Mety Hisy ve ny Tena Fiarovana?

NANAMBARA toy izao indray mandeha ilay mpamorona lahatsoratra atao hoe Ralph Waldo Emerson: “Ireo lehilahy marivo salosina dia mino ny vintana (...) Ireo lehilahy mahery dia mino ny fisian’ny antony sy ny vokany.” Eny, ny olona iray mino ny herin’ny ody atao fiaro sy ny ody mahatsara vintana dia manolotra ny fifehezana ny fiainany ho an’ireo hery tsy hita maso. Laviny ny fandrindran-kevitra sy ny fahaiza-misaina, ary resin’ny tahotra tsy azon’ny saina ekena sy feno finoanoam-poana izy.

Ny Baiboly anefa dia afaka manafaka ny olona amin’ny tahotra toy izany. Asehony fa ny ody atao fiaro sy ny ody dia tsy mahefa na inona na inona, tsy misy heriny. Ahoana no anehoany izany? Araka ny The New Encyclopædia Britannica, “ny ody atao fiaro dia heverina fa mahazo hery avy amin’ny fifandraisany amin’ireo hery araka ny natiora [ankoatra ny zavatra hafa]”. Mety ho ‘ny fanahin’ny maty’ na ‘ny herin’ny vintana’ ireny hery ireny. Asehon’ny Baiboly mazava tsara anefa, fa ny maty dia “tsy mba mahalala na inona na inona”. (Mpitoriteny 9:5). Noho izany, dia tsy misy fanahin’ny maty afaka manampy na manisy ratsy ny velona; ary tsy misy koa hery tsy hita maso toy ny vintana afaka miasa ho anao.

Tamin’ny andron’ny Baiboly, dia nomelohin’Andriamanitra ireo izay nandao azy, ireo izay nanadino ny tendrombohiny masina, ireo izay “mamelatra latabatra ho an’i [Zara] sy mampidina divay noharoharoan-javatra ho an’i [Vintana]”. Tsy mahazo fiarovana ireny mpomba ny vintana ireny fa voatolotra ho amin’ny fandringanana kosa. “Hotendreko ho voan’ny sabatra hianareo”, hoy i Jehovah Andriamanitra. — Isaia 65:11, 12, fanamarihana ambany pejy.

Tamin’ny fampiasana ireo fanao ara-majika, ilay firenen’i Babylona fahiny dia nino toy izany koa ny fiarovan’ireo hery mifono zava-miafina. Na dia izany aza anefa, dia nahita loza i Babylona. “Mikiriza ao amin’ny fankatovanao sy ny filalaovanao ody mahatsiravina”, hoy ny mpaminany Isaia nihaika. “Angamba afaka mahazo fanampiana avy amin’ireo ianao (...) Tsy izany anefa! Na dia eo aza ireo fitapitaka maro be ataonao dia tsy manan-kery ianao.” (Isaia 47:12, 13, The New English Bible). Tatỳ aoriana io firenena io dia fongana tanteraka. Hita ho tsinontsinona ny finoana ny asan’ny maizina. Toy izany koa fa tsy misy ody atao fiaro, na ody afaka manao na inona na inona mba hanampiana anao na hiarovana anao.

Endri-panompoan-tsampy iray

Na dia izany aza, dia mety ho hitan’ny sasany fa tsy misy fanimbana entin’ny fitondrana vato kristaly iray, na tongotra rabitro iray, na meday ara-pivavahana iray. Moa ve izy ireny tsy kojakojan-javatra fotsiny tsy mitondra fanimbana? Tsy izany no izy, araka ny Baiboly. Lazainy fa ireo zavatra izay fananan’ny asan’ny maizina dia faran’izay mitondra fanimbana.

Ny fampiasana ody atao fiaro dia endri-panompoan-tsampy iray — zavatra izay melohina mazava ao amin’ny Tenin’Andriamanitra. (Eksodosy 20:4, 5). Marina fa ny olona iray dia mety tsy hihevitra hoe manolotra fanompoam-pivavahana mivantana amin’ny ody atao fiaro iray na ody iray izy. Kanefa moa ve tsy mampiseho fihetsika feno fanajana sy fanompoam-pivavahana amin’ireo herin’ny maizina tsy hita maso ny tena raha manana iray monja amin’izany? Ary moa ve tsy marina fa misy fiheverana mampiseho fanompoam-pivavahana (toy ny fanorohana) atao matetika amin’ireo ody mihitsy? Ny Baiboly anefa dia manoro hevitra ny Kristiana toy izao ao amin’ny 1 Jaona 5:21: “Arovy ny tenanareo amin’ny sampy”. Moa ve izany tsy mahatafiditra ireo zavatra heverina ho ody na ody atao fiaro?

