Avy Amin’ny Mpamaky

Sitrana Tsy Nisy Fampidiran-dra Nanohina ahy lalina ilay lahatsoratra hoe “Raharaha Mahakasika Feon’ny Fieritreretana” (8 Septambra 2000) Nitovy tanteraka tamin’izy io ny toe-javatra nisy ahy rehefa nolazaina fa leucémie promyéloblastique aiguë no nahazo ahy. Saika nitovy tamin’izay nitranga tamin’i Darlene ny nitranga tamiko taorian’izay. Nilazana aho fa andro vitsivitsy sisa hiainako. Telo taona izay no lasa.

A. B., Alemaina

Fanadalana Vehivavy Tiako ny hilaza ny fankasitrahako an’ilay lahatsoratra “Manontany ny Tanora Hoe... Fanadalana Vehivavy—Inona no Hataoko Rehefa Iharan’izany Aho?” (8 Septambra 2000) Nopetahana an’izao karazana anarana rehetra izao aho tany am-pianarana, satria tsy nanaiky hanana fitondran-tena ratsy. Nihevitra aho fa hitsahatra ilay fanadalana rehefa vita ny fianarako tany amin’ny lise, kanjo nisy ankizivavy maromaro nanao resaka kivalavala tamiko. Nanampy ahy hanohitra izany fitaomana haloto fitondran-tena izany ny nampahafantarako ny rehetra ny finoako kristianina. Misaotra anareo manome anay izany sakafo ara-panahy izany.

H. C., Zambia

Nanampy be ilay lahatsoratra. Mijerijery ahy foana ny ankizilahy iray miray kilasy amiko, ao amin’ny T.3. Fantatro izao ny tokony hataoko.

H. K., Etazonia

Tena tonga ara-potoana ilay izy! Misy manadala foana aho any am-piasako. Nandreraka ahy ilay izy. Efa hamoy fo iny indrindra aho no tonga ilay lahatsoratra. Fantatro izao ny fomba hifampiraharahako amin’ny olona any am-piasana.

L. T., Etazonia

Goulash Be Rano? Nanandrana ilay fomba fandrahoana goulash hongroà tao amin’ilay lahatsoratra hoe “Ilay Zavamanitra Mampahatsiro Sakafo Namakivaky An’izao Tontolo Izao” aho. (8 Septambra 2000) Nandeha tsara ny zava-drehetra mandra-pahatonga teo amin’ilay hoe ampiana rano roa litatra. Toy ny lasopy ilay goulash nataoko fa tsy toa an’ilay laoka ketsaketsa hita eo amin’ilay sary. Tsy azoko tsara ve ilay fomba fandrahoana azy?

L. P., Kanada

Tsia, diso izahay niantso azy io hoe laoka ketsaketsa, satria raha ny marina, dia fomba fandrahoana lasopy “goulash” hongroà ilay izy. Manolo-kevitra ny hampiasana rano kely kokoa noho ny natoronay, ny boky fandrahoana sakafo sasany. Na izany aza anefa dia mahaliana fa nisy mpamaky nanandrana ilay fomba fandrahoana ary nanoratra mba hilazana ny fankafizan’izy ireo azy io!—MPAMPANONTA.