Fampiasana Mikrô

MANDANY fotoana be sy manao ezaka be ireo rahalahintsika sy anabavintsika, mba hanatrehana ireo fivoriana kristianina. Mila mandre tsara izay lazaina izy ireo, mba handraisany soa.

Tsy nisy herinaratra na fanamafisam-peo tamin’ny andron’ny Isiraely fahiny. Ahoana no nandrenesan’ny Isiraelita, niisa an-tapitrisany maro, an’i Mosesy, fony izy niteny tamin’izy ireo teo amin’ny Lemak’i Moaba, talohan’ny nidirana tao amin’ny Tany Nampanantenaina? Angamba i Mosesy nampiasa lehilahy maromaro, izay nifanelanelana tsara sy nampitampita ny teniny nanerana ilay toby. (Deot. 1:1; 31:1) Rehefa avy nandresy ilay tany teo andrefan’i Jordana ny Isiraelita, dia nangonin’i Josoa teo anoloan’ny Tendrombohitra Gerizima sy ny Tendrombohitra Ebala ilay firenena, ka ny Levita angamba nataony tao amin’ilay lemaka teo anelanelan’ireo. Teo ilay vahoaka rehetra dia nahare ka nandray tsara ilay fanambarana momba ireo fitahiana sy fanozonan’Andriamanitra. (Josoa 8:33-35) Nisy olona nampiasaina mba hampitampita ilay teny koa angamba tamin’io. Tsy maintsy ho nanampy tamin’izany koa anefa ny fanakon’ny feo faran’izay tsara teo amin’ilay toerana.

Tokony ho 1 500 taona tatỳ aoriana, dia nisy “vahoaka betsaka” niangona teo amin’ny Ranomasin’i Galilia mba hihaino an’i Jesosy. Niondrana an-tsambo i Jesosy, nihataka kely ny moron-drano, ary nipetraka mba hiteny tamin’ilay vahoaka. (Marka 4:1, 2) Nahoana izy no niteny avy teny ambonin’ny sambo? Satria mazava be ny feon’olona ampitaina avy eo ambonin’ny rano tony.

Hatreo am-piandohan’ny taonjato faha-20, rehefa tsy mafy tsara sy nazava tsara ny feon’ny mpandahateny iray, dia tsy betsaka no nandre izay nolazainy. Nanomboka tamin’ireo taona 1920 anefa, dia afaka nampiasa fitaovana fanamafisam-peo elektrika tany amin’ny fivoriamben’ny vondrom-paritra ny mpanompon’i Jehovah.

Fitaovana fanamafisam-peo. Afaka mampitombo be ny hamafin’ny feon’ny mpandahateny io fitaovana io, nefa mbola voahazona tsara ihany ny toetran’ny feony. Tsy voatery hihiakiaka ka hampihenjana mafy ny hoza-peo ao amin’ny tendany izy; ary tsy voatery hanongilan-tsofina mafy ny mpihaino vao handre izay lazainy, fa afaka mifantoka amin’ilay hafatra kosa.

Ezaka be no natao mba hisian’ny fitaovana fanamafisam-peo tsara any amin’ny fivoriamben’ny Vavolombelon’i Jehovah. Efitrano Fanjakana maro koa no mampiasa fitaovana fanamafisam-peo ho an’ireo manao lahateny, mitarika fivoriana, na mamaky teny eny ambonin’ny lampihazo. Ary misy Efitrano Fanjakana sasantsasany koa mampiasa mikrô, mba hanomezan’ny mpanatrika valin-teny amin’ny fivoriana. Raha manana fitaovana toy izany ny anareo, dia mianara hampiasa azy ireo tsara.

Toro lalana fototra sasany. Tadidio ireto torohevitra manaraka ireto, mba hampiasana ilay fitaovana araka ny tokony ho izy: 1) Tokony ho eo amin’ny 10 na 15 santimetatra ny elanelan’ny mikrô sy ny vavanao, amin’ny ankapobeny. Mety hanova ny teny lazainao ilay izy, raha akaiky loatra. Raha lavitra loatra kosa ilay izy, dia tsy hazava ny feonao. 2) Tokony ho eo anoloanao ilay mikrô, fa tsy hatao misompirana. Raha mitodika miankavanana na miankavia ianao, dia aza miteny raha tsy rehefa miatrika ilay mikrô ny tarehinao. 3) Ampiakaro kely noho ny rehefa miresaka andavanandro ny hamafin’ny feonao sy ny heriny. Tsy ilaina anefa ny mihiakiaka, satria efa hitondra mora foana ny feonao hatrany amin’ireo mpanatrika lavitra indrindra anao, ilay fitaovana fanamafisam-peo. 4) Atodiho hiala amin’ny mikrô ny lohanao, raha mila mikohaka kely mba hampisava ny feonao ianao, na voatery hikohaka na hievina.

Rehefa manao lahateny. Hisy rahalahy iray hanitsy ny haavon’ilay mikrô, rehefa mankeny amin’ny polipitra ianao. Mijoroa tsotra fotsiny ka atreho ny mpanatrika, eo am-panaovany izany. Apetraho eo ambonin’ny polipitra ny taratasinao, ka aza avela hanakona azy ireo ilay mikrô.

