Avy Amin’ny Mpamaky
Ahoana Raha Tsy Miraika Amiko Izy? Voaraiko androany ilay Mifohaza! tamin’ny 8 Jolay 1998. Rehefa hitako ilay lahatsoratra hoe “Manontany ny Tanora Hoe... Ahoana Raha Tsy Miraika Amiko Izy?”, dia nisaotra an’i Jehovah avy hatrany aho, satria namaly ny vavaka nataoko izy. Tapa-kevitra aho fa hiara-mandinika io lahatsoratra io amin’i Neny, ary hampihatra ilay torohevitra eo amin’ny fiainako. Tena fanomezana feno fitiavana avy amin’i Jehovah Andriamanitra mihitsy ireo lahatsoratra hoe “Manontany ny Tanora Hoe...”
K. M., Kenya
Tovovavy 22 taona aho, ary ankafiziko ny nomerao tsirairay amin’ny gazetinareo. Sambany anefa vao nisy lahatsoratra nanohina lalina ny foko toy izany. Rehefa nanomboka namaky azy io aho, dia nanganohano ny ranomasoko. Tsy ela izay, dia nitranga tamiko ilay nolazalazainareo, ka nanana fanontaniana maro momba ireo fihetseham-po tsapako aho. Nanampy ahy hahita mazava ny toe-javatra io lahatsoratra io.
R. B., Litoania
Rehefa namaky io lahatsoratra io aho, dia izao no fanontaniana tonga avy hatrany tato an-tsaiko: ‘Ahoana no mba hahatakaran’ny olona izay zavatra tsapako?’ Faly be aho mahafantatra fa mahatakatra amin-katsaram-panahy ny zava-drehetra i Jehovah. Androany no nahatongavan’ilay gazety, ary na dia efa misasakalina aza izao, dia tiako ny hanoratra avy hatrany.
A. N., Japon
Na dia natao ho an’ny vehivavy aza ilay lahatsoratra, dia hitako ho tena mahasoa izy io. Vao tamin’ny herinandro lasa, dia nahazo fandavana hentitra aho, ka nahatsapa ratram-po. Nanampy ahy handinika tsara ny fihetseham-poko ilay lahatsoratrareo. Nampionona ahy izy io, ary ny zava-dehibe kokoa, dia nampiseho tamiko fa rehefa mifidy vady aho, dia tokony hieritreritra ny hanome, fa tsy ny handray.
P. H. S., Brezila
Manantitrantitra ny hanambadian’ny vehivavy, raha vao tonga taona, ny fiaraha-monina koreanina. Tena zava-tsarotra ho an’ny vehivavy kristianina ny hiandry ho “efa dila ny fahatanorana vao mivelatra”, vao hanambady. (1 Korintiana 7:36, NW ). Misaotra noho ilay torohevitra tsara dia tsara.
S. C., Korea