Manontany ny Tanora Hoe . . .

Ratsy ve ny Mitsabaka Amin’ny Asan’ny Maizina?

TENA liana amin’ny asan’ny maizina ve ny zatovo? Nanadinadina mpianatra tao amin’ny sekoly ambaratonga voalohany sy faharoa niisa 115, ny mpikaroka vitsivitsy, mba hamantarana izany. Mahaliana izao vokatr’ilay fanadihadiana izao: Nilaza fa liana tamin’ny asan’ny maizina ny antsasany mahery tamin’ireo nadinadinina (54 isan-jato), fa nilaza ho “tena liana” kosa ny ampahefany (26 isan-jato).

Hoy ny mpikaroka ao amin’ny Oniversiten’i Alaska, any Anchorage: “Tato anatin’ireo taona faramparany, dia nihabetsaka ireo lahatsoratra an-gazety milaza fa tena nahazo vahana ny fivavahana amin’i Satana...” Milaza ny manam-pahaizana fa tsy voaporofo raha mihabetsaka araka ny filazan’ny sasany tokoa ireo tanora mivavaka amin’i Satana. Azo antoka anefa fa maro ny tanora liana amin’ireo endriky ny fivavahana amin’i Satana sy ny asan’ny maizina, na dia miserana ihany aza izany fahalianana izany.

Mety hisy àry tanora hanontany hoe: ‘Ratsy ve ny mitsabaka amin’ny asan’ny maizina?’ Mba hamaliana izany, dia hojerentsika ny antony mahatonga ny tanora ho tafalatsaka ao amin’ny asan’ny maizina.

Manintona ny asan’ny maizina

Hoy ny gazety Vaovaon’i Etazonia & Tatitra Momba An’izao Tontolo Izao (anglisy): “Mahavaka ny saina sady mampanahy ny habetsahan’ny sary sy fanazavana azo jerena sy jeren’ny ankizy sy ny zatovo ankehitriny. Tsy nisy nieritreritra izany akory 20 taona lasa izay.” Te hahafanta-javatra ny tanora maro ka mamaky boky, mijery vidéo, na mikarokaroka ao amin’ny Internet, izay miresaka momba ny asan’ny maizina.

Araka ny Vaovaon’ny BBC Amin’ny Internet, dia “heverina fa mahatonga ny ankizy ho liana amin’ny filalaovana ody” ny fandaharana be mpitia ao amin’ny tele, misy filalaovana ody sy vampira. Miresaka herisetra na loha hevitra mifandray amin’ny demonia ny karazana rock mavesatra sasany (heavy metal). Nanoratra toy izao, tao amin’ny gazetin’i Toronto Ny Kintana Alahady (anglisy), i Tom Harpur: ‘Tsy maintsy mampitandrina mafy dia mafy momba izay mitranga [eo amin’ny mozika] aho. ... Mbola tsy nahita zava-dratsy toy izany aho. Ireto no mibahana ao amin’ireo hira ireo: fahavoazan’ny saina, ireo demonia sy ireo misy demonia, fandatsahan-dra, fanozonana, herisetra isan-karazany, anisan’izany ny fisavihana, fanapahana ny rantsambatan’ny tena, famonoana olona ary famonoan-tena. Fahafatesana sy fandringanana, faminaniana loza, fandavana ny zavatra tsara rehetra ary fanekena ny zavatra ratsy sy maharikoriko rehetra.’

Mahatonga ny olona hanana fitondran-tena manimba tokoa ve ny fihainoana mozika toy izany? Izany tokoa no nitranga tamin’ny olona iray, fara fahakeliny, tany Etazonia: Notsatohan’ny tanora iray 14 taona tamin’ny antsy ny reniny ary namono tena izy avy eo. Feno sarina mpanao rock mavesatra ny rindrin’ny efitranony. Nitalaho toy izao ny rainy taorian’izay: “Ilazao ny ray aman-dreny mba hanara-maso ny mozika henoin’ny zanany.” Nilaza izy fa nisy hira rock iray tsy afaka tao am-bavan’ny zanany ny herinandro talohan’ny namonoany an-dreniny, ka “resaka ra sy famonoana ny reninao” no tao amin’izy io.

