Miezaha Haneho Fitiavana

Olana

Elaela ny olona iray vao hahavita tsy hanavakavaka intsony. Mitaky fotoana sy ezaka izany, hoatran’ny miady amin’ny virosy ihany. Inona àry no azonao atao mba hanesorana ny fanavakavahana ao am-ponao?

Toro lalana

Sary: 1. Lehilahy iray avy any Azia, manokatra varavarana ho an’ny lehilahy iray mainty hoditra mitondra kafe. 2. Ilay lehilahy mainty hoditra teo ihany, mizara kafe ho an’ny mpiara miasa aminy, anisan’izany ny vehivavy iray avy any Inde.

“Mitafia fitiavana fa fatorana mampiray tonga lafatra izy io.”—KOLOSIANINA 3:14.

Ahoana izany? Raha manao zavatra tsara ho an’ny hafa ianao dia hifandray tsara aminy. Tsy dia hanavakavaka ianao raha miezaka ho tia kokoa azy. Tsy hankahala azy koa ianao na hanambany azy.

Inona no azonao atao?

Sary: 1. Vehivavy zokiolona iray fotsy hoditra miakatra ny tohatra, ary manampy azy ny vehivavy iray avy any Inde sady mitondra ny entany. 2. Ilay vehivavy zokiolona fotsy hoditra teo ihany, mitondra bisikoỳ ho an’ny mpifanila trano aminy, izay tsy iza fa ilay lehilahy azy any Azia.

Eritrereto hoe inona no azonao atao mba hampisehoana fa tianao ny sokajin’olona tsy dia tiatianao taloha. Tsy voatery hanao zavatra miavaka be ianao. Iezaho atao ny iray na ny sasantsasany amin’ireto:

Tsy dia hanavakavaka ianao arakaraka ny anaovanao zavatra mampiseho hoe tianao ny hafa

Miezaha hahalala fomba amin’ireo anisan’io sokajin’olona io. Ohatra hoe manokatra varavarana ho azy, na manome ny toeranao ho azy rehefa ao anaty bisy.
Miezaha hiresaka kely aminy na dia tsy tena hainy aza ny fiteninao.
Manàna faharetana raha mahasosotra anao ny fihetsiny ary tsy azonao ny antony anaovany an’ilay izy.
Miezaha hangoraka rehefa miresaka ny olana mahazo azy izy.

Tantara Tena Nisy: Nazaré (Guinée-Bissau)

“Tsy dia tiatiako ny mpifindra monina taloha. Nolazaina tamiko mantsy hoe ireny mpifindra monina ireny, hono, mandainga amin’ny fanjakana mba hahazoana vola na fanampiana. Maro amin’izy ireny koa, hono, no mpanao heloka bevava. Lasa sarotra tamiko ny nitia azy ireo noho izany. Izaho anefa tsy nieritreritra hoe nanavakavaka, satria hoatr’izany no fiheveran’ny ankamaroan’ny olona ny mpifindra monina.

“Tsapako anefa, tatỳ aoriana, hoe nanavakavaka aho. Nanampy ahy ho tia kokoa an’ireo mpifindra monina ny torohevitry ny Baiboly. Tsy mihatakataka amin’izy ireo intsony aho izao. Miarahaba azy ireo kosa aho sady miresaka aminy. Miezaka mahafantatra ny tsirairay amin’izy ireo aho. Lasa tia azy ireo aho izao, sady mahazo aina rehefa miaraka aminy.”