Ny fandriky ny asan’ny maizina

Amin’ny alalan’ny fampiasana ody atao fiaro, dia maro koa no manjary voafandriky ny asan’ny maizina. Marina fa mety hitondra vato kristaly iray na ranom-panafody ara-majika ny sasany noho ny fomba fanao, fa tsy noho fiekena mafy. Kanefa toy ny mety hitarihan’ny filalaovana fitia amin’ny mpivaro-tena iray ho amin’ny fahazoana SIDA, ny filalaovana amin’ny asan’ny maizina koa dia mety hisy vokany mahatsiravina. Nisy antony tsara matoa Andriamanitra nandrara ny Isiraelita tsy hanao majika sy fankatovana ary fanandroana. “Zavatra maharikoriko eo imason’i Jehovah izay rehetra manao izany zavatra izany”, hoy ny fampitandreman’ny Baiboly. — Deoteronomia 18:10-14, NW.

Nahoana no natao io fandrarana henjana io? Satria ireo hery tsy hita maso ao ambadiky ny fanao toy izany dia tsy ny fanahin’ny maty na ny herin’ny vintana akory, fa i Satana Devoly sy ny demoniany.a Ary ny fampiasana ody atao fiaro dia mifamatotra mivantana amin’ny fivavahana amin’ny demonia. Hoy ny Vine’s Expository Dictionary of Old and New Testament Words: “Amin’ny filalaovana ody, ny fampiasana zava-mahadomelina, na tsotra izany na mahery, dia mazàna arahin’ny fanaovana teniteny ara-majika sy ny fiantsoana ireo herin’ny maizina, arahin’ny fanampian’ireo ody sy ody atao fiaro isan-karazany, sns.”

Ny olona iray manana ody àry dia misangisangy amin’ny spiritisma. Mety ho tonga eo ambanin’ny hery sy fifehezana mahatahotr’ilay “andriamanitr’izao tontolo izao” — i Satana Devoly, izy. (2 Korintiana 4:4). Misy antony tsara àry matoa ny Baiboly mandidy antsika hanalavitra izay endriky ny spiritisma rehetra. — Galatiana 5:19-21.

Fanafahan-tena amin’ny finoanoam-poana

Na dia izany aza dia manao izao fanamarihana izao ny The World Book Encyclopedia: “Azo inoana fa hanana anjara eo amin’ny fiainana ny finoanoam-poana raha mbola samy mifampitahotra sy manana fisalasalana ny amin’ny hoavy ny olona.” Ny Vavolombelon’i Jehovah anefa dia manampy olona maro mba hanafa-tena amin’ny finoanoam-poana manimba. Izao no tsaroan’ny vehivavy iray atsy Afrika Atsimo: “Nokorontanin’ny fanahy ratsy aho, ary feno muti ny tranoko mba hiarovana ahy tamin’izy ireo.” Nanampy azy hahita ny loza entin’ny filalaovana amin’ny asan’ny maizina ny Vavolombelon’i Jehovah. Nanao ahoana ny fihetsiny? “Nanomboka nanary izay zavatra rehetra nananako ka nisy nifandraisany tamin’ny demonisma aho”, hoy izy. “Nihatsara ny fahasalamako. Nanolotra ny fiainako mba hanompo an’i Jehovah aho ary natao batisa.” Afaka amin’ny finoanoam-poana sy ny spiritisma izy izao.

Hevero koa ilay mpanao raokandro nizeriana izay nampifangaro ny fahaizany nanasitrana tamin’ny spiritisma. Araka ny mahazatra, dia noroahiny hiala ny tranony ny Vavolombelon’i Jehovah rehefa nitsidika, matetika tamin’ny fampiasana fandrahonana sy fanozonana. Indray mandeha aza dia nanomana ranom-panafody manokana mihitsy izy, nilaza teniteny ara-majika teo amin’izany ary namafy ilay izy teny amin’ny tarehin’ny Vavolombelona iray! “Ho faty ianao rehefa afaka fito andro!” hoy izy nikiakiaka. Fito andro tatỳ aoriana dia niverina ilay Vavolombelona, ka nahatonga an’ilay mpanao raokandro hihazakazaka nivoaka ny trano mba hijery, noho izy nino fa nahita matoatoa! Koa satria niharihary izao fa tsy nisy nilana azy ny majikany, dia nanaiky fampianarana ny Baiboly izy ary tatỳ aoriana dia tonga Vavolombelona koa ny tenany.

Afaka manafaka ny tenanao amin’ny famatopatoran’ny tahotra sy ny finoanoam-poana koa ianao. Ekena fa mety tsy ho mora izany. Angamba ianao nobeazina tao amin’ny kolontsaina iray isian’ny fampiasana ody atao fiaro sy ody toy ny zavatra mahazatra. Niatrika zava-tsarotra toy izany ireo Kristiana tany Efesosy fahizay. Niaina tao anatin’ny kolontsaina iray nandairan’ny spiritisma be dia be izy ireo. Inona no nataon’izy ireo rehefa nianatra ny Tenin’Andriamanitra? Hoy ny Baiboly: “Ary maro ny mpanao ody no nanangona ny bokiny ka nandoro azy teo imason’ny olona rehetra; ary nony voatontaly ny tokom-bidiny, dia hita fa volafotsy dimy alina izany.” — Asan’ny Apostoly 19:19.

