“Raha Azoko Natao ny Nanova Fotoana Iray tao Anatin’ny Fandehan’ny Fotoana”
NASAINA nanoratra famoaboasan-kevitra momba ilay loha hevitra etsy ambony ireo mpianatra tao amin’ny sekoly iray any Californie, Etazonia. Iray tamin’ireo niady ny famaranana tamin’ilay fifaninanana famoaboasan-kevitra i Eric, zanakalahy 11 taona ao amin’ny fianakaviana iray Vavolombelon’i Jehovah. Izy ihany no namorona izao famoaboasan-kevitra miorina amin’ny Baiboly manaraka izao.
“Ady nahafaty ny Ady Lehibe Faharoa. Olona tsy nanan-tsiny maro no maty. Ilay fotoana ho nofidiko anefa dia ho tsy nampisy mihitsy an’io ady io tao anatin’ireo boky momba ny tantara. Hevero ny famonoana an’i John F. Kennedy. Maty tamin’ny fomba nahatsiravina io lehilahy io, kanefa ilay fotoana ho nofidiko dia ho tsy nampisy an’izany koa tao anatin’ireo boky momba ny tantara. Maty tamin’ny 1968 i Martin Luther King, Jr., noho ny niezahany hanova ny fomba fisainan’izao tontolo izao, kanefa ilay fotoana ho nofidiko dia ho nialoha io fotoana io koa. Raha azoko natao ny nanova io fotoana io tao anatin’ny fandehan’ny fotoana, dia ho hafa izao tontolo izao, ho niova ny zava-drehetra araka ny ahafantarantsika azy, ary ho hafa ny zavatra rehetra, anisan’izany ny toe-piainana sy ny olona. Tamin’io fotoana io no niovan’ny fizotran’ny tantara ka nahatonga an’izao tontolo izao ho araka ny ahafantarantsika azy amin’izao andro izao — mahafaty, mahery setra, marary, sy ratsy.
“Mety hanontany tena ianao hoe: ‘Aretina ve io fotoana io? Fitondram-panjakana ve io fotoana io? Sa ady io fotoana io?’ Manontania tena hoe: ‘Raha aretina izy io, ahoana no ho nahafahan’izy io nisakana ny zavatra ataon’ny olona mba tsy ho ratsy?’ ‘Tsy ho afaka nisakana izany izy io’, hoy ianao. Avy eo dia mieritreritra ianao hoe: ‘Tsy maintsy ho fitondram-panjakana izay hamaha ireo olana rehetra mahazo antsika izy io.’ Tantanan’ny olona anefa ny fitondram-panjakana, ary tsy tanteraka sy maty ny olona rehetra. Koa tsy ho faty hiaraka amin’izy ireo ve ny asa tsarany? Avy eo dia hoy ianao: ‘Tsy maintsy ho ady iray tahaka ny Ady Lehibe Faharoa izy io.’ Tsia! Tsy mety ho izany satria amin’ny ady dia mandresy ny andaniny iray, ary miaraka amin’izany, dia resy ny ankilany. Tsy misy amin’ireo zavatra voatonona ireo ho namarana tamin’ny fomba maharitra ny fahafatesana, ny herisetra, ny aretina, sy ny faharatsiana. Mety hanontany tena ianao hoe inona io fotoana ho novako tao anatin’ny fandehan’ny fotoana io.
“Fahotana. Fahafatesana. Ny fahotana sy ny fahafatesana no ho novako. Tamin’ny fomba ahoana anefa? Nanana fahotana sy fahafatesana foana isika. Anisan’ny fiainantsika isan’andro ny fahotana sy ny fahafatesana. Ahoana àry no ahafahanao manova izay efa teo foana? Tsy maintsy ho nisakana azy io tamin’ny fotoana nanombohany ianao. Ny fikomian’i Adama sy i Eva tamin’ny fitondram-panjakan’Andriamanitra no nahatonga ny toe-javatra ho toy ny amin’izao andro izao. Ireo voakasika ireo dia nifidy ny hanao zavatra araka izay tiany, ary, noho izany, dia manana fahotana sy mahita fahafatesana isika.
“Koa ilay fotoana marina izay tsy maintsy ho novana dia tamin’ny nilazan’i Satana Devoly ny lainga voalohany nanoherana io fitondram-panjakana tonga lafatra io. Noho io lainga io, dia mijaly isika rehetra noho izay nataon’ny ray aman-drenintsika voalohany, i Adama sy i Eva. Nanota tamin’ilay hany manan-jo ho Mpitarika fitondram-panjakana, dia Andriamanitra, izy ireo.”
Tamin’ny asabotsy 12 Aogositra 1995, i Eric dia namaky ilay famoaboasan-keviny tao amin’ny andro fivoriambe manokana nataon’ny Vavolombelon’i Jehovah tany Norco, Californie. Naharavoravo ny mpanatrika ny nandre tanora iray nanararaotra fahafahana iray tany an-tsekoly mba hanaovana fanambarana mampisaintsaina momba ny antony mahatonga ny fijalian’olombelona. Ho toy inona moa ny fahalehibiazan’ny fotoana handringanan’i Jehovah Andriamanitra an’“ilay menarana ela” sy hanesorany ny fijaliana rehetra izay naha-tompon’andraikitra ny Devoly! — Apokalypsy 12:9; 21:3, 4; Genesisy 3:1-6.