Misy koa jeux de rôle (lalao akana ny toeran’olon-kafa) mamela ny mpilalao haka ny toeran’ny mpamosavy sy ny olon-kafa mpanao asan’ny maizina. Miresaka momba ny herisetran’ny demonia ny ankabeazany.a

Nisy anefa fikambanana mpanao fikarohana nilaza hoe: “Nasehon’ny fanadihadiana fa mety hitokantokana, hidoroka zava-mahadomelina, harary saina, hatahorana hamono tena, . . . na hanana fitondran-tena mety hampidi-doza raha mbola zatovo, ny tanora tia mozika rock mavesatra. Tsy ny mozika anefa no nahatonga ireny. Heverina fa ny tanora efa miatrika ireo olana ireo no mety ho voasinton’ny mozika rock mavesatra, satria miresaka momba ny fanahian’izy ireo ny tonon’ireo hira ireo.”

Tsy ny mpikaroka rehetra anefa no mety hanaiky fa mampidi-doza ny mihaino mozika feno habibiana. Tsy hampidi-doza mihitsy ve anefa ny fahazarana mijery vidéo na mihaino mozika na manao lalao, izay mampirisika fanaovana herisetra sy famonoan-tena? Ratsy kokoa noho izany anefa ny loza ateraky ny fitsabahana amin’ny asan’ny maizina ho an’ny Kristianina.

Ny fiheveran’Andriamanitra ny asan’ny maizina

Nampitandrina ny Kristianina toy izao i Paoly ao amin’ny 1 Korintiana 10:20: “Tsy tiako ho mpiombona amin’ny demonia ianareo.” Iza anefa ny demonia, ary nahoana no mampidi-doza be ny fifandraisana aminy? Raha tsorina, dia anjely fahiny, ninia nanaraka an’i Satana Devoly ny demonia. “Mpanohitra” no dikan’ny hoe Satana, ary “Mpanendrikendrika” no dikan’ny hoe Devoly. Milaza ny Baiboly fa nanao ny tenany ho mpanohitra sy mpanendrikendrika io anjely zanak’Andriamanitra fahiny io, satria ninia nikomy tamin’Andriamanitra. Nitaona anjely hafa hiara-mikomy aminy izy, rehefa nandeha ny fotoana. Ireo namany ireo no lasa demonia.—Genesisy 3:1-15; 6:1-4; Joda 6.

Nantsoin’i Jesosy hoe “ny andrianan’izao tontolo izao” i Satana. (Jaona 12:31) Manana “fahatezerana lehibe” i Satana sy ireo demoniany satria efa haringana. (Apokalypsy 12:9-12) Tsy mahagaga raha tsapan’ireo nifandray tamin’ny fanahy ratsy hoe feno habibiana ireo demonia. Nifandray tamin’ny fanahy ratsy ny fianakavian’ny vehivavy iray tany Suriname, ka hitany tsara fa ‘tian’ny demonia ny nampijaly ireo olona nasiany nefa nanohitra.’b Tena faran’izay mampidi-doza àry ny fifandraisana amin’ireny fanahy ratsy ireny, na amin’ny fomba ahoana, na amin’ny fomba ahoana!

Noho izany àry, dia nodidian’Andriamanitra mba hanalavitra ny asan’ny maizina rehetra ny Isiraelita, vahoakany fahiny. Mampitandrina ny Deoteronomia 18:10-12 fa “fahavetavetana eo imason’i Jehovah izay rehetra manao izany zavatra izany.” Nampitandremana koa ny Kristianina fa horinganin’Andriamanitra “ny mpanao ody ratsy.” (Apokalypsy 21:8) Melohin’Andriamanitra na dia ny fitsabahana amin’ny asan’ny maizina aza. Mandidy toy izao ny Baiboly: “Aza manendry izay zavatra tsy madio.”—2 Korintiana 6:17.

