Noforonina mba Hianatra Mandrakizay

“Misy taova tena mahavariana sady matanjaka be ao anatin’ny lohantsika tsirairay. Kely izy io nefa tena mahay. Arakaraka ny ianarantsika ny momba azy no ahitantsika fa toa tsy manam-petra ny zava-bitany.”—TONY BUZAN SY TERENCE DIXON, MPANORATRA MOMBA NY SIANSA.

TOY inona ny habetsahan’ny zavatra azon’ny atidohan’ny olombelona ianarana? Mbola mahaliana sy manahiran-tsaina ny mpikaroka foana ny mitady ny valin’izany. Hoy i Peter Russell ao amin’ilay boky hoe Ny Boky Momba ny Atidoha (anglisy): “Arakaraka ny ianarana momba ny atidohan’ny olombelona no ahitana fa mihoatra lavitra noho izay noeritreretina tany aloha ny zava-bitany.”

Mahavita mitadidy zavatra maro be mihitsy, ohatra, ny atidohantsika. Hoy i Russell: “Tsy toy ny fitoeran-javatra ny fitadidiana, ka hoe mety ho feno. Azo oharina amin’ny hazo kosa izy io. Tsy toy ny hazo rehetra anefa ilay izy, fa mamokatra farango. Mihantona eny amin’ireny farango ireny izay zavatra tadidin’ilay olona. Azo anantonana farango hafa koa anefa eo amin’ny farango tsirairay, ka misy zavatra tadidy hafa azo ahantona eo. Afaka mitadidy zavatra betsaka kokoa hatrany àry ianao. Arakaraka ny ianaranao, no ahafahanao mitadidy zava-baovao hafa indray.” Miverina ihany àry ilay fanontaniantsika tany aloha hoe: “Nahoana no tsy manam-petra toy izany ny zava-bitan’ny atidohan’ny olombelona?”

Tsy manana valiny mahafa-po ireo mpanohana ny evolisiona. Milaza mantsy izy ireo fa nivoatra tsikelikely ny olombelona ka lasa nanana atidoha mahay be, satria mila izany mandritra ny androm-piainany. Manontany tena àry ny olona mandinika hoe: Raha mandritra ny androm-piainany monja no ilan’ny olombelona ny atidohany, nahoana no tsy manam-petra ny zava-bitan’izy io? Hanamboatra sarety ve ianao, ohatra, raha vary iray kapoaka monja no hoentinao aminy?

Manome valiny tsotra nefa mahafa-po kosa ny Baiboly. Voalohany, lazainy amintsika fa noforonina araka ny endrik’Andriamanitra i Adama sy Eva, razambentsika, ka ho afaka hanahaka ny toetra tsarany. Faharoa, noforonina hiaina mandrakizay izy ireo, ka natao hianatra mandrakizay. (Genesisy 1:27; 2:16, 17) Ahitana taratr’izany fikasan’Andriamanitra izany ny atidohantsika, na dia mbola tsy amin’ny fomba feno aza, noho isika lasa mpanota.—Romanina 5:12.

Ho tanteraka anefa ny fikasan’Andriamanitra tany am-piandohana, dia ilay hoe ho lasa paradisa ny tany, ary ho feno olona lavorary sy matahotra azy. Nomen’i Jehovah ho sorona ho antsika mantsy i Jesosy Kristy, Zanany lahitokana, mba hahazoantsika fiainana mandrakizay.—Matio 20:28; Jaona 3:16.

Ny boky fianarana mahasoa indrindra

Nanome antsika ny Baiboly Masina koa i Jehovah. (2 Timoty 3:16; 2 Petera 1:21) Avy amin’ny fanahy masina io boky sarobidy io, ka tsy manitatra isika raha milaza fa izy io no boky fianarana mahasoa indrindra. (Salamo 19:7-10) Nilaza mihitsy aza i Jesosy hoe: “Tsy ny mofo ihany no tsy maintsy iveloman’ny olona, fa ny teny rehetra avy amin’ny vavan’i Jehovah koa.”—Matio 4:4.

Nahoana àry raha manokana fotoana kely isan’andro hamakiana ny “teny” sarobidy avy amin’Andriamanitra, na tanora ianao na antitra? Handray soa dieny izao sy amin’ny hoavy ny olona manao izany sy mampihatra izay vakiny. Afaka ny hiaina sy hianatra mandrakizay, araka ny nokasain’Andriamanitra tany am-boalohany izy. Fanantenana lehibe tokoa izany!—Mpitoriteny 3:11; Jaona 17:3.

[Sary, pejy 11]

Noforonin’Andriamanitra hianatra mandrakizay, araka ny nokasainy, ny atidohan’ny olombelona

[Sary, pejy 12]

Ny Baiboly no boky fianarana mahasoa anao indrindra