Ho Salama Tsara ve ny Rehetra Indray Andro Any?
IRINAO ho salama kokoa ve ianao sy ny fianakavianao? Maniry izany tokoa ianao, nefa dia mararirary ny ankamaroantsika indraindray, ary olona an-tapitrisany maro mihitsy aza no manana aretina mitaiza.
Niady mafy tamin’ny aretina foana ny olombelona. Nanao izany, ohatra, ny Fikambanana Iraisam-pirenena Momba ny Fahasalamana (OMS), anisan’ny sampan’ny Firenena Mikambana. Nanao konferansa ny OMS tamin’ny 1978, ka nanatrika izany ny solontena avy tamin’ny tany 134 sy sampana 67 ao amin’ny Firenena Mikambana. Nanaiky izy ireo fa tsy vitan’ny hoe tsy manana aretina fotsiny ny atao hoe salama. Salama, hoy izy ireo, ny olona iray, raha “salama ara-batana sy ara-tsaina ary manana fifandraisana tsara amin’ny hafa”. Avy eo, dia sahy nanambara ireo mpanatrika io konferansa io fa “zo fototry ny olombelona” ny fahasalamana! Noho izany, dia napetraky ny OMS ho zava-kendrena ny hoe hanana “fahasalamana antoniny ny mponina maneran-tany”.
Tsara izany zava-kendrena izany, ary tena ambony mihitsy aza. Mety ho tanteraka anefa ve izany? Ny fitsaboana tokoa no iray amin’ireo sampam-pahaizan’ny olombelona nitokisana sy tiana indrindra. Araka ilay gazety anglisy hoe Ny Eoropeanina, ny mponina any amin’ny tany tandrefana dia nanjary “zatra an’ilay fiheverana momba ny ‘fanasitranana eo noho eo’: pilina iray mahasitrana aretina iray”. Amin’ny teny hafa dia hoe manantena fanafody iray isaky ny aretina isika mba hanasitrana vetivety. Afaka manatanteraka izany fanantenana be izany ve ny fitsaboana?