Mbola Aorina any Azia Ihany ny Trano Avo Be

“Enina izao ny tranobe manaka-danitra kasaina haorina, izay mbola ho avo noho ilay tranobe nampiaiky volana teo aloha, dia ny Foibe Ara-barotra Iraisam-pirenena mirefy [419 metatra]”, hoy Ny Gazetin’i Wall Street (anglisy). “Any Azia avokoa izy rehetra ireo.” Nanampy teny toy izao io gazety io: “Efa 20 taona izay no nitiavan’ny olona tranobe, ary mbola mitohy foana izany.”

Handravaka ny faravodilanitr’i Chine sy Korea ary Taïwan ireo trano mijoalajoala ireo. “Efa raiki-tampisaka ao an-tsain’ny olombelona ny faniriana hanakatra ny lanitra”, hoy i Cesar Pelli. Izy no nanao ny mari-tranon’ireo trano roa avo indrindra amin’izao fotoana izao, dia ny Tranobe Kambana Petronas, any Kuala Lumpur, Malezia. “Te hanorina zavatra mijoalajoala foana ny olona hatramin’ny nanorenana ny Tilikambon’i Babela.”

Manamafy ny aro loza ny injeniera. Asiana rihana tsy misy na inona na inona, ifamezivezen’ny rivotra, ohatra, isaky ny rihana 10 ka hatramin’ny 12. Hamafisina koa ny faritra afovoany misy ny tohatra sy ny milina misolo tohatra, na ascenseur. Asiana tanjany vy mampifandray an’io faritra io amin’ny andrin-trano na amin’ny rindrina manodidina. Asiana tohatra fanampiny handehanan’ny olona raha sendra may ilay trano. Atao mihalehibe ireo tohatra ireo mandra-pahatongany any amin’ny farany ambany amin’ilay trano, mba ho azon’ny olona maro kokoa andehanana.

Trano azo onenana 20 eo ho eo izao no mihoatra ny 300 metatra eto an-tany, ary any Azia avokoa ny antsasany mahery amin’izy ireo. “Miaiky anefa ny manam-pahaizana, fa tsy hita izay antony tena ilana trano misy rihana mihoatra ny 60”, hoy ihany ny Gazety.

[Sary, pejy 18]

Ny Tranobe Petronas, 452 metatra, no avo indrindra eran-tany

[Tabilao/Sary, pejy 18]

(Jereo ny gazety)

Tsy tafiditra amin’ny haavon’ny trano ny antenina.

Piramidan’i Khéphren, Guizèh, Ejipta 143 metatra 2500 T.K.

Tour Eiffel, Paris, Frantsa 300 metatra 1889

Tranobe T & C, Kaohsiung, Taïwan 348 metatra 1997

Bankin’i Chine, Hong Kong, Chine 369 metatra 1989

Empire State Building, New York, Etazonia 381 metatra 1931

Sears Tower, Chicago, Etazonia 442 metatra 1974

Tranobe Petronas, Kuala Lumpur, Malezia 452 metatra 1997

Foibe Ara-bola Iraisam-pirenen’i Shanghaï, Shanghaï, Chine 460 metatra (Kasaina ho vita amin’ny 2007)

Foibe Ara-bolan’i Taipei, Taipei, Taïwan 508 metatra (Ho vita amin’ny 2003)

[Sary nahazoan-dalana]

Sary rehetra: Courtesy SkyscraperPage.com