FITEHIRIZAM-BOKIN’NY Vavolombelon'i Jehovah
FITEHIRIZAM-BOKIN’NY
Vavolombelon’i Jehovah
Malagasy
  • BAIBOLY
  • ZAVATRA MISY
  • FIVORIANA
  • g02 8/9 p. 9-11
  • Halaviro ny Fandriky ny Filokana

Tsy misy video mifandray amin’io.

Miala tsiny fa tsy mety miseho ilay video.

  • Halaviro ny Fandriky ny Filokana
  • Mifohaza!—2002
  • Lohatenikely
  • Mitovitovy Aminy
  • Nahazo tanjaka hiovana izy ireo
  • Nahoana no Ratsy ny Miloka?
    Mifohaza!—2002
  • Loka
    Mifohaza!—2015
  • Raran’ny Baiboly ve ny Filokana?
    Ny Tilikambo Fiambenana Manambara ny Fanjakan’i Jehovah—2011
  • Natao ho An’ny Kristiana ve ny Filokana?
    Mifohaza!—1995
Hijery Hafa
Mifohaza!—2002
g02 8/9 p. 9-11

Halaviro ny Fandriky ny Filokana

“Marina fa tsy nisy fiantraikany teo amin’ny fahasalamako ny filokana, ary haiko foana ny nametra ny vola laniko tamin’izy io. Ekeko anefa fa izay isa noheveriko ho nahatsara vintana ahy foana no nofidiko, isaky ny nilalao tamin’ny loteria aho.”—Linda.

MARO ny mpiloka no mino fa misy isa na zavatra hafa mahatsara vintana azy. Tsy tsapany akory angamba hoe lasa zava-dehibe amin’izy ireo ny finoanoam-poana toy ireny, kanefa mety hiantehitra amin’izy ireny foana izy.

Ny mpiloka sasany aza mivavaka amin’Andriamanitra mihitsy mba hanampy azy handresy amin’ilay lalao. Milaza anefa ny Baiboly fa melohin’Andriamanitra ireo milaza ho mpivavaka aminy nefa ‘mamelatra latabatra ho an’ny andriamanitry ny Vintana.’ (Isaia 65:11, fanamarihana ambany pejy) Halan’Andriamanitra tokoa ny fanao manindrahindra ny finoanoam-poana momba ny vintana. Raha ny marina, dia mampirisika ny olona hitoky an-jambany amin’ny vintana ny filokana.

Manindrahindra an-karihary ny fitiavam-bola koa ny filokana. Lasa andriamanitra kely izao ny vola, ho an’ny olona tsy tia zavatra ara-panahy, ary fomba be mpitia hanompoana azy io ny filokana. Ireo trano filokana lehibe indray izao no ataon’ny olona ho toy ny trano fiangonana, ary ny fanekem-pinoana vaovao ho azy ireo dia ny hoe: Tsara ny fitiavam-bola. Hitan’ireo mpikaroka fa tsy ny fialam-boly na ny fiainana any amin’ny trano filokana no lazain’ny ankamaroan’ny olona hoe mahasarika azy. Te hahazo “vola be” izy ireo, raha ny marina. Mampitandrina anefa ny Baiboly hoe: “Ny fitiavam-bola no fototry ny ratsy rehetra, koa ny sasany izay fatra-pitady izany dia efa voavily niala tamin’ny finoana ka nanindrona ny tenany tamin’ny alahelo be.”—1 Timoty 6:10.

Milaza mazava tsara ny Baiboly, ao amin’ny 1 Korintiana 6:9, 10, hoe: “Aza mety hofitahina hianareo: fa . . . ny mpanompo sampy . . . sy ny mpierina [na tia vola] . . . dia tsy mba handova ny fanjakan’Andriamanitra.” Tsy aretina mampahalemy ny firenena fotsiny ny fitiavam-bola, fa tena aretina mahafaty ara-panahy mihitsy. Misy fanafodiny anefa izy io.

Nahazo tanjaka hiovana izy ireo

“Imbetsaka aho no nanandrana niala tamin’ny filokana”, hoy i Kazushige, noresahina tao amin’ny lahatsoratra voalohany. “Tsapako fa nanapotika ny tokantranoko ny filokana niaraka tamin’ny namako, tany amin’ny kianja fanaovana hazakaza-tsoavaly. Laniko foana izay vola azoko. Hatramin’ny vola nangonin’ny vadiko hikarakarana ny fahaterahan’ny zanakay lahiaivo aza, dia laniko nilokana. Tamin’ny farany aza dia efa nangalako hilokana koa ny volan’ny orinasa niasako. Nanjary tsy nisy hajany intsony ny tenako. Nitomany sy nitalaho tamiko foana ny vadiko mba hialako tamin’ny filokana, nefa tsy nety afaka aho.”