Fialana amin’ny asan’ny maizina

Efa nitsabaka tamin’ny asan’ny maizina ve ianao? Raha izany no izy, dia diniho izay nitranga tany Efesosy tamin’ny taonjato voalohany. Be “mpanao ody” tany amin’io tanàna io. Voatohina anefa ny fon’ny sasany, rehefa nahita ny asa mahagaga nataon’ny apostoly Paoly noho ny fanampian’ny fanahy masina. Ny vokany? “Maro ny mpanao ody no nanangona ny bokiny ka nandoro azy teo imason’ny olona rehetra; ary nony voatontaly ny tokom-bidiny, dia hita fa volafotsy dimy alina izany. Fatratra toy izany no fandroson’ny tenin’Andriamanitra sy ny heriny.”—Asan’ny Apostoly 19:11-20.

Inona no hevitr’izany ho antsika? Rehefa tsy te hogejain’ny demonia intsony ny olona iray dia tsy maintsy potehiny avokoa ny zava-drehetra misy ifandraisana amin’ny fivavahana amin’i Satana! Tafiditra amin’izany ny boky, sary, boky misy tantara an-tsary, vidéo, ody atao fiaro, fanazavana misy ifandraisana amin’ny demonia ao amin’ny Internet. (Deoteronomia 7:25, 26) Ario izay zavatra mety ho nampiasaina tamin’ny fanaovana sikidy, toy ny bola kristaly na takelaka Oui-ja. Ario koa ny mozika na vidéo izay misy firesahana an’i Satana.

Mitaky herim-po sy fahatapahan-kevitra izany. Betsaka anefa ny valisoa miandry. Nividy lalao amin’ny ordinatera i Jean.c Toa tsy ratsy ilay izy tamin’ny voalohany, nefa rehefa lasa lavidavitra tamin’ilay lalao izy, dia nahita fa somary niresaka fanahy ratsy ilay izy. Tsy ela dia nanomboka nanonofy ratsy izy ary nampihoron-koditra ny nofiny! “Nifoha tamin’ny misasakalina aho”, hoy i Jean, “ka nopotehiko ilay kilalao.” Ny vokany? “Tsy nisy nanakorontana ahy intsony hatramin’izay.”

Hahomby ianao raha mampiseho fa tena tapa-kevitra ny hiala amin’ny fanahy ratsy. Tsarovy fa tena tapa-kevitra ny tsy hiankohoka teo anatrehan’ny Devoly i Jesosy, rehefa nanandrana hamitaka azy izy io. “Hoy Jesosy taminy: Mandehana hianao, ry Satana; fa voasoratra hoe: ‘Jehovah Andriamanitrao no hiankohofanao, ary Izy irery ihany no hotompoinao.’ Dia nandao Azy ny devoly.”—Matio 4:8-11.

Aza miady irery

Nampahatsiahy antsika ny apostoly Paoly fa “mitolona ... amin’ny fanahy ratsy eny amin’ny rivotra” ny Kristianina rehetra. (Efesiana 6:12) Aza manandrana miady irery amin’i Satana sy ny demoniany anefa. Mitadiava fanampiana avy amin’ireo ray aman-dreninao matahotra an’Andriamanitra sy ny anti-panahy ao amin’ny fiangonana kristianina eo an-toerana. Mety ho menatra ianao hibaboka fa nifandrairay tamin’ny fanahy ratsy, nefa afaka ny hahazo fanampiana izay tena ilainao ianao.—Jakoba 5:14, 15.

Tadidio koa fa hoy ny Baiboly: “Manohera ny devoly, dia handositra anareo izy. Manatòna an’Andriamanitra, dia hanatona anareo Izy.” (Jakoba 4:7, 8) Eny, hanampy anao i Jehovah Andriamanitra! Hanampy anao hiala amin’ny fandriky ny asan’ny maizina izy.

[Fanamarihana ambany pejy]

[Sary, pejy 26]

Ario ny zavatra rehetra misy ifandraisana amin’ny fivavahana amin’i Satana

[Efajoro, pejy 26]

Tandremo ireo toerana ao amin’ny Internet izay mampirisika ny fifandraisana amin’ny fanahy ratsy