Avy Amin’ny Mpamaky

Loza Kôsmika? Folo taona aho, ary tiako ilay lahatsoratra hoe “Ny Fiheveran’ny Baiboly: Hisy Loza Kôsmika Iray Handrava Izao Tontolo Izao Ve?” (8 Desambra 1998). Nanampy ahy izy io hahita fa tsy hisy loza kôsmika handrava ny planetantsika, satria irin’i Jehovah ny hiainantsika ao amin’ny tany zary paradisa.

J. P., Etazonia

Fandidiana Tsy Ampiasana Ra Tiako ny hisaotra anareo noho ilay lahatsoratrareo hoe “Manova ny Fomba Fijeriny ny Dokotera Raha ny Amin’ny Fandidiana Tsy Ampiasana Ra”. (8 Desambra 1998). Tena nampientam-po ahy ny namaky azy io, satria tena nahomby ny fitsaboana ahy tsy nisy fampidiran-dra, fony aho nosoloana maoja. Olona nodidiana maoja koa, saingy nampidiran-dra, no niray efitrano tamiko tany amin’ny hopitaly. Tsy ampy herinandro akory dia afaka nivoaka ny hopitaly aho. Voatery nijanona kosa izy, satria nisy fahasarotan’aretina vokatry ny virosy.

N. H., Etazonia

Miala Amin’ny Sigara! Lahatsoratra manokana ho ahy ilay lahatsoratra hoe “Afaka Miala Ianao! Izahay efa Niala!” (8 Desambra 1998). Vao avy nahavita fampianarana Baiboly tamin’ny olona iray mpifoka sigara aho. Tonga amin’ireo fivoriantsika rehetra izy, saingy tojo sakana ara-panahy, noho io fahazaran-dratsy mahazo azy io. Efa nanome azy lahatsoratra hafa momba ny fialana amin’ny sigara aho. Mivavaka aho mba hanampian’ity lahatsoratra ity azy mba handresy ny vato misakana azy, amin’ny farany.

E. C., Etazonia

Zavatra Simika sy Fahasalamana Vao haingana aho no nanomboka fianarana momba ny simia, ary nanaitra ny saiko avy hatrany ilay nomerao tamin’ny 8 Janoary 1999, raha vao hitako. Toy ny mahazatra, dia hainareo ny nampiseho loha hevitra sarotra tamin’ny fomba ahazoan’ny rehetra azy io. Koa satria miely patrana ny fandoto sy ny entam-barotra simika, dia fifanarahana iraisam-pirenena no ilaina vao ho voavaha indray mandeha tsy hiverina intsony ny olana ny amin’ny fandotoana. Misakana izany anefa ny fitiavan-tena sy ny fierenan’ny olombelona. Soa ihany fa fantatr’i Jehovah ny fomba hamahana io olana io mandrakizay.

C. V., Kanada

Tsy Fananan-dray Aman-dreny Intsony Misaotra noho ny nanoratanareo lahatsoratra tsara dia tsara toy io, dia ilay hoe “Manontany ny Tanora Hoe... Ahoana no Hahatafavoaka Ahy Amin’izao Tsy Misy Ray Aman-dreny Izao?” (8 Janoary 1999). Nanampy ahy izy io hahazo antoka indray fa afaka miaro anay tanora i Jehovah, raha tsy manan-dray aman-dreny intsony izahay. Mbola velon-dray aman-dreny aho, saingy matetika aho no manontany tena hoe inona no hitranga amiko raha sanatria ka maty izy ireo. Nampahery be ahy ny ohatra tsara dia tsara nomen’i Horacio.

M. J., Trinité