Avy Amin’ny Mpamaky

Zava-manahirana ny Ankizy Tena nanohina ny foko ireo lahatsoratra momba ny hoe: “Ny Olana Mahazo ny Ankizy—Ny Vahaolana Rehefa Ela ny Ela!” (8 Desambra 2000) Fahatsiarovana mampalahelo ho ahy ny fahazazako. Mpisotro toaka ny reniko, ary nampijaly ahy saika isan’andro. Rehefa nandeha ny fotoana, dia nanjary kivy tanteraka aho, ary matetika aho no naniry ho faty mihitsy. Nampahatsiahy ahy ny maha zava-dehibe ny fatorana mampiray ny ray aman-dreny sy ny zanaka ireo lahatsoratra ireo. Tsapako ankehitriny ny fitiavan’i Jehovah ahy, ka miezaka aho hahazo kokoa ny fihevitry ny reniko; mba nijaly toy izany koa izy tamin’ny fahazazany.

U. P., Repoblikan’i Korea

Mpampianatra avy any Arzantina aho. Heveriko fa hahafinaritra raha toa ny ray aman-dreny sy ny mpampianatra rehetra ka mampihatra ny torohevitra ao amin’io lahatsoratra io—sy ny ao amin’ny Baiboly, izay hamafisinareo aoka izany.

F. S., Espaina

Yellowstone Tena tsara ilay lahatsoratrareo hoe: “Yellowstone—Ambohipihaonan’ny Rano sy ny Vato ary ny Afo”! (8 Aprily 2001) Faly erỳ izaho sy ny vadiko niasa tao amin’io valan-javaboary io, tamin’ny herintaona. Ny vadiko nanangona ny fikarohana tamin’ny ordinatera, izaho kosa naka ny refin’ireo heniheny sy nanao sarintany. Koa raha voa nivoaka àry ilay lahatsoratra, dia tena nientam-po izahay, ka namaky azy io avy hatrany. Izany ka lahatsoratra tsara dia tsara! Voafantina tsara ireo sary, ary fikarohana lalina no nataonareo. Marina amin’ny lafiny rehetra ireo fanazavana. Tsy maintsy mankany sy mijery ilay toerana anefa ianao, vao tena hahita ny hakantony!

D. S., Etazonia