Fahazoana ny fiarovan’Andriamanitra

Raha manaisotra amin’ny tenanao ireo sisan-javatra rehetra an’ny asan’ny maizina ianao, moa ve ianao ho tavela tsy hisy fiarovana? Mifanohitra amin’izany fa “Andriamanitra no aro sy hery ho antsika; mpamonjy mora azo indrindra amin’ny fahoriana Izy”. (Salamo 46:1). Hiseho indrindra ny fiarovan’Andriamanitra rehefa handrava an’itỳ fandehan-javatra ratsy itỳ izy. “Fantatry ny Tompo [“Jehovah”, NW ] izay hamonjeny ny tsara fanahy amin’ny fakam-panahy sy ny hitehirizany ny olona tsy marina amin’ny [fandringanana, NW ] ho amin’ny andro fitsarana”. — 2 Petera 2:9; ampitahao amin’ny Salamo 37:40.

Mandra-pahatongan’izany, ‘ny fotoana sy ny sampona dia samy mahazo antsika rehetra’. (Mpitoriteny 9:11). Tsy mampanantena akory Andriamanitra hoe hanana fiainana voaro amin’ny fahasahiranana rehetra ny mpanompony, na hoe hiaro azy ireo amin’ny fahavoazana manokana rehetra izy. Na dia izany aza, dia mampanantena tokoa ny hiaro ny fiainantsika ara-panahy sy ny fifandraisantsika aminy izy. (Salamo 91:1-9). Amin’ny fomba ahoana? Voalohany, dia manome antsika lalàna sy fotopoto-pitsipika izay afaka mitondra soa ho antsika sy miaro antsika amin’ny fitaomana manimban’i Satana, izy. (Isaia 48:17). Amin’ny fahazoantsika fahalalana ny amin’ireo lalan’i Jehovah, ‘dia hiaro antsika ny fisainana mazava, ary hiambina antsika ny fahalalana’ — hiaro amin’ireo fanaovan-javatra tsy mahasoa na manimba, ohatra. — Ohabolana 2:11.

Fomba hafa iray iarovan’Andriamanitra antsika ny fanomezany “ny hery mihoatra noho ny mahazatra” amin’ny fotoam-pisedrana. (2 Korintiana 4:7, NW ). Ary rehefa mananontanona ny handifotra ny Kristiana iray ny tarehin-javatra, dia omeny ilay “fiadanan’Andriamanitra, izay mihoatra noho ny fahalalana rehetra” mba hiaro ny fo sy ny herin-tsaina. (Filipiana 4:7). Eny, ny Kristiana dia ampy fitaovana mba “hifahatra amin’ny fanangolen’ny devoly”. — Efesiana 6:11-13.

Ahoana no ahafahanao mahazo izany fiarovana izany? Atombohy amin’ny fandraisana fahalalana an’i Jehovah sy i Jesosy Kristy Zanany. (Jaona 17:3). Afaka manao zavatra betsaka ny Vavolombelon’i Jehovah mba hanampiana anao amin’ireo lafiny ireo. Eo am-pambolena fifandraisana mafana amin’i Jehovah, dia hanomboka hanandrana ny fiarovany feno hatsaram-panahy ianao. Niteny toy izao Andriamanitra, araka ny vakintsika ao amin’ny Salamo 91:14: “Satria Izaho no niraiketan’ny fitiavany, dia hamonjy azy Aho; hanandratra azy ho any amin’ny avo Aho, satria mahalala ny anarako izy.”

Tsy azo lavina fa, raha tsy mivadika aminy ianao, dia hitahy anao Andriamanitra amin’ny farany, amin’ny fiainana mandrakizay ao amin’ilay tontolo vaovao ho avy. Manome antoka toy izao i Jehovah mikasika ireo izay hiaina amin’izany fotoana izany: “Tsy hisy hanaitaitra azy; fa ny vavan’i Jehovah, Tompon’ny maro, no efa niteny.” (Mika 4:4). Tsy hisy intsony ny aretina sy ny fahafatesana. (Apokalypsy 21:4). Na dia amin’izao fotoana izao aza anefa, dia afaka mankafy tsy fananana ahiahy amin’ny fetrany antonony ianao, raha mamboly fifandraisana akaiky amin’i Jehovah. Sahala amin’ny mpanao salamo, dia ho afaka hilaza ianao hoe: “Ny famonjena ahy dia avy amin’i Jehovah, Mpanao ny lanitra sy ny tany.” — Salamo 121:2.

[Fanamarihana ambany pejy]

[Sary, pejy 6]

Nanary izay zavatra rehetra nifandray tamin’ny asan’ny maizina ireo Kristiana tany Efesosy

[Sary, pejy 7]

Eo ambanin’ny Fanjakan’Andriamanitra, dia tsy hisy tahotra intsony