Avy Amin’ny Mpamaky

Fandravahana ny Vatana Manoratra aho ho setrin’ilay lahatsoratrareo hoe “Ny Fiheveran’ny Baiboly: Fandravahana ny Vatana — Ilana Fahalalana ny Antonony”. (8 Aogositra 2000). Tsara tarehy ny vatana voaravaka amim-pahaiza-mifidy zavatra — tena zavakanto iray. Mety hitsara ahy sy hanakilasy ahy amin’ny fisehoako ivelany ny olona, nefa fantatro fa tiana aho eo imason’Andriamanitra. Manantena aho ary mivavaka mba tsy hifantoka amin’ny tombokavatsako ny hafa, fa hijery izay toetrako anaty.

K. M., Etazonia

Nanaiky ilay lahatsoratra fa fanapahan-kevitra manokana ny hoe hanapa-kevitra handravaka ny vatana ny olona iray, sa tsia. Na izany aza, dia fomba iray hanaporofoan’ny olona iray fa manana hatsaran-tarehy anaty izy ny ‘firavahana amim-pahamaotinana sy amim-pahononan-tena’. (1 Timoty 2:9). Asehon’ny Baiboly mazava koa fa adidin’ny Kristianina ny manisy fiheverana, tsy ny fieritreretany ihany, fa ‘ny an’ny olon-kafa’ koa. (1 Korintiana 10:29) — MPAMPANONTA.

Fiteny Misaotra noho ilay lahatsoratra hoe “Ny Fiteny — Tetezana sy Fefy eo Amin’ny Fampitan-kevitra”. (8 Aogositra 2000). Mahaliana fatratra ahy hatramin’izay ny fiteny, ary efa nianatra fiteny eoropeanina dimy aho. Mianatra teny cinghalais aho izao. Ny mampientam-po ahy anefa dia ny hoe ahafahana manorina tetezana ho amin’ny kolontsaina hafa ny fianarana miteny sady ahafahana mizara ny “fiteny madio” momba ny fampianaran’ny Baiboly! — Zefania 3:9, NW.

C. B., Italia

Alahelo Misaotra noho ilay lahatsoratra hoe “Tokony Haseho ve ny Alahelo?” (8 Aogositra 2000). Manohina ny fonay ilay loha hevitra satria namoy ny zanakay lahy izahay, telo taona lasa izay. Na dia mbola mitomany sy malahelo ihany aza izahay, dia manome anay ny tanjaka hanohizana manao zavatra ny lahatsoratra toy ireny.

J. A. sy L. A., Etazonia