milaza fa tsy nanameloka haingana na tamin-kery ilay fandripahana, ireo evekany sy arsevekany, ary akaiky loatra ny Fitondram-panjakan’i Habyarimana, izay nanampy tamin’ny fampiofanana an’ireo andia-miaramila hamono olona, izy ireo. Fara fahakeliny dia pretra iray no nosamborin’ny Fitondram-panjakana vaovao tapahin’ny Tutsi satria nampangaina ho nanampy tamin’ilay fandripahana olona.” Tsy mahagaga raha “milaza ilay Fitondram-panjakana vaovao”, hoy ny teny nanampin’ny Times, “fa tsy tiany ho mahery toy ny teo aloha ny Eglizy Katolika, ary nila vaniny sy nandrahona mihitsy aza ny hisambotra an’ireo pretra izay nivantambantam-piteny sy nahaleo tena loatra ireo miaramila”.
Ahoana no fiheveran’i Jehovah Andriamanitra an’ireo vavaka ho an’ny fandriampahalemana izay atolotr’ireo mpivavaka mivesatra trosan-dra? Hoy ny avalin’ny Isaia 1:15: “Raha mananty tànana hianareo, dia hitampi-maso tsy hijery anareo Aho; eny, na dia manao vavaka be aza hianareo, dia tsy hihaino Aho; feno ran’olona ny tànanareo.”
Etsy an-danin’izany, dia mitoetra ho “tsy naman’izao tontolo izao” sy ireo adiny ny tena mpanompon’i Jehovah. Nandritra ilay fandripahana olona tatsy Rwanda, ny Vavolombelon’i Jehovah avy amin’ny foko tsirairay dia nanome fialofana tao an-tranony ho an’ireo Vavolombelona norahonana avy amin’ny foko andaniny, ka tamin’izany dia niaro azy ireo tamin’ny fanaovana vivery ny ainy. Mivavaka ho amin’ny fahatongavan’ny Fanjakan’Andriamanitra sy manohana azy io ho ny hany fanantenana ho an’ny tena fandriampahalemana sy filaminana, ny “olona betsaka” amin’ny Vavolombelona, voangona maneran-tany avy amin’ny fiaviana ara-pirazanana rehetra. — Jaona 17:14; Apokalypsy 7:9; Matio 6:9, 10; 24:14.
[Sary nahazoan-dalana, pejy 25]
Luc Delahaye/Sipa Press