Fahaiza-mampiasa Zavatra Hita Maso

NAHOANA ianao no hampiasa zavatra hita maso, rehefa mampianatra? Satria mahatonga ny fampianaranao handaitra kokoa izany. Nampiasa zavatra hita maso i Jehovah sy i Jesosy, ary afaka manahaka azy ireo isika. Samy handray fanazavana ny maso sy ny sofina, rehefa ampiarahina amin’ny zavatra hita maso ny teny lazaina. Mety hihazona ny fahalianan’ny mpihaino izany, no sady hanamafy ilay hevitra azony. Ahoana no ahafahanao mampiasa zavatra hita maso, rehefa miresaka momba ny vaovao tsara? Ahoana no ahazoanao antoka fa mety ny fampiasanao azy ireny?

Nampiasa zavatra hita maso ireo Mpampianatra lehibe indrindra. Nampiasa zavatra hita maso tsy hay hadinoina i Jehovah, mba hampianarana lesona lehibe. Nasainy nivoaka teny ivelany i Abrahama indray alina izay, ka nilazany hoe: “Jereo ange ny lanitra, ka isao ny kintana, raha mahìsa azy hianao. . . . Ho tahaka izany ny taranakao.” (Gen. 15:5) Na dia toa tsy azo ninoana aza izany teny izany, araka ny fihevitr’olombelona, dia nanohina mafy an’i Abrahama, ka nino ny tenin’i Jehovah izy. Nirahin’i Jehovah nankany an-tranon’ny mpanefy tanimanga koa i Jeremia indray mandeha, ka nasainy nijery azy io namolavola tanimanga. Endrey izany lesona tsy hay hadinoina momba ny fahefana ananan’ny Mpamorona eo amin’ny olombelona! (Jer. 18:1-6) Ary ahoana moa no hanadinoan’i Jona ilay lesona momba ny famindram-po nampianarin’i Jehovah azy tamin’ny alalan’ny tanantanamanga? (Jona 4:6-11) Nisy mihitsy aza hafatra ara-paminaniana nasain’i Jehovah nolalaovin’ny mpaminaniny toy ny tantara an-tsehatra sady nampiasana zavatra sasany. (1 Mpanj. 11:29-32 ; Jer. 27:1-8; Ezek. 4:1-17) Ireo lafin-javatra nampiavaka ny tabernakely sy ny tempoly koa dia sary manampy antsika hahazo an-tsaina tsara ireo zavatra any an-danitra. (Heb. 9:9, 23, 24) Maro koa ny fahitana nomen’Andriamanitra mba hampitana fanazavana lehibe.—Ezek. 1:4-28; 8:2-18; Asa. 10:9-16; 16:9, 10; Apok. 1:1.

Ary zavatra hita maso inona avy no nampiasain’i Jesosy? Nitady hamandrika azy tamin’ny teniny, ny Fariseo sy ny mpanara-dia an’i Heroda indray mandeha. Nangataka denaria iray àry i Jesosy, ka nampiseho ny sarin’i Kaisara teo amin’ilay izy. Nohazavainy avy eo fa tokony haloa ho an’i Kaisara izay an’i Kaisara ary ho an’Andriamanitra izay an’Andriamanitra. (Matio 22:19-21) Mba hampianarana fa tokony hanome voninahitra an’Andriamanitra amin’izay rehetra ananantsika isika, dia notondroin’i Jesosy ny mpitondratena nahantra iray tao amin’ny tempoly, izay nanome farantsakely roa: ny fivelomany rehetra. (Lioka 21:1-4) Naka ankizy kely iray koa izy indray mandeha, ho ohatra ny amin’ny fanetren-tena sy ny tsy fitadiavana laza. (Matio 18:2-6) Nasehon’ny tenany mihitsy koa ny atao hoe fanetren-tena, tamin’ny fanasana ny tongotry ny mpianany.—Jaona 13:14.

Ny fomba hampiasana zavatra hita maso. Tsy afaka mampita hafatra amin’ny alalan’ny fahitana sahala amin’i Jehovah isika. Misy sary mampisaintsaina be dia be anefa, ao amin’ny boky avoakan’ny Vavolombelon’i Jehovah. Ampiasao izy ireny mba hanampiana ny olona liana hahazo an-tsaina ilay Paradisa an-tany ampanantenain’ny Tenin’Andriamanitra. Rehefa mampianatra Baiboly ianao, dia asao ilay mpianatra hijery sary iray mifandray amin’izay ianaranareo, ary hilaza izay hitany. Tsara homarihina fa nanontany toy izao i Jehovah, rehefa nisy fahitana sasany nomena an’i Amosa mpaminany: “Inona no hitanao, ry Amosa?” (Amosa 7:7, 8; 8:1, 2) Mametraha koa fanontaniana toy izany, rehefa manasa olona hijery ireo sary natao hampianarana.

Soraty izay kajy ataonao, na mampiasà tabilao misy ny fizotran’ny fotoana ka ahitana ny filaharan’ireo zava-dehibe araka ny fotoana nisehoany. Hanampy ny olona izany mba hahazo mora kokoa ireo faminaniana momba ny “fetr’andro fito” ao amin’ny Daniela 4:13 sy ny “fito-polo herinandro” ao amin’ny Daniela 9:24. Misy tabilao toy izany ao amin’ireo boky natao hianarantsika.

