Nisy Namorona Ve?
Ny Elatry ny Angidina
● Afaka tsy mikopak’elatra mandritra ny 30 segondra ny angidina sasany, nefa tsy mianjera. Nahoana? Satria hafakely ny elany. Tsy misy afaka mitaha aminy na ny elatra fiaramanidina aza.
Diniho izao: Mivalombalona ny elatry ny angidina sady manify kely. Manaraka ny halavan’ilay elatra ilay valonana, ka tsy mora mipolaka. Ireo valonana ireo no mahatonga azy ho afaka misidina ambony, na dia tsy mikopak’elatra aza. Ahoana no hetezan’izany? Hoy ny gazety Mpahay Siansa Vaovao (anglisy): “Mitsofoka eny anelanelan’ireo valonana ny rivotra, ka lasa tsy dia misy heriny be aminy ny rivotra manosika azy hidina. Vao mainka aza mihazona azy tsy hilatsaka ny rivotra mandalo eo amin’ny elany.”
Rehefa avy nandinika ny elatry ny angidina i Abel Vargas, mpahay siansa, sy ny namany, dia nilaza fa “tena ilaina ny maka tahaka ny elatra voajanahary toy ireny, rehefa manamboatra an’ireo fitaovana kely dia kely halefa eny amin’ny habakabaka.” Toy ny felatanana ireo fitaovana ireo, izay misy fakan-tsary sy zavatra hafa. Manampy amin-javatra maro izy ireo, ohatra hoe hanangonam-baovao avy any amin’ny toerana misy loza na hanaraha-maso ny fandotoana ny tontolo iainana.
Ahoana ny hevitrao? Nisy ho azy ve sa nisy namorona ny elatry ny angidina, izay manify kely sady mivalombalona?
[Sary, pejy 25]
Fitaovana alefa eny amin’ny habakabaka, milanja 120 miligrama. Enina santimetatra ny halavan’ny elany roa rehefa mivelatra. Manify kely ny elany, ary afaka mikopakopaka rehefa alefa ny herinaratra
[Sary nahazoan-dalana]
© Philippe Psaila/Photo Researchers, Inc.