Tandremo ny Fanafody

AVY AMIN’NY MPANORATRA NY MIFOHAZA! ATSY AFRIKA ATSIMO

AZO antoka fa mihevitra izay hahasoa anao ny dokotera rehefa manome taratasim-panafody. Miorina amin’izay famantarana aretina hitany sy ny fahaizana ananany ary ny fahazarany mitsabo no anoratany ilay taratasim-panafody. Tsy tokony hihevitra anefa ilay marary fa ny dokotera no tena tompon’andraikitra amin’ny fahasalamany. Ilay marary kosa no tsy maintsy manapa-kevitra ny amin’izay fanafody hampiasainy.

Ireto misy toro lalana mahasoa nomen’ny dokotera iray rehefa hampiasa fanafody ianao:

● Miteraka vokany hafa avokoa ny fanafody rehetra. Zonao ny mahafantatra hoe fanafody inona no omena anao ary vokany hafa inona avy no mety haterak’izy io. Aza misalasala manontany raha tsy manazava izany aminao ny dokoteranao. Amin’ny ankapobeny dia betsaka kokoa noho ny vokany hafa ny tombontsoa azo avy amin’ilay fanafody. Mila mahafantatra izany anefa ianao mba hahafahanao handray fanapahan-kevitra tsara.

● Tsy mitovy ny fiasan’ny fanafody amin’ny olona tsirairay. Tsy afaka milaza mialoha ny dokotera hoe inona avy no mety ho vokatry ny fanafody iray eo aminao. Koa raha vao hitanao fa misy vokany hafa miseho, dia manatòna ilay dokotera.

● Fantaro hoe hafiriana no tokony hampiasanao ilay fanafody, ary diniho raha mety ho lasa handevozin’ilay izy ianao.

● Aza ajanona aloha loatra ilay fanafody na dia efa mahatsiaro ho tsaratsara aza ianao, fa vao mainka mety haharatsy ny fahasalamanao izany. Aleo manontany ny dokotera, alohan’ny hanaovanao izany.

● Mila ny fanaraha-mason’ny dokotera foana ny fampiasana fanafody.