2. Ny Ataon’ny Olona Ihany ve no Mahatonga ny Fijaliana?

Zava-dehibe ny valin’izany

Raha eny ny valin’io fanontaniana io, dia mety ho azontsika atao ny mampihena ny fijaliana.

Eritrereto izao

Ny olombelona ihany ve no mahatonga ny fijaliana raha ireto ohatra ireto no jerena?

Herisetra.

Izao ny tatitra navoakan’ny Fikambanana Iraisam-pirenena Momba ny Fahasalamana (OMS): Olon-dehibe 1 ao anatin’ny 4 no efa niharan’ny herisetra tamin’izy mbola kely, ary vehivavy 1 ao anatin’ny 3 no efa niharan’ny herisetra na nisy nametaveta (na izy roa) teo amin’ny fiainany.
Ady sy famonoana olona.

Izao no voalazan’ny Antontan’isa Momba ny Fahasalamana Maneran-tany 2018, navoakan’ny OMS: “Tombanana ho 477 000 eo ho eo, eran-tany, ny isan’ny olona maty nisy namono tamin’ny 2016.” Tombanana ho 180 000 koa ny olona maty noho ny ady, tamin’io taona io.
Aretina.

Maherin’ny arivo tapitrisa ny olona mifoka sigara. Ny sigara sy paraky anefa no anisan’ny mahatonga ny olona harary fo, ho tapaka lalan-dra, na ho voan’ny kanseran’ny havokavoka. Tafiditra amin’ireo antony mahafaty olona betsaka indrindra ireo. Izany no nolazain’ilay mpanoratra atao hoe Fran Smith, tao amin’ny gazety Vaovao Momba ny Tany (anglisy).
Tsy fitovian’ny fari-piainana.

Izao no nolazain’ilay psikology atao hoe Jay Watts: “Mampitombo ny adin-tsain’ny olona ny fahantrana, ny fanavakavahana saranga sy volon-koditra, ny fanambaniana vehivavy, ary ny fifindra-monina. Mampitombo ny adin-tsaina koa ny toe-tsaina tia mifaninana.”

FANAZAVANA FANAMPINY

Jereo ao amin’ny jw.org/mg ilay video hoe Inona no Antony Namoronan’Andriamanitra ny Tany?

Inona no lazain’ny Baiboly?

Ilay lehilahy teo aloha ihany, marary any amin’ny hopitaly. Milaza vaovao ratsy momba an’ilay rangahy ny dokotera. Malahelo ny vadiny maheno an’ilay izy.

Ny olombelona no tompon’andraikitra amin’ny zavatra maro mahatonga ny fijaliana.

Betsaka amin’izy ireny no vokatry ny ataon’ny fitondram-panjakana manao didy jadona. Milaza ho manao soa ho an’ny vahoaka izy ireny nefa vao mainka mampijaly azy.

“Nanjakazaka tamin’ny namany ny olona ka nampiditra loza taminy.”—MPITORITENY 8:9.

Azo atao ny mampihena ny fijaliana.

Raha mampihatra ny toro lalan’ny Baiboly isika, dia ho salama kokoa ary hifandray tsara amin’ny hafa.

“Mamelombelona ny vatana ny fo tony, fa ny fialonana kosa mahatonga ny taolana ho lo.”—OHABOLANA 14:30.

“Aoka hesorina tsy ho eo aminareo ny lolompo rehetra, ny fahatezerana rehetra, ny fahavinirana rehetra, ny filelalelana rehetra ary ny fanevatevana rehetra, mbamin’ny faharatsiana rehetra.”—EFESIANINA 4:31.