Fijerena An’izao Tontolo Izao
Fitsaboana ny Aretim-pivalanan’ny Ankizy
“Nanamboatra vaksiny izay saika mahafongotra tanteraka ny aretim-pivalanana mafy eo amin’ny ankizy, ireo mpanao fikarohana eto Venezoela”, hoy ny The Daily Journal any Caracas. “Ilay vaksiny (...) dia natao hiarovana amin’ny aretim-pivalanana ateraky ny virosy. Mamono ankizy latsaka ny dimy taona, miisa 873 000 eo ho eo isan-taona, any amin’ny tany an-dalam-pandrosoana, mantsy io aretim-pivalanana io.” Na dia any Etazonia aza, dia mbola mahatonga fampidirana any amin’ny hopitaly, zazakely sy ankizy mbola tsy mianatra maherin’ny 100 000 isan-taona, ilay aretina. Manao tatitra ilay fandinihana, navoaka tao amin’ny The New England Journal of Medicine, fa nanana taham-piarovana 88 isan-jato tamin’ilay virosy ny fampiasana ilay vaksiny, ary nampihena 70 isan-jato ny fampidirana any amin’ny hopitaly an’izay voan’ny aretim-pivalanana mafy. Misy anefa ny lafy ratsiny. “Mety ho lafo loatra ho an’ny tany an-dalam-pandrosoana izay tena ilana azy io indrindra, ilay fitsaboana”, hoy ny The Daily Journal, dia ireo tany “izay andaniana latsaka ny 20 dolara [100 000 FMG eo ho eo] isan’olona, isan-taona, amin’ny fikarakarana ara-pahasalamana”. Mandra-pahafahana mamokatra ilay vaksiny amin’ny vidiny mirary, dia tsy maintsy soloana ny rano very vokatry ny aretim-pivalanana, ary izany moa no fomba fitsaboana nampiasaina izay nandaitra hatramin’ny 20 taona.
Mampihena ny Fahazoana Aretina ny Fampinonoana
“Tsy dia mora voan’ny aretin-tsofina vokatry ny otrikaretina sy ny aretim-pivalanana ny zazakely minono amin-dreniny, araka ny fandinihana iray natao tamin’ny zazakely, izay 2 ka hatramin’ny 7 volana, miisa maherin’ny 1 700”, hoy ny gazetiboky Parents. “Hitan’ny mpanao fikarohana ao amin’ny Foibe Miady Amin’ny Aretina fa ny zazakely tsy ampinonoina afa-tsy amin’ny biberao, dia mety ho voan’ireo aretina ireo, efa ho avo roa heny noho ny zazakely izay tsy ampinonoina afa-tsy amin-dreniny.” Na dia efa fantatry ny dokotera hatramin’ny ela aza fa miaro amin’ny fidiran’ny otrikaretina ny rononon-dreny, satria mampita ny hery fanefitr’ilay reny, dia vao mainka asehon’ilay fandinihana koa fa lehibe tokoa ireo soa entiny. Hoy i Laurence Grummer-Strawn, anisan’ny nitarika ilay fandinihana: “Tsy misy atahorana mihitsy ny milaza hoe vao mainka tsara raha mahazo rononon-dreniny bebe kokoa ny zaza, mandritra ny enim-bolana voalohany.”
Miteraka Olana ny Fitevehana
Mety ho lamaody be any amin’ny tany sasany ny fitevehana ny eo amin’ny vatana, kanefa “tsy ny fidiran’ny otrikaretina ihany no mety ho azo avy amin’ny fitevehana molotra sy takolaka ary lela”, hoy ny tatitra nataon’ny The Journal of the American Medical Association. Araka ny voalazan’ny mpitsabo nify ao amin’ny Oniversiten’i West Virginia Fianarana Mitsabo Nify, any Morgantown, “dia fahita matetika amin’ireo marary izay nitevika aty vava ny fanaintainana, ny fivontosana, ny fahazoana otrikaretina, ny fitomboan’ny raraka ivy, sy ny faharatran’ny hihy. (...) Mety hitondra loza fanampiny ny firavaka ho an’ny tevika ao amin’ny aty vava”. Mety hanilaka na hampisy tresaka ny nify, hanelingelina ny fitenenana, hampisy holatra, sy hanampina ny lalan-drivotra — raha voatelina — ilay firavaka.