Avy Amin’ny Mpamaky

Propagandy Vao avy namaky indrindra ilay nomerao tamin’ny 8 Jolay 2000 aho, ary misaotra anareo noho ilay fitohitohizan-dahatsoratra hoe “Tokony Hino Izay Rehetra Renao ve Ianao?” Atỳ aminay, dia nanjary fanao ny fanarabiana an’ireo Romanianina (Tziganes). Anaovan’ny olona vazivazy hoe mpangalatra izy ireny. Noho ireo lahatsoratra ireo, dia takatro fa tsy mety ny vazivazy toy izany, ary nanapa-kevitra ny tsy handray anjara tamin’izany aho.

K. M., Repoblika Tseky

Fipetrahana any Andafy Misaotra noho ilay lahatsoratra hoe “Manontany ny Tanora Hoe... Tokony Hipetraka any Andafy ve Aho?” (8 Jolay 2000). Namaky tsy tapaka io fitohitohizan-dahatsoratra io aho, nefa mazàna aho no nahatsapa fa tafahoatra loatra ny filazalazanareo ny sasany amin’ireo loza entin’izany. Tamin’ny taon-dasa anefa, dia nankany andafy aho mba hisian’ny fifanakalozana ara-kolontsaina teo amin’ny sekoly nisy ahy sy ny oniversite iray hafa. Na dia nahaliana aza ilay izy, dia tsy mahasoa raha eo amin’ny lafiny ara-panahy.

M. P., Italia

Io lahatsoratra io sy ilay hoe “Manontany ny Tanora Hoe... Ahoana no Hampizotra Tsara ny Fijanonako any Andafy?” (8 Aogositra 2000), dia ‘sakafo amin’ny fotoana mety’ ho ahy. (Matio 24:45, NW ). Efa nanapa-kevitra ny handany herintaona tany andafy aho mba hianarana teny vahiny. Koa tena velom-pankasitrahana aho noho ireo fanoloran-kevitra sy ireo torohevitra azo ampiharina.

I. Z., Soisa

Nosin’ny Paka Ilay lahatsoratra hoe “Lesona Lehibe Iray avy Amin’ny Nosy Bitika Iray” (8 Jolay 2000), dia mampiseho ny fanahian’ny olona maro ny amin’ny tontolo iainana. Heveriko anefa fa vitsivitsy ihany ireo izay mahamarika ireo loza atrehintsika. Latsa-dranomaso aho rehefa mieritreritra ny tena tsy fahaizan’ny olona nitantana ny tany.

K. M., Japon

Mitsikia Misaotra noho ny namoahanareo ilay lahatsoratra sarobidy hoe “Mitsikia — Mahasoa Anao Izany!” (8 Jolay 2000). Tena miombon-kevitra amin’izay lazainy aho. Mampahatsiahy ahy mba hijery lafy tsaran-javatra amin’ny fotoana rehetra izy io mba ho avy amin’ny fo ny fitsikiko. Eny, manampy antsika hahazo namana ny fitsikiana. Manampy mba hanafoanana ny fihenjanana koa izy io.

P. C., Chine