Henoy ny fanenon’ny feonao avoakan’ireo fanamafisam-peo, rehefa manomboka miteny. Mafy loatra ve ilay izy? Mipoapoaka ve ny fanenon’ny teny sasany? Raha izany no izy, dia mety hila ny hihemotra telo na dimy santimetatra ianao. Rehefa manopy maso amin’ny taratasinao ianao, dia tadidio fa tsy tokony hiteny na hamaky teny ianao, raha tsy rehefa manatrika ny mikrô ny tarehinao, na somary eo amboniny kely, fa tsy eo ambaniny.

Rehefa mamaky teny eny ambonin’ny lampihazo. Tsara kokoa raha hazoninao eny an-tananao ny Baibolinao, na ilay boky na gazety vakinao. Amin’izay, dia hanatrika ny mpihaino ny tarehinao. Koa satria eo anoloanao ilay mikrô, dia mety hilainao hahataka kely miankavanana ilay zavatra vakinao, ary ny lohanao hahataka kely miankavia, na hahataka kely miankavia ilay zavatra vakinao, ary ny lohanao miankavanana. Amin’izay, dia hivantana ao amin’ilay mikrô ny feonao.

Ny ankamaroan’ireo rahalahy mamaky teny amin’ny Fianarana Ny Tilikambo Fiambenana dia mijoro ary miteny ao amin’ny mikrô eo anoloany. Mamela azy hiaina tsara izany, sy hampisy heviny kokoa ilay zavatra vakiny. Tadidio fa tapany tena lehibe amin’ilay fivoriana ny famakiana ireo fehintsoratra. Miankina be dia be amin’ny fandrenesan’ny mpanatrika azy ireo ny soa horaisiny.

Rehefa manome valin-teny mandritra ny fivoriana. Raha mampiasa mikrô mba hanomezan’ny mpanatrika valin-teny ny Efitrano Fanjakananareo, dia tadidio fa mbola ilainao hatao mazava tsara sy re tsara ihany ny teninao. Hazòny eny an-tananao ilay zavatra ianarana, na ny Baibolinao, rehefa manome valin-teny. Izany dia hanampy anao hahita azy io mazava tsara, no sady hiteny ao amin’ny mikrô.

Any amin’ny Efitrano Fanjakana sasany, dia misy rahalahy tendrena hitondra ny mikrô any amin’ireo voatondro hanome valin-teny. Raha izany no izy ao amin’ny anareo, rehefa voatondro hanome valin-teny ianao, dia atsangano foana ny tananao, mba ho hitan’ilay rahalahy mitondra ny mikrô ny misy anao, ka handehanany any haingana. Raha mikrô raisin-tanana no ampiasainareo, dia aoka ianao ho vonona haka azy avy hatrany. Aza manomboka miteny, raha tsy efa eo anoloanao tsara ilay mikrô. Avereno avy hatrany amin’ilay rahalahy ilay izy, rehefa avy namaly ianao.

Rehefa manao fampisehoana. Ilaina hokarakaraina mialoha ny fampiasana mikrô mandritra ny fampisehoana iray. Raha misy fitoerany ilay mikrô, dia ho afaka hampiasa ny tananao roa mba hihazonana ny Baibolinao sy ny taratasinao ianao. Mety ho afaka hanao fihetsehana misimisy kokoa ianao, raha mikrô raisin-tanana no ampiasainao. Amin’izay anefa, dia asaivo hazonin’ilay namanao ilay mikrô, mba ho afaka hamadika ny Baibolinao mora foana ny tananao. Tokony hanaovanareo famerenana izany, mba hahaizan’ilay namanao hihazona ilay mikrô araka ny tokony ho izy. Tadidio koa fa tsy tokony hiamboho ny mpanatrika ianao rehefa eo ambonin’ny lampihazo, indrindra fa rehefa miteny.

Amin’ireo fampisehoana amin’ny Fivoriana Momba ny Fanompoana, dia mety hisy mpandray anjara maromaro, ary mety hifamezivezy eo ambonin’ny lampihazo izy ireo. Mety ho mikrô maromaro àry no hilaina. Tokony hapetraka mialoha eny amin’ny lampihazo izy ireny, na ho azon’ny mpandray anjara raisina mora foana rehefa hankeny izy. Tsy maintsy karakaraina mialoha ireo mikrô, raha tiana ho eo amin’ny toerany amin’ny fotoana ilana azy. Anaovy famerenana alohan’ny tena hanaovana azy ny fampisehoana rehetra, mba hianaran’ny mpandray anjara ny fahaiza-mampiasa ny mikrô. Rehefa tsy afaka manao famerenana eny ambonin’ny lampihazo ny mpandray anjara, dia tsara ny hihazonany zavatra kely mitovy habe amin’ny mikrô, mandritra ny famerenana, mba hianarany hihazona azy. Aorian’ilay fampisehoana, dia tokony hamerina moramora ireo mikrô raisin-tanana ho eo amin’ny toerany ireo mpandray anjara, ka hitandrina sao voafingan’ny tadin’ireo mikrô hafa, rehefa miala ny lampihazo.

Ny fahaizantsika mampiasa mikrô dia mifandray mivantana amin’ny iray amin’ireo zava-kendren’ny fivoriantsika, izany hoe fifanomezantsika soa, amin’ny firesahana momba ny Tenin’Andriamanitra. (Heb. 10:24, 25) Afaka manatanteraka io zava-kendrena lehibe io ny tenantsika, raha mianatra hampiasa tsara ny mikrô.