Avy Amin’ny Mpamaky

Mpampianatra Efa-taona izao no nampianarako amin’ny sekoly fanabeazana fototra, ary nahafaly ahy ny namaky ilay andian-dahatsoratra hoe: “Inona no ho Vita Raha Tsy eo ny Mpampianatra?” (8 Martsa 2002) Manahy aho satria hitako fa lasa tsy mahafantatra ny tsara sy ny ratsy intsony ny ankizy. Sarotra koa ny mampianatra rehefa tsy mahatakatra tsara ny andraikiny ny ankizy nefa efa hainy tsara hoe inona no azon’ny mpianatra sy ny mpampianatra atao ary inona no tsy azon’izy ireo atao. Na izany aza, dia mahafinaritra ny mampianatra, indrindra rehefa mazoto mianatra ny ankizy sady mandroso tsara.

J. K., Etazonia

Misaotra tamin’ireo lahatsoratra ireo. Nanampy ahy hahatakatra izy ireo hoe tena manao sorona be ho anay ny mpampianatra, na dia mahalana aza izahay vao manao izany ho an-dry zareo.

S. M., Italia

Valo taona aho. Hitako tamin’iny gazetinareo momba ny mpampianatra iny fa tia ny mpianatra ny mpampianatra. Tia mampianatra ankizy izy ireo na dia sarotra aza izany. Nomeko taratasy kely fisaorana ny mpampianatra ahy. Mianatra ny fomba hampianarana ny olona momba an’i Jehovah izahay sy ny zandriko vavy efa-taona, na dia sarotra aza izany indraindray. Tianay mantsy ny olona.

T. M., Etazonia

Efa-taona taorian’ny nialako tamin’ny asa fampianarana, dia nisy mpianatra nanoratra tamiko mba hisaotra ahy noho ny fotoana laniko nanampiana azy. Nampiarahiny tamina fanomezana kely namboariny samirery ilay izy. Azonareo an-tsaina angamba ny hafaliako nahazo ilay taratasy!

A. R., Slovenia

Nomeko an’iny gazety iny ny tale sy ny mpampianatra roa ao amin’ny sekoly ianaran’ny zanako. Niandry roa andro aho ary niverina tany amin-dry zareo mba hahafantarana ny heviny. Nangataka 20 tamin’ilay gazety, amin’ny teny espaniola sy anglisy, izy ireo mba homeny ny ray aman-drenin’ny mpianatra.

M. M., Etazonia

Nampianatra tany amin’ny sekoly fanabeazana fototra nandritra ny efa-bolana aho tamin’ny herintaona. Nilaza ny mpampianatra niara-niasa tamiko fa sarotra ny asan’izy ireo noho ny ray aman-dreny tsy mahay mankasitraka. Tena faly àry aho rehefa voalaza tao amin’iny andian-dahatsoratra iny fa tena sarobidy ny asan’ny mpampianatra be fandavan-tena. Nahazo taratasy fisaorana be dia be avy tamin’ny mpianatro aho rehefa tapitra ny fotoana nampianarako azy ireo. Sarobidy amiko daholo ireny taratasy ireny!

S. I., Japon

Fahatsiarovan-tena ho Meloka Tena nilaiko mihitsy ilay lahatsoratra hoe: “Ny Fiheveran’ny Baiboly: Ratsy Foana ve ny Mahatsiaro Tena ho Meloka?” (8 Martsa 2002) Sarotsarotiny loatra aho, ka sarotra tamiko ny nifehy ny fihetseham-poko rehefa niaraka tamin’ilay mpitory ny filazantsara manontolo andro namako. Nasongadin’ilay lahatsoratra anefa fa tsy maneho fitiavana isika raha manao foana izay hahatsapan’ny olon-kafa fa meloka izy rehefa tsy manao zavatra araka izay tiantsika. Hiteraka vokatra tsy araka ny nirintsika koa izany. Faly aho satria afaka nanitsy ny fomba fisainako. Miangavy anareo aho mba hampianatra anay hatrany ny fomba fijerin’i Jehovah.

K. K., Japon