Nanomboka nianatra Baiboly niaraka tamin’ny Vavolombelon’i Jehovah i Kazushige, ary hoy izy: “Arakaraka ny nianarako Baiboly, dia vao mainka aho natoky fa misy Andriamanitra ary hahasoa ahy ny mihaino azy. Vonona hiala tamin’ny filokana aho, tamin’ny alalan’ny hery avy amin’Andriamanitra. Nahagaga, fa sady afaka tamin’ny filokana aho, no nanjary nankahala azy io mihitsy koa. Marary ny foko ankehitriny, rehefa mieritreritra ny fahorian’ny vady aman-janako noho izaho niloka. Tena misaotra an’i Jehovah Andriamanitra aho, noho ny nanampiany ahy hiala tamin’ny fanandevozan’ny filokana, ary mbola manampy ahy foana izy mba hahatsara ny fiainako!”—Hebreo 4:12.

Noresahina tao amin’ny lahatsoratra voalohany koa i John, lasa nianatra Baiboly koa izy. Izao no tsaroany: “Nanampy ahy handinika indray ny fiainako ny fianarana Baiboly. Izao vao hitako nibaribary fa nisy fiantraikany lehibe teo amiko sy teo amin’ny fianakaviako ny filokana. Nanjary takatro fa mahatonga ny olona ho tia tena sy ho tia vola ny filokana, nefa toetra halan’i Jehovah izany. Rehefa nitohy ny fianarako, dia nanome ahy tanjaka hialana tamin’ny filokana ny fitiavako an’i Jehovah. Ny nofinofiko hanana fiainana tsara kokoa no nahatonga ahy hiloka. Tanteraka anefa izao ny nofinofiko rehefa tsy niloka intsony aho, satria sambatra aho manompo an’i Jehovah.”

Tapa-kevitra tsy hiloka intsony koa i Linda, vadin’i John. “Tsy mora izany”, hoy izy. “Nianatra nifantoka tamin’ireo zava-dehibe kokoa teo amin’ny fiainana aho, rehefa nianatra Baiboly niaraka tamin’ny Vavolombelon’i Jehovah izahay mivady. Nianatra ho tia izay zavatra tian’Andriamanitra sy hankahala izay halany aho, anisan’izany ny endrika rehetra isehoan’ny fitiavam-bola. Lasa tsara kokoa izao ny fiainako sady manam-bola kokoa aho.”—Salamo 97:10.

Hanana ny tanjaka sy ny fahendrena ilaina mba hialana amin’ny fandriky ny filokana koa ianao, raha mamboly fifandraisana amin’i Jehovah Andriamanitra. Hanjary hanam-bola kokoa ianao ary ho salama tsara kokoa ara-pihetseham-po sy ara-panahy. Ianao mihitsy amin’izay no hahatsapa fa marina ny lazain’ny Ohabolana 10:22 hoe: “Ny fitahian’i Jehovah no mampanan-karena, ary tsy azon’ny fisasarana ampiana izany.”

[Teny notsongaina, pejy 11]

Tsy aretina mampahalemy ny firenena fotsiny ny fitiavam-bola, fa tena aretina mahafaty ara-panahy mihitsy

[Efajoro/Sary, pejy 9]

Ny Filokana sy ny Hery Hafakely

Nandefa tatitra tany amin’ny Vaomiera Amerikanina Manadihady ny Vokatry ny Filokana, ny mpikaroka tao amin’ny Oniversiten’i Duke. Toa te hilaza ireo mpikaroka fa mifandray amin’ny finoana momba ny hery hafakely ny dokam-barotra momba ny filokana. Hoy ilay tatitra: “Hita mibaribary fa mifantoka amin’ny fitiavam-bola ny dokam-barotra maro [momba ny loteria] . . . Tsy fitiavam-bola mahatonga hiasa mafy sy hikiry anefa izany, fa mahatonga hiantehitra amin’ny zava-mahagaga foronin’ny saina. Ny faniriana sy ny nofinofy ary ny finoanoam-poana no fototr’izany. Fantatr’ireo mpitantana fikambanana mpanao loteria fa maro amin’ireo mpiloka ao aminy no miantehitra amin’ny finoanoam-poana, mijery tabilao milaza tonon’andro, mankany amin’ny mpanandro, ary mamaky ‘boky momba ny nofy’ izay manonona isa maro be mifanitsy amin’ny anarana sy daty ary nofy. Tsy mba manamafy ireo fikambanana mpanao loteria hoe mety hahazo daholo ireo isa fidina, na hoe ho kely ny vola ho azonao amin’ilay fanamby raha izay isa be mpifidy no fidinao. Naleon’izy ireo kosa mampirisika ny mpilalao hifidy (sy tsy hiala) amin’izay isa misy heviny eo amin’ny fiainany.”

[Sary, pejy 10]

“Nanome ahy tanjaka hialana tamin’ny filokana ny fitiavako an’i Jehovah.”—John

“Lasa tsara kokoa izao ny fiainako sady manam-bola kokoa aho.”—Linda

[Sary, pejy 10]

“Nahagaga, fa sady afaka tamin’ny filokana aho, no nanjary nankahala azy io mihitsy koa.”—Kazushige

    Fitehirizam-boky Malagasy (1965-2025)
    Hiala
    Hiditra
    • Malagasy
    • Hizara
    • Firafitra
    • Copyright © 2025 Watch Tower Bible and Tract Society of Pennsylvania
    • Fifanekena
    • Fifanekena Momba ny Tsiambaratelo
    • Firafitry ny Fifanekena
    • JW.ORG
    • Hiditra
    Hizara