Manafika ny Horohoro

“Mangina ianao, fa raha tsy izany tsindroniko ny antsy!”

NIKORISARISA tamin’ny kiraro misy kodiarana teo amin’ny zaridainam-panjakana tany Virginie, any Etazonia, i Jane,a Vavolombelon’i Jehovah, 17 taona, indray tolakandro. Vetivety teo dia toa tsy nisy olona intsony teo amin’ilay zaridaina, ka tapa-kevitra ny hody izy. Nipetraka nanala ny kirarony teo akaikin’ny fiarany izy, no indro nisy lehilahy tsy fantany nanatona azy. Nampitahotra azy araka ny voalaza etsy ambony ilay lehilahy, sady nangataka hanao firaisana taminy, nibeda azy, ary nanandrana nanosika azy hiditra tao anaty fiara. Nikiakiaka mafy araka izay fara heriny izy, kanefa tsy natahotra an’izany ilay lehilahy.

Hoy i Jane tatỳ aoriana: “Nahatsiaro ho tsy afa-nanoatra mihitsy aho. Toy ny atody niady amam-bato aho. Nikiakiaka sy nikofokofoka foana anefa aho. Farany, dia niantso an’Andriamanitra aho hoe: ‘Jehovah ô! Aza avela ho voan’izany re aho e!’” Izay no toa nahataitra an’ilay mpanafika, ka navelany tampoka i Jane, ary lasa izy nandositra.

Nohidian’i Jane avy tao anatiny ny fiarany, rehefa lasa namonjy ny fiarany ilay saika hametaveta azy. Niezaka mafy ho tony i Jane rehefa naka ny telefaoniny fitondra mandeha. Niantso polisy izy ary nanome filazalazana marina momba ny fiaran’ilay lehilahy sy ny nomeraony, ka voasambotra izy io minitra vitsy taorian’izay.

Tsara fiafara ve?

Eny, nefa tsy tsara fiafara avy hatrany. Vao nanomboka teo mantsy ny fahorian’i Jane. Noderain’ny polisy sy ny gazety izy satria nieritreritra tsara sy haingana taorian’ilay fanafihana. Tsy afaka nieritreritra tsara toy izany intsony anefa i Jane, rehefa lasa ilay fahatairana tamin’ny voalohany. Hoy izy: “Nanomboka kivy be aho, rehefa afaka herinandro vitsivitsy. Natahotra be foana aho, ka tsy nahita tory. Tsy afaka nianatra sy nifantoka intsony aho, herinandro maromaro taorian’izany. Lasa mora matahotra sy taitra koa aho. Nisy ankizilahy nitovitovy tamin’ilay nanafika ahy tany am-pianarana. Nikitika ny soroko mba hanontany ora tamiko fotsiny izy, dia efa toran-kovitra aho.”

Hoy i Jane: “Tena nalahelo be aho. Tsy nifandray tamin’ny namako intsony aho, ary vao mainka nanampy trotraka ny fahakiviako ny fahatsiarovana ho manirery. Nomeko tsiny ny tenako, satria nolazaiko fa namela ahy hotafihin’ilay olona; nanembona ny fahasambarako sy ny fitokisan’ny olona ahy taloha aho. Toy ny efa maty io izaho taloha io tamiko.”

Narary noho ny tahotra mafy vokatry ny zavatra nanjo azy i Jane. Inona no tena manjo ny olona toy izany, ary ahoana no anampiana azy ireny? Hamaly izany ny lahatsoratra manaraka.

[Fanamarihana ambany pejy]