Fanoharana avy Amin-javatra Mahazatra

MAZAVA ho azy fa tokony hifanentana foana amin’ilay zavatra resahinao ireo fanoharana ampiasainao. Tokony hifanentana amin’ny mpihaino anao koa anefa izy ireny, raha tena tianao handaitra.

Inona no fanoharana azonao fidina, rehefa handaha-teny amin’olona maromaro ianao? Inona no nataon’i Jesosy Kristy? Na niresaka tamin’ny vahoaka i Jesosy, na tamin’ny mpianany, dia tsy naka ohatra avy tamin’ny fomba fiainan’ny olona tany ivelan’i Isiraely. Tsy ho fantatry ny mpihaino azy ny ohatra toy izany. Tsy niresaka momba ny fiainan’ny mpanjakan’i Ejipta izy, ohatra, na momba ny fanaon’ny mpivavaka tany India. Na izany aza, dia avy amin’ny fanao mahazatra ny olona maneran-tany no nakany ny fanoharany. Niresaka momba ny fanjairana lamba izy, ny raharaham-barotra, ny fahaverezan’ny zavatra sarobidy, ary ny fanatrehana fampakaram-bady. Hainy tsara ny fihetsiky ny olona ao anatin’ny toe-javatra samihafa, ary nampiasainy izany fahalalana izany. (Marka 2:21; Lioka 14:7-11; 15:8, 9; 19:15-23) Koa satria ny vahoakan’ny Isiraely no tena nitorian’i Jesosy, dia matetika ny fanoharany no nahakasika zavatra sy asa aman-draharaha teo amin’ny fiainan’izy ireo andavanandro. Ohatra, niresaka momba ny fambolena izy, sy ny fihainoan’ny ondry ny antson’ny mpiandry azy, ary ny fampiasana hodi-biby mba hitahirizana divay. (Marka 2:22; 4:2-9; Jaona 10:1-5) Nilaza ohatra fantatra tsara teo amin’ny tantara koa izy: ny famoronana ny mpivady voalohany, ny Safo-drano tamin’ny andron’i Noa, ny fandringanana an’i Sodoma sy Gomora, ny fahafatesan’ny vadin’i Lota. (Matio 10:15; 19:4-6; 24:37-39; Lioka 17:32) Manao toy izany koa ve ianao, ka mihevitra ny zavatra fanaon’ny ankamaroan’ny mpihaino anao sy ny kolontsaina niaviany, rehefa mifidy fanoharana?

Ahoana raha olona iray ihany, na angamba olona vitsivitsy monja, no itenenanao? Mifidiana fanoharana iray tena mety amin’izany olona izany. Fony nitory tamin’ny vehivavy samaritanina iray teo am-pantsakana tany Sykara i Jesosy, dia niresaka momba ny “rano velona” sy ny hoe “tsy hangetaheta mandrakizay” ary ny “loharano miboiboika . . . ho fiainana mandrakizay.” Samy nifandray nivantana tamin’ny asan’ilay vehivavy avokoa ireo fitenenana an’ohatra ireo. (Jaona 4:7-15) Ary rehefa niresaka tamin’ny lehilahy sasantsasany avy nanasa ny haratony izy, dia nampiasa fanoharana momba ny fanaratoana. (Lioka 5:2-11) Tamin’ireo toe-javatra roa ireo, dia mety ho azony natao ny naka ohatra momba ny fambolena, satria nonina teo anivon’ny mpamboly ireo olona ireo. Nandaitra kokoa anefa ny firesahany momba ny asa nataon’izy ireo! Miezaka manao izany koa ve ianao?

Nitory tamin’ireo “ondry verin’ny taranak’Isiraely” i Jesosy, fa ny apostoly Paoly kosa nirahina, tsy ho eo amin’ny Isiraely ihany, fa ho any amin’ireo firenena jentilisa koa. (Matio 15:24; Asa. 9:15) Nampiova ny fomba niresahan’i Paoly ve izany? Eny. Rehefa nanoratra ho an’ny Kristianina tany Korinto izy, dia niresaka momba ny fifaninanana hazakazaka sy ny fihinanana tao amin’ny tempolin’ny sampy ary ny filaharana fanaon’ireo avy nandresy. Zavatra fantatr’ireo tsy Jiosy ireo avokoa izany rehetra izany.—1 Kor. 8:1-10; 9:24, 25; 2 Kor. 2:14-16.

Mitandrina sahala amin’i Jesosy sy i Paoly ve ianao rehefa mifidy ny fanoharana sy ohatra hoentinao mampianatra? Mihevitra ny toe-piainana niavian’ny mpihaino sy ny zavatra fanaony andavanandro ve ianao? Mazava ho azy fa nisy fiovana be teto ambonin’ny tany hatramin’ny taonjato voalohany. Olona maro no afaka mahafantatra ny vaovao maneran-tany amin’ny alalan’ny televiziona. Matetika no fantany tsara izay mitranga any an-tany hafa. Raha toy izany ny eo amin’ny misy anao, dia tsy misy maha ratsy ny mampiasa izany vaovao izany ho fanoharana. Na izany aza, ny zavatra tena manohina ny fon’ny olona dia izay mahakasika ny fiainany manokana: ny tokantranony, ny fianakaviany, ny asany, ny sakafo haniny, ny toetrandro eo amin’ny misy azy.

Raha ilaina hohazavaina be ny fanoharanao, dia mety ho zavatra tsy fantatry ny mpihaino no resahinao. Hanakona ilay hevitra tianao hampianarina ny fanoharana toy izany. Ilay fanoharanao no mety ho tadidin’ny mpihaino, fa tsy ilay fampianarana ara-baiboly niezahanao nampitaina taminy.

Tsy nampiasa ohatra sarotra be i Jesosy, fa zavatra tsotra teo amin’ny fiainana andavanandro. Nampiasa zavatra kely izy mba hanazavana zavatra lehibe, ary zavatra tsotra mba hanazavana zavatra sarotra. Nampifandray ny zava-niseho isan’andro tamin’ny fampianarana marina i Jesosy, ka nanampy ny olona hahazo mora foana sy hitadidy izany fampianarana izany. Izany ka ohatra tsara tokony harahina!