Rehefa manao fianaram-pianakaviana isika, dia ho mora azo kokoa ny fanazavana momba ny tabernakely sy ny tempolin’i Jerosalema ary ilay tempoly tao amin’ny fahitan’i Ezekiela, raha mampiasa sary isika. Hahita izany ianao ao amin’ny Fahatakarana ny Hevitry ny Soratra Masina, sy ao amin’ny pejy fanampiny ao amin’ny Soratra Masina—Fandikan-tenin’ny Tontolo Vaovao, ary ao amin’ny gazety Ny Tilikambo Fiambenana sasantsasany.

Mampiasà sarintany rehefa miara-mamaky Baiboly ny fianakavianao. Araho ny lalan’i Abrahama avy tany Ora nankany Harana, ka hatrany Betela. Jereo ny lalana narahin’ny firenen’ny Isiraely, niala avy tany Ejipta hankany amin’ny Tany Nampanantenaina. Jereo ny faritany nomena ho lovan’ny foko tsirairay. Diniho ny velaran-tany nanjakan’i Solomona. Araho ny lalana nalehan’i Elia, fony izy nandositra avy tany Jezirela ka hatrany amin’ny efitra tany ambadik’i Beri-sheba, rehefa avy norahonan’i Jezebela ho faty. (1 Mpanj. 18:46–19:4) Jereo ny misy ireo tanàna nitorian’i Jesosy. Araho ireo dia nataon’i Paoly, voatantara ao amin’ny bokin’ny Asan’ny Apostoly.

Tena manampy ny mpianatra Baiboly koa ny zavatra hita maso mba hahafantarany ny fomba fiasan’ny fiangonana. Asehoy azy ny fandaharana amin’ny fivoriambe, ary hazavao ny karazana fampianarana azontsika any. Nanaitra olona maro ny fitsidihana ny Efitrano Fanjakana na ny biraon’ny sampan’ny Vavolombelon’i Jehovah. Afaka mampisava fiheveran-diso maro momba ny asantsika sy ny zava-kendren’izy io, izany. Rehefa mampitsidika olona ny Efitrano Fanjakana ianao, dia asehoy ny tsy itoviany amin’ny trano fiangonana hafa. Asongadino fa trano tsotra natao hianarana izy io. Asehoy azy ny zavatra natao manokana ho an’ny fanompoantsika: ny toerana fizarana boky sy gazety, sy ny sarin’ireo faritany itoriantsika, ary ireo vata ho an’ny fanomezana an-tsitrapo (fa tsy lovia fanantazan-drakitra).

Ampiasao ny vidéos nomanin’ny Filan-kevi-pitantanana, raha misy, mba hampitomboana ny fitokisan’ilay mpianatra amin’ny Baiboly, sy mba hampahafantarana azy ny asan’ny Vavolombelon’i Jehovah, ary mba hampirisihana azy hiaina mifanaraka amin’ny fitsipiky ny Baiboly.

Rehefa olona betsaka kokoa no iresahana. Tena mandaitra mba hampianarana mpihaino maro kokoa ny fampiasana zavatra hita maso, rehefa nomaninao tsara ka mety tsara ny fampisehoanao azy. Maro samihafa ny zavatra toy izany omen’ny mpanompo mahatoky sy malina.

Ohatra, mazàna ny lahatsoratra fianarana ao amin’ny Tilikambo Fiambenana no misy sary, izay azon’ilay mpitarika ampiasaina mba hanasongadinana hevi-dehibe. Toy izany koa ny boky ampiasaina amin’ny Fianarana Boky.

Misy drafitra lahateny toa mety tsara raha ampiasana zavatra hita maso, mba hanazavana hevitra sasany. Mazàna tsara kokoa anefa raha izay voalazan’ny Baiboly no ifantohana, satria io no eny an-tanan’ny ankamaroan’ny mpihaino. Raha ilaina tsindraindray ny mampiseho sary iray na drafitra fohy momba ireo hevi-dehibe, dia fantaro mialoha raha toa izy io ho hita (na ho voavaky) avy any amin’ny laharan-tseza faran’ilay toeram-pivoriana. Tokony ho mahalana vao hampiasaina ny zavatra toy izany.

Tsy natao hampiala voly ny mpihaino ny fampiasantsika zavatra hita maso, rehefa mandaha-teny sy mampianatra. Ny zavatra mendri-kaja toy izany, izay hitan’ny maso, dia tokony hanamafy ireo hevitra ilaina hoantitranterina manokana. Mandaitra izy ireny, rehefa manazava kokoa ilay zavatra nolazaina, manamora kokoa ny fahazoana hevitra, na manaporofo ny fahamarinan’izay lazaina. Rehefa mety ny fampiasana zavatra hita maso, dia mety hanaitra tokoa ilay izy sy ilay fianarana nampitainy, ka ho tadidy mandritra ny taona maro.

Samy manampy eo amin’ny fianarana ny fahafahana mandre sy mahita. Tadidio fa nampiasa azy roa ireo i Jehovah sy i Jesosy, dia ireo Mpampianatra lehibe indrindra. Miezaha hanahaka ny nataony, rehefa mampianatra ny hafa.